ନୂଆଦିଲ୍ଲୀ,୨୩।୬: ଆନ୍ଧ୍ରପ୍ରଦେଶର ପଶ୍ଚିମ ଗୋଦାବରୀ ଜିଲାର ପାଲାକୋଲ୍ଲୁରୁ ଜଣେ ୨୩ ବର୍ଷୀୟା ଯୁବତୀ ଡାଙ୍ଗେଟି ଜାହ୍ନବୀ ୨୦୨୯ ମସିହାରେ ମହାକାଶ ଯାତ୍ରା କରି ଇତିହାସ ରଚିବାକୁ ଯାଉଛନ୍ତି। ନାସାର ପ୍ରତିଷ୍ଠିତ ଇଣ୍ଟରନାସନାଲ ଏୟାର ଆଣ୍ଡ ସ୍ପେସ ପ୍ରୋଗ୍ରାମ (ଆଇଏସପି) ସଫଳତାପୂର୍ବକ ସମାପ୍ତ କରିଥିବା ପ୍ରଥମ ଭାରତୀୟ ଭାବେ ଜାହ୍ନବୀ ଗୌରବ ଅର୍ଜନ କରିଛନ୍ତି। ସେ ଆମେରିକା ଆଧାରିତ ଟାଇଟାନ୍ସ ଅର୍ବିଟାଲ ପୋର୍ଟ ସ୍ପେସ ଷ୍ଟେସନକୁ ଯାତ୍ରା କରିବେ, ଯାହା ଆଗାମୀ ଚାରି ବର୍ଷ ମଧ୍ୟରେ ଉଦ୍ଘାଟିତ ହେବ।
ଜାହ୍ନବୀଙ୍କ ମହାକାଶ ଯାତ୍ରାର ସ୍ୱପ୍ନ ପାଲାକୋଲ୍ଲୁରେ ଆରମ୍ଭ ହୋଇଥିଲା, ଯେଉଁଠି ସେ ରାତ୍ରି ଆକାଶରେ ତାରାମାନଙ୍କୁ ଦେଖି ନିଜ ଭବିଷ୍ୟତ କଳ୍ପନା କରୁଥିଲେ। ପଞ୍ଜାବର ଲଭ୍ଲି ପ୍ରଫେସନାଲ ୟୁନିଭର୍ସିଟିରୁ ଇଲେକ୍ଟ୍ରୋନିକ୍ସ ଆଣ୍ଡ କମ୍ୟୁନିକେସନ ଇଂଜିନିୟରିଂରେ ସ୍ନାତକ ଡିଗ୍ରୀ ହାସଲ କରିଥିବା ଜାହ୍ନବୀ ଏକ ଉଜ୍ଜ୍ୱଳ ଛାତ୍ରୀ ଥିଲେ। ତାଙ୍କ ବାପା ଶ୍ରୀନିବାସ ଓ ମାଆ ପଦ୍ମଶ୍ରୀ ବର୍ତ୍ତମାନ କୁଏତରେ କାର୍ଯ୍ୟରତ। ନିଜର ଅଦମ୍ୟ ଇଚ୍ଛାଶକ୍ତି ଓ ପରିଶ୍ରମ ବଳରେ ଜାହ୍ନବୀ ମହାକାଶ ବିଜ୍ଞାନ କ୍ଷେତ୍ରରେ ଏକ ନୂଆ ମାଇଲଖୁଣ୍ଟ ସ୍ଥାପନ କରିଛନ୍ତି।
ଜାହ୍ନବୀ ଜଣେ ଉତ୍ସାହୀ ଷ୍ଟେମ (ସାଇନ୍ସ, ଟେକ୍ନୋଲୋଜି, ଇଂଜିନିୟରିଂ ଆଣ୍ଡ ମ୍ୟାଥେମାଟିକ୍ସ) ପ୍ରଚାରକ। ସେ ଇସରୋର ଶିକ୍ଷା କାର୍ଯ୍ୟକ୍ରମରେ ବକ୍ତବ୍ୟ ଦେଇଛନ୍ତି ଏବଂ ଦେଶର ନ୍ୟାସନାଲ ଇନଷ୍ଟିଚ୍ୟୁଟ ଅଫ ଟେକ୍ନୋଲୋଜି (ଏନଆଇଟି) ଭଳି ପ୍ରମୁଖ ଅନୁଷ୍ଠାନରେ ଛାତ୍ରଛାତ୍ରୀଙ୍କୁ ସମ୍ବୋଧିତ କରିଛନ। ଏହା ବ୍ୟତୀତ, ସେ ଆନାଲଗ ମିଶନ, ଗଭୀର ସମୁଦ୍ର ଡାଇଭିଂ, ଏବଂ ଗ୍ରହ ବିଜ୍ଞାନ ଓ ଦୀର୍ଘମିଆଦୀ ମହାକାଶ ଯାତ୍ରାର ସ୍ଥିରତା ସମ୍ବନ୍ଧୀୟ ବିଶ୍ୱ ସମ୍ମେଳନରେ ନିୟମିତ ଅଂଶଗ୍ରହଣ କରନ୍ତି। ତାଙ୍କ ଏହି ପ୍ରୟାସା ଭାରତରେ ମହାକାଶ ଶିକ୍ଷା ଓ ଗବେଷଣାକୁ ପ୍ରୋତ୍ସାହନ ଦେଉଛି।
୨୦୨୯ରେ ହେବାକୁ ଥିବା ଟାଇଟାନ୍ସ ସ୍ପେସ ଅର୍ବିଟାଲ ଫ୍ଲାଇଟ ଏକ ପାଞ୍ଚ ଘଣ୍ଟାର ମିଶନ, ଯାହା ବୈଜ୍ଞାନିକ ଗବେଷଣା ଓ ମାନବ ମହାକାଶ ଯାତ୍ରାର ଅଗ୍ରଗତି ପାଇଁ ଏକ ଅନନ୍ୟ ପ୍ଲାଟଫର୍ମ ପ୍ରଦାନ କରିବ। ଜାହ୍ନବୀ ଏହି ମିଶନରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବେ ଏବଂ ମାନବଜାତିର ଆନ୍ତଃଗ୍ରହ ଭବିଷ୍ୟତ ଗଠନରେ ଯୋଗଦାନ ଦେବେ।
