ଭଞ୍ଜନଗର,୧୬ା୨(ବାବୁଲା ପ୍ରଧାନ): ଆସନ୍ତା ୧୮ରୁ ରାଜ୍ୟରେ ଯୁକ୍ତ ୨ ବାର୍ଷିକ ପରୀକ୍ଷା ହେବ। ତାହା ମାର୍ଚ୍ଚ ମାସ ଶେଷ ସପ୍ତାହ ପର୍ଯ୍ୟନ୍ତ ଚାଲିବ। ଏଥିସହ ମାଟ୍ରିକ୍ ପରୀକ୍ଷା ଆସନ୍ତା ୧୯ରୁ ଆରମ୍ଭ ହେଉଛି। ତାହା ମାର୍ଚ୍ଚ ୨ରେ ସରିବ।
ଏଥିସହ ବ୍ରହ୍ମପୁର ବିଶବିଦ୍ୟାଳୟ ଅଧୀନରେ ଯୁକ୍ତ ୩ର ବିଭିନ୍ନ ସେମିଷ୍ଟ୍ରାର ପରୀକ୍ଷା ବର୍ତ୍ତମାନ ଚାଲିଛି। ତାହା ଏପ୍ରିଲ ଶେଷ ପର୍ଯ୍ୟନ୍ତ ପର୍ଯ୍ୟାୟକ୍ରମେ ଚାଲିବ। ଏଥିସହ ସିବିଏସ୍ଇ ମାଟ୍ରିକ, ଯୁକ୍ତ ୨ ସମେତ ଅନ୍ୟାନ୍ୟ ପରୀକ୍ଷା ମଧ୍ୟ କିଛି ଦିନ ମଧ୍ୟରେ ହେବ। ତେଣୁ ଛାତ୍ରୀଛାତ୍ର ବର୍ତ୍ତମାନ ପାଠପଢ଼ା ପ୍ରତି ଧ୍ୟାନ ଦେଉଛନ୍ତି। ଏହିଭଳି ପରିସ୍ଥିତିରେ ବର୍ତ୍ତମାନ ବିଭିନ୍ନ ପୂଜା ପର୍ବ ସମେତ ବିବାହ ଋତୁ ଚାଲିଥିବା ଯୋଗୁ ଗାଁଠାରୁ ଆରମ୍ଭ କରି ସହର ପର୍ଯ୍ୟନ୍ତ ଚାରିଆଡ଼େ ଶଦ୍ଦ ପ୍ରଦୂଷଣ ହେଉଛି। ଏଥିସହ ବିଭିନ୍ନ ରିସର୍ଟ ଏବଂ ବିବାହ ମଣ୍ଡପଗୁଡ଼ିକରେ ମଧ୍ୟ ଆବଶ୍ୟକତାଠାରୁ ଅଧିକ ଶବ୍ଦରେ ମାଇକ ବାଜୁଛି। ରାସ୍ତାରେ ଯାଉଥିବା ଶୋଭାଯାତ୍ରାଧ୍ଗୁଡ଼ିକ ମଧ୍ୟ ବିନା ଅନୁମତିରେ ବାଣ ଫୁଟାଉଛନ୍ତି। ଡିଜେ ସାଉଣ୍ଡ ମଧ୍ୟ ଆହୁରି ଜଟିଳ ପରିସ୍ଥିତି କରୁଛି। ଘଣ୍ଟାଘଣ୍ଟା ଧରି ଶବ୍ଦ ପ୍ରଦୂଷଣ ହେବା ଚିନ୍ତାଜନକ ବିଷୟ।
ଏହାଦ୍ବାରା ଛାତ୍ରୀଛାତ୍ରଙ୍କ ପାଠପଢ଼ାରେ ବ୍ୟାଘାତ ହେଉଛି। ଯାହାକୁ ନେଇ ଅଭିଭାବକ ଏବଂ ଛାତ୍ରୀଛାତ୍ର ଚିନ୍ତା ପ୍ରକଟ କରିଛନ୍ତି। ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବା ପାଇଁ ଅଭିଭାବକମାନେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ନିବେଦନ କରିଛନ୍ତି। ଏନେଇ ଭଞ୍ଜନଗର କଲେଜ ରୋଡ୍ରେ ଥିବା ଅନ୍ବେଷା ହଷ୍ଟେଲ ଶିକ୍ଷା ବଞ୍ଚାଅ ଅଭିଭାବକ ସଂଘର ସଭାପତି ନିରାକାର ନାୟକଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ଶବ୍ଦ ପ୍ରଦୂଷଣ ଯୋଗୁ ଅନ୍ବେଷା ହଷ୍ଟେଲରେ ରହି ପାଠ ପଢୁଥିବା ଶତାଧିକ ଛାତ୍ରୀଛାତ୍ରଙ୍କ ପାଠପଢ଼ା ବ୍ୟାହତ ହେଉଛି। ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାକୁ ଦାବି କରିଛନ୍ତି।