ସାକ୍ଷୀଗୋପାଳ,୨୩ା୧୧(ଡି.ଏନ୍.ଏ.):ସୋମବାର ଅଁଳାନବମୀ ଉପଲକ୍ଷେ ସାକ୍ଷୀଗୋପାଳ ମନ୍ଦିରରେ ଶ୍ରୀରାଧାଙ୍କ ପାଦ ଦର୍ଶନ ନୀତି ଅନୁଷ୍ଠିତ ହେବ। ପାରମ୍ପରିକ ବେଶଭୂଷା ଓ ଗହଣାରେ ଲାଗି ହୋଇ ମା’ ରାଧାରାଣୀ ଓଡିଆଣୀ ବେଶରେ ସଜ୍ଜିତ ହେବେ। ରତ୍ନ ସିଂହାସନରେ ସାକ୍ଷୀଗୋପାଳ ଠାକୁର ନଟବର ବେଶରେ ଶୋଭା ପାଇବେ। କୋଭିଡ୍ କଟକଣା ଯୋଗୁ ଏଥର ଶ୍ରଦ୍ଧାଳୁମାନେ ରାଧାପାଦ ଦର୍ଶନ କରିପାରିବେ ନାହିଁ। ପ୍ରଶାସନ ପକ୍ଷରୁ ଚନ୍ଦନପୋଖରୀଠାରୁ ବକୁଳବନ ସିଦ୍ଧବକୁଳ ମନ୍ଦିର ପର୍ଯ୍ୟନ୍ତ ୧୪୪ ଧାରା ଜାରି କରାଯାଇଛି। ଏନେଇ ଡାକବାଜି ଯନ୍ତ୍ର ମାଧ୍ୟମରେ ପ୍ରଚାର କରାଯାଇଛି। ସେବାୟତ ସଂଘ ତତ୍ତ୍ୱାବଧାନରେ ପାଳିଆ ସେବାୟତମାନେ ଠାକୁରଙ୍କ ପୂଜା କରିବା ଲାଗି ବ୍ୟବସ୍ଥା ହୋଇଛି। ଶାନ୍ତଶୃଙ୍ଖଳା ପାଇଁ ପୋଲିସ ମୁତୟନ କରାଯାଇଛି। ସୋମବାରଠାରୁ ବୁଧବାର ପର୍ଯ୍ୟନ୍ତ ୧୪୪ ଧାରା ବଳବତ୍ତର ରହିବ। ଏକାଦଶୀ ଦିନ ଠାକୁରଙ୍କୁ ଅର୍ପଣ କରାଯାଉଥିବା ଚୁଡାଘଷା ଭୋଗ ଏବଂ ସଂକୀର୍ତ୍ତନ ମଣ୍ଡଳୀଙ୍କ ବେଢ଼ା ପରିକ୍ରମା କାର୍ଯ୍ୟକ୍ରମ ବାତିଲ କରାଯାଇଛି।
