ନୂଆଦିଲ୍ଲୀ,୫।୫ରିଜର୍ଭ ବ୍ୟାଙ୍କ ଅଫ ଇଣ୍ଡିଆ (ଆରବିଆଇ) ଦ୍ୱାରା ପେଟିଏମ ପେମେଣ୍ଟ ବ୍ୟାଙ୍କ ଉପରେ ଲଗାଯାଇଥିବା ପ୍ରତିବନ୍ଧକ ପରେ ପେଟିଏମକୁ ଆଉ ଏକ ଝଟ୍କା ଲାଗିଛି। କମ୍ପାନୀର ସିଇଓ ତଥା ସଭାପତି ଭବେଶ ଗୁପ୍ତା ତାଙ୍କ ପଦରୁ ଇସ୍ତଫା ଦେଇଛନ୍ତି। ଭବେଶ ଆସନ୍ତା ୩୧ରେ ତାଙ୍କ ପଦ ଛାଡିବେ। ତାଙ୍କ ଇସ୍ତଫା କମ୍ପାନୀ ଗ୍ରହଣ କରିଛି। ଡିଜିଟାଲ ପେମେଣ୍ଟ ଏବଂ ଆର୍ଥିକ ସେବା କମ୍ପାନୀ ଏହାର ତ୍ରୈମାସିକ ଫଳାଫଳ ଘୋଷଣା କରିବା ପୂର୍ବରୁ ଏହି ଝଟ୍କା ଲାଗିଛି।
ଭବେଶ ତାଙ୍କ ନିଷ୍ପତ୍ତି ବିଷୟରେ ଏକ ଚିଠି ମାଧ୍ୟମରେ ସୂଚନା ଦେଇଛନ୍ତି। ବ୍ୟକ୍ତିଗତ କାରଣରୁ ସେ ନିଜ ପଦ ଛାଡିଛନ୍ତି ବୋଲି ସେ କହିଛନ୍ତି। ସେ ନିଜ କ୍ୟାରିୟରରେ ବିରତି ନେବାକୁ ଚାହୁଁଛନ୍ତି। ତେବେ କମ୍ପାନୀ ଛାଡିବା ପରେ ମଧ୍ୟ ସେ ପେଟିଏମକୁ ସାହାଯ୍ୟ କରିବା ପାଇଁ ସର୍ବଦା ଉପଲବ୍ଧ ରହିବେ। ପେଟିଏମର ଉଜ୍ଜ୍ୱଳ ଭବିଷ୍ୟତ ବିଷୟରେ ସେ ସମ୍ପୂର୍ଣ୍ଣ ଆତ୍ମବିଶ୍ୱାସ ପ୍ରକାଶ କରିଛନ୍ତି।
ପେଟିଏମର ଜାନୁଆରୀ-ମାର୍ଚ୍ଚ ତ୍ରୈମାସିକ ଫଳାଫଳ ଶୀଘ୍ର ଆସିବ। ପେଟିଏମ ପେମେଣ୍ଟ ବ୍ୟାଙ୍କ ବିରୋଧରେ ନିଆଯାଇଥିବା କାର୍ଯ୍ୟର ପ୍ରତିକୂଳ ପ୍ରଭାବ ଏହି ଫଳାଫଳ ଉପରେ ସ୍ପଷ୍ଟ ଦେଖାଯିବ ବୋଲି ବିଶ୍ୱାସ କରାଯାଏ। ଏହି କାର୍ଯ୍ୟ ଯୋଗୁ ପେଟିଏମ ବହୁତ କ୍ଷତି ସହିଛି। ଏହାର ଗ୍ରାହକ ମଧ୍ୟ ଯଥେଷ୍ଟ ହ୍ରାସ ପାଇଛନ୍ତି।
