ରାୟଗଡ଼ା ଅଫିସ,୨୨।୨: ରାୟଗଡା ଜିଲା ପରିଷଦ ସମ୍ମିଳନୀ କକ୍ଷରେ ପ୍ରାଣୀ ସମ୍ପଦ ବିକାଶ ବିଭାଗ ତରଫରୁ ମୁଖ୍ୟ ଜିଲା ପ୍ରାଣୀ ଚିକିତ୍ସା ଅଧିକାରୀ ହାଡିବନ୍ଧୁ ଭୋଇଙ୍କ ଆବାହକତ୍ୱରେ ଓ ଜିଲାପାଳ ସ୍ବଧା ଦେବ ସିଂଙ୍କ ଅଧ୍ୟକ୍ଷତାରେ ଜିଲାସ୍ତରୀୟ ଜୀବେ ନିଷ୍ଠୁରତା ଆଇନ ଓ ତାର କାର୍ଯ୍ୟକାରିତା ବିଷୟରେ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଏଥିରେ ସମସ୍ତ ଜିଲାସ୍ତରୀୟ ଅଧିକାରୀ, ଅତିରିକ୍ତ ଜିଲାପାଳ ଧର୍ମାନନ୍ଦ ବେହେରା, ଉପଖଣ୍ଡ ଆରକ୍ଷୀ ଅଧିକାରୀ ଦେବଜ୍ୟୋତି ଦାସ, ଉପଆରକ୍ଷୀ ଅଧିକ୍ଷକ ରାୟଗଡ଼, ନିର୍ବାହୀ ଅଧିକାରୀ ରାୟଗଡ଼ ପୌର ପରିଷଦ, ରାୟଗଡ଼, କଲ୍ୟାସିଂହପୁର, ବିଷମ କଟକ ଓ ରାମନାଗୁଡ଼ା ବ୍ଲକର ତହସିଲଦାର, ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀ ଏବଂ ଥାନା ଅଧିକାରୀ ତଥା ବିଭିନ୍ନ ସ୍କୁଲ ଏବଂ କଲେଜର ଶିକ୍ଷକ ଓ ପ୍ରାଧ୍ୟାପକମାନେ ଯୋଗ ଦେଇଥିଲେ। ଜିଲାପାଳ ରାୟଗଡାରେ ଗୋଶାଳା ନିର୍ମାଣ ଓ ସହରାଞ୍ଚଳରେ ବୁଲା କୁକୁରଙ୍କର ନିୟନ୍ତ୍ରଣ ପାଇଁ କାର୍ଯ୍ୟକ୍ରମ ଆରମ୍ଭ କରିବାକୁ ପରାମର୍ଶ ଦେଇଥିଲେ। ରାସ୍ତା ପାଶର୍ବରେ ଛେଳି ଓ ମେଣ୍ଢା ମାଂସକଟା ବନ୍ଦ ପାଇଁ ସଚେତନତା ସୃଷ୍ଠି କରିବାକୁ କହିଥିଲେ। ପୋଷା ଜୀବ, ଚଢ଼େଇ ବିକ୍ରି କରୁଥିବା ବ୍ୟବସାୟୀଙ୍କୁ ପଞ୍ଜିକରଣ କରିବା ପାଇଁ ପରାମର୍ଶ ଦେବାକୁ ପୌର ପରିଷଦ ଓ ପ୍ରାଣୀ ଚିକିତ୍ସା ବିଭାଗର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଗାଡ଼ିରେ ମାତ୍ରାଧିକ ସଂଖ୍ୟକ ଗୋରୁ, ଗାଈ, ଛେଳି ଓ ମେଣ୍ଢା ପରିବହନ ସମୟରେ ଦୃଷ୍ଟି ଗୋଚର ହେଲେ, ନିକଟସ୍ଥ ଥାନାରେ ଖବର ଦେବାକୁ ସମସ୍ତଙ୍କୁ ପରାମର୍ଶ ଦେଇଥିଲେ। ସେହିପରି ଗୋରୁ ହାଟ ଗୁଡ଼ିକରେ ଗାଈ ଗୋରୁଙ୍କର ସୁବିଧା ଦେଖିବା ପାଇଁ ତହସିଲଦାର ଏବଂ ଗୋଷ୍ଠି ପ୍ରାଣୀ ଚିକିତ୍ସା ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଜିଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ଭୋଇ କଲ୍ୟାସିଂହପୁର ବ୍ଲକରେ ୧୫୦ ଗୋରୁଙ୍କୁ ଆଶ୍ରୟ ଦେବା ପାଇଁ ଗୋଶାଳା ଦେବଗିରି ଆଶ୍ରମ ତରଫରୁ ନିର୍ମାଣ ଚାଲିଥିବା ଓ କୁକୁର ଜନ୍ମ ନିୟନ୍ତ୍ରଣ କାର୍ଯ୍ୟକ୍ରମ ଆରମ୍ଭ ହେଲେ ବିଭାଗ ତରଫରୁ ବୈଷୟିକ ସହାୟତା ଯୋଗାଇ ଦିଆଯିବ ବୋଲି ମତ ପ୍ରକାଶ କରିଥିଲେ। ଏହା ବ୍ୟତୀତ ରାମନାଗୁଡ଼ା, ବିଷମ କଟକ ଓ କଲ୍ୟାସିଂହପୁର ବ୍ଲକରେ ତିନୋଟି ବ୍ଲକ ସ୍ତରୀୟ ଜୀବେ ନିଷ୍ଠୁରତା ସଚେତନତା ଆଇନ ଶିବିର କରାଯିବାକୁ ଏବଂ ପାଲା ଦାସକାଠିଆ ଇତ୍ୟାଦି ମାଧ୍ୟମରେ ସଚେତନତା କରାଯିବ ବୋଲି ମତ ରଖିଥିଲେ।
