ନୂଆଦିଲ୍ଲୀ,୩୦।୧୦ : ବର୍ତ୍ତମାନ ଟାଟା କମ୍ପାନୀର ପୁଞ୍ଜି ବିନିଯୋଗକୁ ନେଇ ଗୁଜୁରାଟ ଏବଂ ମହାରାଷ୍ଟ୍ର ମୁହାଁମୁହିଁ ହୋଇଛନ୍ତି। ଏଭଳି ପରିସ୍ଥିତିରେ କେନ୍ଦ୍ର ମନ୍ତ୍ରୀ ନୀତିନ ଗଡକରୀଙ୍କ ଏକ ଚିଠି ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଚିଠି ସେ ଟାଟା ଗ୍ରୁପକୁ ଲେଖିଛନ୍ତି। ଭିତ୍ତିଭୂମି, ଜମି ଉପଲବ୍ଧତା ଏବଂ ଯୋଗାଯୋଗ ବ୍ୟବସ୍ଥାକୁ ଦର୍ଶାଇ ସେ ଟାଟା ଗ୍ରୁପ୍କୁ ନାଗପୁରରେ ବିନିଯୋଗ କରିବାକୁ ଅନୁରୋଧ କରିଛନ୍ତି। ସେ ଲେଖିଛନ୍ତି ନାଗପୁରରେ କମ୍ପାନୀକୁ ସ୍ବାଗତ। ସୂଚନାଯୋଗ୍ୟ ଯେ ନିକଟରେ ଦୁଇଟି ମେଗା ପ୍ରକଳ୍ପ ମହାରାଷ୍ଟ୍ରରୁ ଗୁଜରାଟକୁ ସ୍ଥାନାନ୍ତରିତ ହୋଇଛି। ଏହା ପରେ ରାଜନୈତିକ ଆରୋପ ପ୍ରତ୍ୟାରୋପ ଜାରି ରହିଛି।
କୁହାଯାଉଛି ଯେ ଗଡକରୀ ଅକ୍ଟୋବର ୭ରେ ଟାଟା ସନ୍ସ ଚେୟାରମ୍ୟାନ ଏନ ଚନ୍ଦ୍ରଶେଖରନଙ୍କୁ ଏହି ଚିଠି ଲେଖିଛନ୍ତି। ଏଥିରେ ସେ ଲେଖିଛନ୍ତି ଯେ ଇସ୍ପାତ, ଅଟୋ, ଉପଭୋକ୍ତା ଉତ୍ପାଦ, ଆଇଟି ସେବା ଏବଂ ବିମାନ ଚଳାଚଳ ଭଳି ବ୍ୟବସାୟରେ କାର୍ଯ୍ୟ କରୁଥିବା କମ୍ପାନୀଗୁଡିକ ନାଗପୁରରେ ବିନିଯୋଗ କରିପାରିବେ। ଏଠାରେ ଜମିର ଅଭାବ ନାହିଁ। ଆଗକୁ ଗୁଜରାଟରେ ବିଧାନସଭା ନିର୍ବାଚନ ହେବାକୁ ଯାଉଥିବାବେଳେ ଏବେ ଏହି ଚିଠିକୁ ନେଇ ଦୁଇ ରାଜ୍ୟର ରାଜନୈତିକସ୍ତରରେ ଉଷ୍ଣତା ବୃଦ୍ଧି ପାଇଛି।
