ନୀଳଗିରି, ୪।୯(ପ୍ରଶାନ୍ତ ବିଶ୍ୱାଳ): ବାଲେଶ୍ୱର ଜିଲା ନୀଳଗିରି ଉପଖଣ୍ଡ ଅଞ୍ଚଳରେ ବିଭିନ୍ନ ସମୟରେ ହନୁମାନ ପଇସା କାରବାର ହୋଇଆସୁଥିବା ବେଳେ ଗୁରୁବାର ନକଲି ସୁନା ଇଟା କାରବାର ଘଟଣା ସାମ୍ନାକୁ ଆସିଛି। ଜଣେ ଯୁବକ ଅତି ଚତୁରତାର ସହ ପିତ୍ତଳକୁ ତରଳାଇ ଇଟା ଆକୃତି କରି ତା’ ଉପରେ ସୁନାର ଗୁଣ୍ଡ ପକାଇ ଫିନିଶିଂ କରି ପିତ୍ତଳ ଇଟାର ମଝିରେ ମଝିରେ ଛୋଟ ଛୋଟ ହୋଲ୍ କରି ତା ଭିତରେ କିଛି ସୁନା ଗୁଣ୍ଡ ପକାଇ ଲେଭଲ୍ କରିଥିଲେ। ଯେଉଁ ବ୍ୟକ୍ତି ଏହାକୁ କିଣିବା ପାଇଁ ଆସନ୍ତି, ସେ ଅତି ଚତୁରତାର ସହ ହୋଲ୍ କରିଥିବା ସ୍ଥାନରେ ଗ୍ରାଇଡ଼ିଂ କରି ଅସଲି ସୁନାକୁ ଦେଖାଇ ବେପାର କରିଆସୁଥିଲେ। ମାତ୍ର କ୍ରେତା ଜଣକ ୧୬ ଲକ୍ଷ ଟଙ୍କାରେ ଏହି ଇଟାକୁ କିଣି ବିସ୍କୁଟ ଆକାରରେ କାଟିଥିଲେ। ପରେ ଏହା ନକଲି ବୋଲି ଜଣାପଡ଼ିଥିଲା। ତେବେ ଏନେଇ ଗତ ଅଗଷ୍ଟ ୧ ତାରିଖରେ ଗଞ୍ଜାମ ବ୍ରହ୍ମପୁର ଅଞ୍ଚଳର କୃଷ୍ଣ ନାୟକ ଏ ସମ୍ପର୍କରେ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ. ୧୧୨/୨୫) ରୁଜୁ କରି ଖୋଳତାଡ଼ ଆରମ୍ଭ କରିଥିଲା। ଏହି ନକଲି ସୁନା ଇଟା କାରବାର ପଛରେ ଏକ ର଼୍ୟାକେଟ୍ ଥିବାର ପୋଲିସ୍ ତଦନ୍ତରୁ ଜାଣିପାରିଥିଲା।
ନୀଳଗିରିରୁ କେନ୍ଦ୍ରାପଡ଼ା ପର୍ଯ୍ୟନ୍ତ ଏହାର ଚେର ଲମ୍ବିଥିବା ଜଣାପଡ଼ିଛି। ଶେଷରେ ଗୁରୁବାର ନୀଳଗିରି ସହରର ମୁଖ୍ୟ ଅଭିଯୁକ୍ତଙ୍କୁ ଶେରଗଡ଼ ଟୋଲ ଗେଟ ନିକଟରେ ପୋଲିସ କାବୁ କରିଥିଲା। ମୁଖ୍ୟ ଅଭିଯୁକ୍ତଙ୍କୁ ଗିରଫ କଲା ପରେ ତାଙ୍କ ଘର ବାହାରେ ଏକ ସ୍ଥାନରେ ଗାତ କରି ପୋତିଥିବା ନକଲି ସୁନା ଇଟାକୁ ପୋଲିସ ଜବତ କରିଛି। ଏହି ଘଟଣାରେ ପୋଲିସ ଅନ୍ୟ ଜଣେ ଅଭିଯୁକ୍ତଙ୍କୁ କେନ୍ଦ୍ରାପଡ଼ା ଅଞ୍ଚଳରୁ ଗିରଫ କରିଛି। ଏହି କାରବାରରେ ଅନ୍ୟ ୫ ଜଣ ଯୁବକଙ୍କ ସମ୍ପୃକ୍ତି ରହିଥିବା ବେଳେ ଖୁବ୍ ଶୀଘ୍ର ସେମାନଙ୍କୁ ଗିରଫ କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ସୂଚନା ଯେ, ଗତ ଅଗଷ୍ଟ ୧୫ତାରିଖରେ ମୟୂରଭଞ୍ଜ ଜିଲା କପ୍ତିପଦା ଅଞ୍ଚଳରେ ଏହି ସୁନା ଇଟା କାରବାର ନେଇ ବ୍ୟବସାୟୀଙ୍କ ସହ କ୍ରେତା ଜଣଙ୍କର ଡିଲ୍ ହୋଇଥିଲା।