ବାଙ୍ଗାଲୋର,୧୬।୭: ଆସନ୍ତା ସପ୍ତାହରୁ ଆମାଜନ ପ୍ଲାଟ୍ଫର୍ମରେ ସାମଗ୍ରୀର ଉତ୍ପତ୍ତିସ୍ଥଳ କେଉଁଠି ତାହା ଗ୍ରାହକମାନେ ଜାଣିପାରିବେ। ଅର୍ଥାତ୍ ପ୍ଲାଟ୍ଫର୍ମରେ ଲିଷ୍ଟିଂ ହୋଇଥିବା ସାମଗ୍ରୀ କେଉଁଠାରେ ପ୍ରସ୍ତୁତ ହୋଇଛି ତାହା ଆଉ ସେଲରମାନେ ଗ୍ରାହକଙ୍କୁ ଲୁଚାଇ ପାରିବେ ନାହିଁ। ସେଲରଙ୍କ ଲାଗି ଏହି ନିୟମକୁ ଆମାଜନ କଡ଼ାକଡ଼ି କରିଛି। ନୂଆ ପ୍ରଡକ୍ଟ ଏବଂ ଉପଲବ୍ଧ ପ୍ରଡକ୍ଟ ଥିବା ଏହି ନିୟମ କାର୍ଯ୍ୟକାରୀ ହେବ। ଏଥି ସଂକ୍ରାନ୍ତ ସମସ୍ତ ଆନୁଷଙ୍ଗିକ କାର୍ଯ୍ୟକ୍ରମ ଶେଷ କରିବା ଲାଗି ସେଲରଙ୍କ ପାଇଁ ଶେଷ ସମୟସୀମା ଅଗଷ୍ଟ ମାସ ୧୦ ତାରିଖ ରହିଛି। ଜୁଲାଇ ୨୧ଠାରୁ ନୂଆ ନିୟମ ଆରମ୍ଭ କରିବାକୁ କମ୍ପାନୀ ଧାର୍ଯ୍ୟ କରିଛି। ଆମାଜନ ଏବଂ ବିଗ୍ ବାସ୍କେଟ ଭଳି କମ୍ପାନୀ ଏ ଦିଗରେ କାର୍ଯ୍ୟକ୍ରମ ଆରମ୍ଭ କରିଛନ୍ତି। ସେଲର ଏବଂ ପ୍ରଡକ୍ଟ ଚୟନ କରାଯିବା ସହ ନିୟମକୁ କାର୍ଯ୍ୟକାରୀ କରାଇବା ଲାଗି କାର୍ଯ୍ୟପନ୍ଥା ହାତକୁ ନିଆଯାଇଛି। ସୂଚନାଯୋଗ୍ୟ, ଚାଇନା ସେନାର ଆକ୍ରମଣରେ ୨୦ ଭାରତୀୟ ଯବାନ ଶହୀଦ ଦେବା ପରେ ଦେଶରେ ଚାଇନା ସାମଗ୍ରୀ ବର୍ଜନ କରିବା ନେଇ ପ୍ରତିକ୍ରିୟା ପ୍ରକାଶ ପାଇଛି। ଚାଇନାକୁ ବିକଳ୍ପ ଉପାୟରେ ଚେକ୍ ଦେବା ଲାଗି ସରକାର ଯୋଜନା ରଖିଛନ୍ତି। ଚାଇନାରୁ ଆମଦାନୀ କମାଇବାକୁ ମଧ୍ୟ ଯୋଜନା ରଖାଯାଇଛି। ଇ-କମର୍ସରେ ଉପଲବ୍ଧ ହେଉଥିବା ସାମଗ୍ରୀ ଚାଇନାରେ ପ୍ରସ୍ତୁତ ହେଉଥିଲେ ମଧ୍ୟ ଏହାକୁ ସେଲରମାନେ ଗ୍ରାହକଙ୍କୁ ଅଗୋଚର ରଖୁଛନ୍ତି। ଏ ଦିଗରେ ଠୋସ୍ କାର୍ଯ୍ୟପନ୍ଥା ଗ୍ରହଣ କରିବା ଲାଗି ସରକାର ନିକଟରେ ଇ-କସର୍ମ କମ୍ପାନୀ ପ୍ରତିନିଧିମାନଙ୍କର ଏକ ବୈଠକ ଡାକିଥିଲେ, ଯେଉଁଠାରେ ନୂଆ ନିୟମ ଲାଗୁ କରିବା ଲାଗି କମ୍ପାନୀଗୁଡ଼ିକୁ କୁହାଯାଇଥିଲା।
