ନୂଆଦିଲ୍ଲୀ: ବ୍ୟାଙ୍କରେ ଦିନକୁ ଦିନ ଠକେଇ ଘଟଣା ବଢ଼ି ଚାଲିଛି। ଲକ୍ଡାଉନରେ ମଧ୍ୟ ଠକେଇ ମାମଲା ସାମ୍ନାକୁ ଆସିଛି। ରାଷ୍ଟ୍ରାୟତ୍ତ ବ୍ୟାଙ୍କଗୁଡିକରେ ୨୦ହଜାର ଠକେଇ ଘଟଣା ରବିବାର ରିଜର୍ଭ ବ୍ୟାଙ୍କ ଦେଇଥିବା ଆର୍ଟିଆଇ ତଥ୍ୟରୁ ସାମ୍ନାକୁ ଆସିଥିଲା। ସୋମବାର ବ୍ୟାଙ୍କରେ ଆଉ ଏକ ବଡ ଠକେଇ ଘଟଣା ସାମ୍ନାକୁ ଆସିଛି। ଦିଲ୍ଲୀ ଭିତ୍ତିକ ଡେରୀ ଫାର୍ମ କ୍ୱାଲିଟି ଲିମିଟେଡ୍ କନସୋର୍ଟିଅମ ବ୍ୟାଙ୍କଗୁଡିକୁ ୧୪୦୦ କୋଟି ଟଙ୍କା ଠକେଇ କରିଥିବା ଅଭିଯୋଗ ଆସିଛିା ଏହି ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ) ଦେଶର ୮ ସ୍ଥାନରେ ଚଢାଉ କରିଥିବା ଜଣେ ଅଧିକାରୀ ସୋମବାର ସୂଚନା ଦେଇଛନ୍ତି।
କ୍ୱାଲିଟି ଲିମିଟେଡ୍ ଏବଂ ଏହାର ନିର୍ଦ୍ଦେଶକ ସଞ୍ଜୟ ଢିଙ୍ଗ୍ରା, ସିଦ୍ଧାନ୍ତ ଗୁପ୍ତା, ଅରୁଣ ଶ୍ରୀବାସ୍ତବଙ୍କ ସମେତ ଅନ୍ୟ କେତେଜଣ ବ୍ୟକ୍ତିବିଶେଷଙ୍କ ବିରୋଧରେ ସିବିଆଇ ପକ୍ଷରୁ ମାମଲା ରୁଜୁ କରାଯାଇଛି। ଏହି ବ୍ୟକ୍ତିବିଶେଷ ବ୍ୟାଙ୍କ ଅଫ୍ ଇଣ୍ଡିଆ(ବିଓଆଇ) ନେତୃତ୍ୱାଧୀନ କନର୍ସୋଟିୟମ ବ୍ୟାଙ୍କ ଯଥା: କାନାରା ବ୍ୟାଙ୍କ, ବ୍ୟାଙ୍କ ଅଫ୍ ବରୋଦା, ଆନ୍ଧ୍ର ବ୍ୟାଙ୍କ, କର୍ପୋରେଶନ ବ୍ୟାଙ୍କ, ଆଇଡିବିଆଇ, ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ, ଧନଲକ୍ଷ୍ମୀ ବ୍ୟାଙ୍କ ଏବଂ ସିଣ୍ଡିକେଟ ବ୍ୟାଙ୍କକୁ ପ୍ରାୟ ୧୪୦୦.୬୨ କୋଟି ଟଙ୍କା ଠକେଇ କରିଥିବା ସିବିଆଇ ମୁଖପାତ୍ର ଆର୍.କେ. ଗୌର ସୂଚନା ଦେଇଛନ୍ତି।
ଅଭିଯୋଗ ମୁତାବକ ଏମାନେ ବ୍ୟାଙ୍କରୁ ଋଣ ଲାଭ କରିବା ଲାଗି ମିଥ୍ୟା ଦସ୍ତାବିଜ, ରସିଦ, ଜାଲ୍ ଆକାଉଣ୍ଟ ବୁକ୍ସ, ନକଲି ସମ୍ପତ୍ତି ଏବଂ ଲାଏବିଲିଟି ସୃଷ୍ଟି କରିଥିଲେ। ବ୍ୟାଙ୍କରୁ ଲାଭ କରିଥିବା ଅର୍ଥକୁ ଅନ୍ୟତ୍ର ପଠାଇ ଦିଆଯାଇଥିବା ଅଭିଯୋଗ ମଧ୍ୟ ଆସିଛି। ଏହି ମାମଲାରେ ଦିଲ୍ଲୀ, ଉତ୍ତରପ୍ରଦେଶ, ରାଜସ୍ଥାନ ଏବଂ ହରିୟାଣାର ପ୍ରାୟ ୮ଟି ସ୍ଥାନରେ ସିବିଆଇ ସର୍ଚ୍ଚ ଅପରେଶନ ଜାରି କରିଛି।
