ନୂଆଦିଲ୍ଲୀ, ୨।୫: ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଏହି ପରିପ୍ରେକ୍ଷୀରେ ଆମେରିକା ଭାରତକୁ ୧୩୧ ନିୟୁତ ଡଲାର ମୂଲ୍ୟର ସାମରିକ ସାମଗ୍ରୀ ଓ ଲଜିଷ୍ଟିକ ସମର୍ଥନ ଯୋଗାଇବା ପାଇଁ ଏକ ବୈଦେଶିକ ସାମରିକ ବିକ୍ରୟକୁ ଅନୁମୋଦନ କରିଛି। ଏହି ସାମଗ୍ରୀ ହିନ୍ଦ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଭାରତର ସାମୁଦ୍ରିକ ସୁରକ୍ଷା କ୍ଷମତାକୁ ବୃଦ୍ଧି କରିବ।
ଆମେରିକୀୟ ସରକାରଙ୍କ ଅନୁଯାୟୀ, “ବିଦେଶ ବିଭାଗ ହିନ୍ଦ-ପ୍ରଶାନ୍ତ ମହାସାଗରୀୟ ସାମୁଦ୍ରିକ ଡୋମେନ ସଚେତନତା ଏବଂ ସମ୍ବନ୍ଧୀୟ ସାମଗ୍ରୀ ପାଇଁ ୧୩୧ ନିୟୁତ ଡଲାର ମୂଲ୍ୟର ବିକ୍ରୟକୁ ଅନୁମୋଦନ କରିଛି।” ଏହି ପ୍ରସ୍ତାବିତ ବିକ୍ରୟ ଆମେରିକାର ବୈଦେଶିକ ନୀତି ଏବଂ ଜାତୀୟ ସୁରକ୍ଷା ଲକ୍ଷ୍ୟକୁ ସମର୍ଥନ କରିବ ଏବଂ ଭାରତ-ଆମେରିକା ରଣନୈତିକ ସମ୍ପର୍କକୁ ମଜବୁତ କରିବ। ଏହା ହିନ୍ଦ-ପ୍ରଶାନ୍ତ ଏବଂ ଦକ୍ଷିଣ ଏସିଆ ଅଞ୍ଚଳରେ ରାଜନୈତିକ ସ୍ଥିରତା, ଶାନ୍ତି ଓ ଅର୍ଥନୈତିକ ପ୍ରଗତି ପାଇଁ ଭାରତର ଭୂମିକାକୁ ଆହୁରି ଶକ୍ତିଶାଳୀ କରିବ।
ଏହି ଅନୁମୋଦନ ଏପରି ସମୟରେ ଆସିଛି ଯେତେବେଳେ ଆମେରିକା ଉଭୟ ଭାରତ ଓ ପାକିସ୍ତାନକୁ ଉତ୍ତେଜନା ହ୍ରାସ କରିବାକୁ ଅନୁରୋଧ କରିଛି। ପହଲଗାମ ଆକ୍ରମଣ, ଯେଉଁଥିରେ ୨୬ ଜଣଙ୍କର ମୃତ୍ୟୁ ଘଟିଥିଲା, ତାହା ଦୁଇ ଦେଶ ମଧ୍ୟରେ ସଂଘର୍ଷକୁ ଆହୁରି ତୀବ୍ର କରିଛି। ଆମେରିକୀୟ ଉପ-ରାଷ୍ଟ୍ରପତି ଜେ.ଡି. ଭାନ୍ସ ଭାରତକୁ ଏକ ସଂଯମୀ ପ୍ରତିକ୍ରିୟା ପ୍ରଦର୍ଶନ କରିବାକୁ ଏବଂ ପାକିସ୍ତାନକୁ ଆତଙ୍କବାଦ ବିରୋଧରେ ସହଯୋଗ କରିବାକୁ ପରାମର୍ଶ ଦେଇଛନ୍ତି। ଏହି ସାମରିକ ସହାୟତା ଭାରତର ନୌସେନାକୁ ଉନ୍ନତ କରିବ ଏବଂ ଚୀନର ପ୍ରଭାବକୁ ମୁକାବିଲା କରିବା ପାଇଁ ହିନ୍ଦ-ପ୍ରଶାନ୍ତ ଅଞ୍ଚଳରେ ଭାରତର ରଣନୈତିକ ସ୍ଥିତିକୁ ମଜବୁତ କରିବ।
ପହଲଗାମ ଆତଙ୍କବାଦୀ ଆକ୍ରମଣକୁ ନେଇ ପାକିସ୍ତାନକୁ ସମର୍ଥନ ଘୋଷଣା କରିଛି ଚାଇନା। ଅନ୍ୟପକ୍ଷରେ, ଭାରତ ଓ ପାକିସ୍ତାନ ମଧ୍ୟରେ ବୃଦ୍ଧି ପାଉଥିବା ବିବାଦ ମଧ୍ୟରେ ଆମେରିକାର ପ୍ରତିରକ୍ଷା ମନ୍ତ୍ରୀ ପିଟ ହେଗସେଥ ଭାରତୀୟ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସହ ଫୋନରେ ଆଲୋଚନା କରି କହିଛନ୍ତି ଯେ, ତାଙ୍କ ଦେଶ ଭାରତର ଆତ୍ମରକ୍ଷା ଅଧିକାର ଏବଂ ଆତଙ୍କବାଦ ବିରୋଧରେ ଲଢ଼େଇକୁ ସମର୍ଥନ କରୁଛି। ରାଜନାଥ ସିଂ ହେଗସେଥଙ୍କୁ କହିଛନ୍ତି ଯେ ପାକିସ୍ତାନ ଏକ ଆତଙ୍କବାଦୀ ଦେଶ ଭାବେ ପ୍ରମାଣିତ ହୋଇଛି, ଯିଏ ବିଶ୍ୱବ୍ୟାପୀ ଆତଙ୍କବାଦକୁ ପ୍ରୋତ୍ସାହନ ଦେଉଛି ଏବଂ ଅଞ୍ଚଳକୁ ଅସ୍ଥିର କରୁଛି। ବିଶ୍ୱ ଏବେ ଆତଙ୍କବାଦ ପ୍ରତି ଆଖି ବନ୍ଦ କରି ରହିପାରିବ ନାହିଁ।
ରାଜନାଥ ସିଂଙ୍କ କାର୍ଯ୍ୟାଳୟ ସୋସିଆଲ ମିଡିଆରେ ଏକ ପୋଷ୍ଟରେ କହିଛି, ଆମେରିକା ଭାରତ ସହ ଏକତା ସହ ଠିଆ ହୋଇଛି ଏବଂ ଭାରତର ଆତ୍ମରକ୍ଷା ଅଧିକାରକୁ ସମର୍ଥନ କରୁଛି। ଏଥିରେ କୁହାଯାଇଛି ଯେ ହେଗସେଥ ଆତଙ୍କବାଦ ବିରୋଧରେ ଭାରତର ଲଢ଼େଇରେ ଆମେରିକୀୟ ସରକାରଙ୍କ ଦୃଢ଼ ସମର୍ଥନକୁ ପୁନର୍ବାର ଦୋହରାଇଛନ୍ତି। ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଜାରି ବିବୃତିରେ କୁହାଯାଇଛି ଯେ, ରାଜନାଥ ସିଂ ଆମେରିକୀୟ ପ୍ରତିରକ୍ଷା ମନ୍ତ୍ରୀଙ୍କୁ କହିଛନ୍ତି ଯେ ପାକିସ୍ତାନର ଆତଙ୍କବାଦୀ ସଂଗଠନମାନଙ୍କୁ ସମର୍ଥନ, ପ୍ରଶିକ୍ଷଣ ଏବଂ ଆର୍ଥିକ ସହାୟତା ପ୍ରଦାନର ଇତିହାସ ରହିଛି। ବିଶ୍ୱ ସମୁଦାୟ ପାଇଁ ଏହା ଗୁରୁତ୍ୱପୂର୍ଣ୍ଣ ଯେ ଆତଙ୍କବାଦର ଏଭଳି ନୃଶଂସ କାର୍ଯ୍ୟର ସ୍ପଷ୍ଟ ଭାବେ ଏବଂ ଏକ ସ୍ୱରରେ ନିନ୍ଦା କରାଯାଉ ଓ ବିରୋଧ କରାଯାଉ।
ଗୁରୁବାର ପାକିସ୍ତାନର ରାଜଧାନୀ ଇସଲାମାବାଦରେ ଶେହବାଜ ଶରିଫଙ୍କ ସହ ଚାଇନା ରାଜଦୂତ ଜିୟାଙ୍ଗ ଜେଡୋଙ୍ଗଙ୍କ ସାକ୍ଷାତ ହୋଇଥିଲା। ଏହି ସମୟରେ ଚାଇନା ପାକିସ୍ତାନକୁ ସମର୍ଥନ କରିବା କଥା କହିଛି। ଏହା ପୂର୍ବରୁ ମଧ୍ୟ ଶେହବାଜ ଶରିଫଙ୍କ ବୟାନକୁ ସମର୍ଥନ କରି ଚାଇନା ପହଲଗାମ ଆକ୍ରମଣର ସ୍ୱାଧୀନ ତଦନ୍ତକୁ ସମର୍ଥନ କରିଥିଲା। ଚାଇନା ସର୍ବଦା ପାକିସ୍ତାନୀ ଆତଙ୍କବାଦୀମାନଙ୍କୁ ସୁରକ୍ଷା ଦେଇ ଆସୁଛି।
