ଭୁବନେଶ୍ୱର,୭।୫ (ସ୍ପୋଟର୍ସ ବ୍ୟୁରୋ): ୬୨ତମ ଜାତୀୟ ପୁରୁଷ ସିନିୟର ଆନ୍ତଃଜିଲା ଫୁଟ୍ବଲ ଚାମ୍ପିୟନଶିପ୍ ସାହାଣୀ କପ୍ର କ୍ୱାର୍ଟରଫାଇନାଲ ଲିଗ୍ ପର୍ଯ୍ୟାୟରେ ଶନିବାର ଖେଳାଯାଇଥିବା ଦୁଇଟି ମ୍ୟାଚରେ କଟକ ଓ କନ୍ଧମାଳ ସେମାନଙ୍କ ମ୍ୟାଚରେ ସହଜ ବିଜୟ ହାସଲ କରିଛନ୍ତି। ଭୁବନେଶ୍ୱରସ୍ଥିତ କ୍ୟାପିଟାଲ ଫୁଟ୍ବଲ ଆରେନାଠାରେ ଅନୁଷ୍ଠିତ ମ୍ୟାଚରେ କଟକ ୪-୦ ଗୋଲରେ ରାଉରକେଲା ଷ୍ଟିଲ୍ ପ୍ଲାଣ୍ଟ (ଆରଏସ୍ପି)କୁ ହରାଇ ଦେଇଛି। ଦଳ ପକ୍ଷରୁ ପ୍ରକାଶ ନାୟକ ହ୍ୟାଟ୍ରିକ୍ ଗୋଲ୍ (୪୫ତମ, ୬୬ତମ, ୭୩ତମ ମିନିଟ) ସ୍କୋର କରିଥିବା ବେଳେ ଦୀନବନ୍ଧୁ ଦାସ ୩୩ତମ ମିନିଟରେ ଦଳ ପକ୍ଷରୁ ପ୍ରଥମ ଗୋଲ ଦେଇଥିଲେ।
ଶିବଶଙ୍କର ପଣ୍ଡା, ଚନ୍ଦ୍ରକାନ୍ତ ବାରିକ, ଦୁର୍ଗା ମାଧବ ଆଚାର୍ଯ୍ୟ ଓ ଦେବରାଜ ସ୍ବାଇଁ ମ୍ୟାଚ ଅଫିସିଆଲ ଦାୟିତ୍ୱ ତୁଲାଇଥିବା ବେଳେ ଦୁର୍ଗାମାଧବ ନାୟକ ମ୍ୟାଚ କମିଶନର ରହିଥିଲେ। କଟକସ୍ଥିତ ଓଟିଏମ୍ ଗ୍ରାଉଣ୍ଡରେ ଖୋର୍ଦ୍ଧା ବିପକ୍ଷରେ କନ୍ଧମାଳ ୩-୦ ଗୋଲ୍ରେ ବିଜୟୀ ହୋଇଛି। ଦଳ ପକ୍ଷରୁ ସଞ୍ଜୀବ ଓରାମ (୩୨ତମ ମିନିଟ), ରମେଶ ଓରାମ (୪୦ତମ) ଓ ରାହୁଲ ମୁଖୀ (୭୨ତମ) ଗୋଟିଏ ଲେଖାଏଁ ଗୋଲ ଦେଇଥିଲେ। ଏଥିରେ ଶ୍ରୀକାନ୍ତ ବହିଦାର, ସୁବ୍ରତ ପୁରୋହିତ, ବିପୁଲ ବିଦ୍ୟାଧର ଓ ଶଶିକାନ୍ତ ଦାସିଆ ମ୍ୟାଚ ଅଫିସିଆଲ ଏବଂ ଯୁଗଳ କିଶୋର ଦାସ ମ୍ୟାଚ କମିଶନର ଦାୟିତ୍ୱ ତୁଲାଇଥିଲେ।
