ବରଗଡ଼,୧୧ା୨(ପ୍ରେମାନନ୍ଦ ଖମାରୀ): ବରଗଡ଼ ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ଗ୍ରୀଣ୍ଡୋଲା ନିକଟରେ ପ୍ରବାହିତ ଜୀରାନଦୀ ଏବଂ ରାଞ୍ଜ ନଦୀର ସଂଯୋଗସ୍ଥଳୀ ଦୋ ମୁହାଣିରେ ନଦୀସ୍ଥ ଜଳ ସଂରକ୍ଷଣ ତଥା ଆନିକଟ୍(ଆଇଏସସ୍- ଇନ୍ ଷ୍ଟ୍ରିମ ଷ୍ଟୋରେଜ) ହେବ। ଏଥିପାଇଁ ବୁଧବାର ସର୍ଭେକ୍ଷଣ ସରିଛି। ବରଗଡ଼ ବିଧାୟକ ଅଶ୍ୱିନୀ ଷଡ଼ଙ୍ଗୀଙ୍କ ଉପସ୍ଥିତିରେ ହୋଇଥିବା ଏହି ସର୍ଭେକ୍ଷଣ ସମୟରେ ଗ୍ରୀଣ୍ଡୋଲା ଗ୍ରାମବାସୀଙ୍କ ସମେତ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ। ନଦୀରେ ଆନିକଟ୍ ହେବା ସହିତ ପୋଲ ନିର୍ମାଣ ହେବ ଏବଂ ଏହାଦ୍ୱାରା ପଡ଼ୋଶୀ ସୁବର୍ଣ୍ଣପୁର ଜିଲାକୁ ରାସ୍ତା ସଂଯୋଗ ହେବ ବୋଲି ଜାଣି ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରୀ ଦେଖିବାକୁ ମିଳିଥିଲା।
ସୂଚନାନୁଯାୟୀ, ନୂଆ ସରକାର ଆସିବା ପରେ ବରଗଡ଼ ସହର ଉପକଣ୍ଠରେ ବହି ଯାଇଥିବା ଜୀରାଦୀରେ ଏକ ଆନିକଟ୍ ହେବା ପ୍ରକ୍ରିୟା ଆରମ୍ଭ ହୋଇ ଯାଇଛି। ତେବେ ଗତ ଧନୁଯାତ୍ରା ମହୋତ୍ସବ ସମୟରେ ରାଜ ଅତିଥି ଭାବେ ଯୋଗ ଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଜୀରାନଦୀରେ ଗ୍ରୀଣ୍ଡୋଲା ଗ୍ରାମ ନିକଟରେ ଆଉ ଏକ ଆନିକଟ୍ ହେବ ବୋଲି ଘୋଷଣା କରିଥିଲେ। ଏହାପରେ ଉକ୍ତ ଗ୍ରାମ ସନ୍ନିକଟରେ ବହି ଯାଇଥବା ଜୀରାନଦୀର କେଉଁଠି ଆନିକଟ୍ ନିର୍ମାଣ କରାଯିବ, ତାକୁ ନେଇ ସ୍ଥାନୀୟ ବିଧାୟକ ଏବଂ ଗ୍ରାମବାସୀଙ୍କ ମଧ୍ୟରେ ଆଲୋଚନା ଚାଲିଥିଲା। ଏହି କ୍ରମରେ ବୁଧବାର ସକାଳୁ ବରଗଡ଼ ବିଧାୟକ ଷଡ଼ଙ୍ଗୀ ଗ୍ରୀଣ୍ଡୋଲା ଗ୍ରାମକୁ ଗସ୍ତ କରିଥିଲେ ଏବଂ ଗ୍ରାମବାସୀ ଓ ବିଭାଗୀୟ ଅଧିକାରୀଙ୍କ ଉପସ୍ଥିତିରେ ଆନିକଟ୍ ନିର୍ମାଣ ପାଇଁ ସ୍ଥାନ ନିରୂପଣ କରିଥିଲେ। ତେବେ ଗ୍ରୀଣ୍ଡୋଲା ଗ୍ରାମ ନିକଟରେ ପ୍ରବାହିତ ଜୀରାନଦୀ ଏବଂ ରାଞ୍ଜ ନଦୀର ମିଳନ ସ୍ଥଳୀରେ ଆନିକଟ ନିର୍ମାଣ ପାଇଁ ସମସ୍ତେ ସହମତି ପ୍ରକାଶ କରିଥିଲେ। ଏହାପରେ ଉପସ୍ଥିତ ଅଧିକାରୀବୃନ୍ଦ ସେଠାରେ ଡିପିଆର ପ୍ରସ୍ତୁତ ଆରମ୍ଭ କରିଥିଲେ।
ତେବେ ଏ ସମ୍ପର୍କରେ ବରଗଡ଼ ବିଧାୟକ ଷଡ଼ଙ୍ଗୀ କହିଛନ୍ତି, ଧନୁଯାତ୍ରାରେ ରାଜ ଅତିଥି ଭାବେ ଯୋଗ ଦେବା ସମୟରେ କଂସ ମହାରାଜଙ୍କ ନିର୍ଦ୍ଦେଶକ୍ରମେ ମୁଖ୍ୟମନ୍ତ୍ରୀ ଗ୍ରୀଣ୍ଡୋଲାଠାରେ ଜୀରାନଦୀ ଉପରେ ଆଉଏକ ଆନିକଟ୍(ଆଇଏସସ୍) ପାଇଁ ଘୋଷଣା କରିଥିଲେ। ଏହି ପରିପ୍ରେକ୍ଷୀରେ ଗ୍ରାମବାସୀଙ୍କ ଉପସ୍ଥିତିରେ ସ୍ପଟ ଭିଜିଟ୍ କରି ସର୍ଭେକାର୍ଯ୍ୟ ହୋଇଥିଲା। ତେବେ ସମସ୍ତଙ୍କ ସହମତିକ୍ରମେ ଆନିକଟ୍ ନିର୍ମାଣ ପାଇଁ ଏଭଳି ଏକ ସ୍ଥାନ ନିରୂପିତ ହୋଇଛି, ଯାହାକି ୨ ନଦୀର ସଙ୍ଗମସ୍ଥଳୀ। ସମ୍ପୃକ୍ତ ସ୍ଥାନର ଗୋଟିଏ ପାର୍ଶ୍ୱରେ ଅତାବିରା ନିର୍ବାଚନ ମଣ୍ଡଳୀର ଭେଡ଼େନ ବ୍ଲକ ତ ଆଉଏକ ପାର୍ଶ୍ୱରେ ବିଜେପୁର ନିର୍ବାଚନ ମଣ୍ଡଳୀ, ଏପରିକି ନିକଟରେ ସୁବର୍ଣ୍ଣପୁର ଜିଲା ରହିଛି। ଏଠାରେ ଆନିକଟ୍ ହେବା ଦ୍ୱାରା କେବଳ ପର୍ଯ୍ୟଟନ ବୃଦ୍ଧି ପାଇବ ତାହା ନୁହେଁ, ଏକ ବ୍ରିଜ ହେବ ଏବଂ ଅଞ୍ଚଳବାସୀଙ୍କ ପାଇଁ ଅତାବିରା, ବିଜେପୁର ନିର୍ବାଚନ ମଣ୍ଡଳୀ ସହିତ ପଡ଼ୋଶୀ ଛତିଶଗଡ଼କୁ ଯାତାୟାତ ପଥ ସୁଗମ ହେବ।
ସେହିପରି ଗୋଟିଏ ପଟେ ଗ୍ରୀଣ୍ଡୋଲାର ସିଦ୍ଧେଶ୍ୱର ବାବାଙ୍କ ମନ୍ଦିର ଏବଂ ଅନ୍ୟପଟେ ବରିକେଲ ପର୍ଯ୍ୟଟନ ପୀଠ ରହିଛି। ବୋଟିଂ ବ୍ୟବସ୍ଥା ମଧ୍ୟ ହେବ। ଏହି ଦୃଷ୍ଟିରୁ ଏଠାରେ ଆନିକଟ୍ ସହିତ ବ୍ରିଜ ମଧ୍ୟ ହେବ ଏବଂ ଏହି ସ୍ଥାନ ଏକ ପ୍ରସିଦ୍ଧ ପର୍ଯ୍ୟଟନସ୍ଥଳୀ ପାଲଟିବ। ସେହିପର ସ୍ଥାନୀୟ ସମିତିସଭ୍ୟା ଯାମିନୀ ପ୍ରଧାନ କହିଛନ୍ତି, ବରଗଡ଼ ବିଧାୟକଙ୍କ ଉଦ୍ୟମରୁ ଆନିକଟ୍ ହେବ। ଆମ ଅଞ୍ଚଳ ଏକ ପର୍ଯ୍ୟଟନସ୍ଥଳୀ ପାଲଟିବ। ରାସ୍ତାଘାଟ ମଧ୍ୟ ଭଲ ହେବ। ଏହି ଆନିକଟ ଦ୍ୱାରା ୩ ବିଧାନସଭା ନିର୍ବାଚନ ମଣ୍ଡଳୀର ସଂଯୋଗ ହେବ ଏବଂ ପଡ଼ୋଶୀ ସୁବର୍ଣ୍ଣପୁର ଜିଲାକୁ ମଧ୍ୟ ସଂଯୋଗ ହେବ। ଏହା ଉପଲବ୍ଧି କରି ଖୁସି ଲାଗୁଛି।
