ଜଗତ୍ସିଂହପୁର ଅଫିସ, ୧୦ା୧: ଜିଲାରେ ସରକାରଙ୍କ ପକ୍ଷରୁ ଅନେକ ଜନକଲ୍ୟାଣକାରୀ ଯୋଜନା କାର୍ଯ୍ୟକାରୀ ହେଉଛି। ଯୋଜନାଗୁଡିକର ସଫଳ ରୂପାୟନ ହେଉଛି କି ନାହିଁ ସେନେଇ ବିଭିନ୍ନ ସମୟରେ ଜିଲାସ୍ତରରେ ଜିଲାପାଳ ସମୀକ୍ଷା କରୁଛନ୍ତି । ସଚିବମାନେ ମଧ୍ୟ ଅନୁଧ୍ୟାନ ପାଇଁ ଆସୁଛନ୍ତି । କିନ୍ତୁ ଅନେକ ସମୟରେ ସମୀକ୍ଷା ହେଉ ଅବା ସଚିବମାନଙ୍କ କ୍ଷେତ୍ର ପରିଦର୍ଶନ ସମୟରେ ଗଣମାଧ୍ୟମକୁ ଦୂରେଇ ରଖାଯାଉଥିବା ଅଭିଯୋଗ ହୋଇଛି।
ଗତ ୭ ତାରିଖରେ ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗର ସ୍ବତନ୍ତ୍ର ସଚିବ ଗଙ୍ଗାଧର ନାୟକ ୨ ଦିନିଆ ଜଗତ୍ସିଂହପୁର ଜିଲା ଗସ୍ତରେ ଆସିଥିଲେ। ସେ ବିଭାଗୀୟ ବିଭିନ୍ନ ଉନ୍ନୟନମୂଳକ କାର୍ଯ୍ୟକ୍ରମର ସମୀକ୍ଷା କରିବା ସହ କ୍ଷେତ୍ର ପରିଦର୍ଶନ କରିଥିଲେ ବୋଲି ସୋମବାର ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ (ଡିଆଇପିଆର୍ଓ) କାମିନୀ ରଞ୍ଜନ ପଟ୍ଟନାୟକ ଏକ ପ୍ରେସ୍ ନୋଟ୍ ଗଣମାଧ୍ୟମ ପ୍ରତିନିଧିମାନଙ୍କ ପାଖକୁ ପଠାଇଥିଲେ। ଏଥିରେ ଉଲ୍ଲେଖ ଅଛି ସ୍ବତନ୍ତ୍ର ସଚିବ ପ୍ରଥମ ଦିନ ବିରିଡି ବ୍ଲକର ବିଭିନ୍ନ ଅଞ୍ଚଳ ସହ ପ୍ରାଣୀ ଚିକିତ୍ସାଳୟ ପରିଦର୍ଶନ କରିଥିଲେ। ଏହାପରେ ଜିଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀଙ୍କ ପ୍ରକୋଷ୍ଠରେ ବିଭିନ୍ନ ବ୍ଲକରୁ ଆସିଥିବା ବ୍ଲକ ପ୍ରାଣୀ ଚିକିତ୍ସା ଅଧିକାରୀ ଓ ପ୍ରାଣୀ ଚିକିତ୍ସକମାନଙ୍କ ସହ ଆଲୋଚନା କରିଥିଲେ। ବିଶେଷକରି ବିଭାଗୀୟ ବିଭିନ୍ନ ଯୋଜନାର ଅଗ୍ରଗତି ସମ୍ପର୍କରେ ସମୀକ୍ଷା କରିଥିଲେ। ତା’ପରେ ଜିଲାପାଳ ପାରୁଲ ପଟୱାରିଙ୍କ ସହ ବିଭାଗ ପକ୍ଷରୁ ଗ୍ରହଣ କରାଯାଇଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟକ୍ରମ ସମ୍ପର୍କରେ ଆଲୋଚନା କରିଥିଲେ। ଗସ୍ତର ୨ୟ ଦିନ ଜଗତ୍ସିଂହପୁର ବ୍ଲକର ବିଭିନ୍ନ ଅଞ୍ଚଳ ପରିଦର୍ଶନ ସହ ଜିଲା ପରିଷଦର କାର୍ଯ୍ୟକ୍ରମ ଉପରେ ଆଲୋଚନା କରିଥିଲେ। ଏହାପରେ ତିର୍ତ୍ତୋଲ ଓ ବାଲିକୁଦା ଗସ୍ତ କରିଥିଲେ। ତେବେ ପ୍ରମୁଖ ସଚିବଙ୍କ ଗସ୍ତ ଓ ସମୀକ୍ଷା ପୂର୍ବରୁ ଗଣମାଧ୍ୟମକୁ କୌଣସି ସୂଚନା ଦିଆଯାଇ ନ ଥିଲା। ଏ ସମ୍ପର୍କରେ କେତେଜଣ ଗଣମାଧ୍ୟମ ପ୍ରତିନିଧି ପ୍ରତିକ୍ରିୟାରେ କହିଛନ୍ତି, ପ୍ରମୁଖ ସଚିବ କୁଆଡେ ଗସ୍ତ ଓ ସମୀକ୍ଷା କରିଥିଲେ ତାହା ଗୁପ୍ତ ରଖାଯାଇଥିଲା। ବିଭାଗ ପକ୍ଷରୁ କାର୍ଯ୍ୟକାରୀ ହେଉଥିବା ବିଭିନ୍ନ ଯୋଜନାରେ ଅନିୟମିତତା ସମ୍ପର୍କରେ ଅଭିଯୋଗ ହୋଇଆସୁଛି। ପ୍ରମୁଖ ସଚିବଙ୍କ ଗସ୍ତ ସମୟରେ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ରହିଥିଲେ ଅନେକ କିଛି ପଦାକୁ ଆସିବା ସମ୍ଭାବନା ଥିବାରୁ ବିଭାଗ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଥିଲା । ତେଣୁ ବିଭାଗ ପକ୍ଷରୁ ଗଣମାଧ୍ୟମକୁ ଦୂରେଇ ରଖାଯିବାକୁ ଉଦ୍ୟମ ହୋଇଥିଲା । ନିକଟରେ ରାଜ୍ୟ ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଭକ୍ତ ରଞ୍ଜନ ମହାନ୍ତି ଜଗତ୍ସିଂହପୁର ଜିଲା ଗସ୍ତ କରିଥିଲେ। ଏହା ପୂର୍ବରୁ ବିଭାଗ ପକ୍ଷରୁ ମଧ୍ୟ ଗଣମାଧ୍ୟମକୁ ଦୂରେଇ ରଖାଯିବାକୁ ଚେଷ୍ଟା କରାଯାଇଥିଲା। କିନ୍ତୁ ଜଗତ୍ସିଂହପୁର ବିଧାୟକ ପ୍ରଶାନ୍ତ କୁମାର ମୁଦୁଲି ଏ ସମ୍ପର୍କରେ ଗଣମାଧ୍ୟମ ପ୍ରତିନିଧିମାନଙ୍କୁ ଆମନ୍ତ୍ରଣ କରିବା ପରେ ଗସ୍ତର ଉଦ୍ଦେଶ୍ୟ ସମ୍ପର୍କରେ ଅନେକ ତଥ୍ୟ ମିଳିିଥିଲା। ଏପରିକି ଦେବୀନଦୀ ପଠାର ପଥର ପ୍ୟାକିଂ ଓ ବୁରୁଜ ନିର୍ମାଣ କାର୍ଯ୍ୟ ନିମ୍ନମାନର ହୋଇଥିବା ଜଣାପଡ଼ିଥଲା। ଏଥିସହ ବିଭାଗୀୟ ଜଗତ୍ସିଂହପୁର ଡିଭିଜନ୍ ବିଲଡିଂରେ ଗଛ ଉଠିଥିବାରୁ ସର୍ବୋଚ୍ଚ ଯନ୍ତ୍ରୀ କ୍ଷୁବ୍ଧ ହୋଇଥିଲେ। ଏନେଇ ଜିଲା ପ୍ରଶାସନ ପକ୍ଷରୁ ଜିଲାପାଳ, ସଚିବମାନଙ୍କ କ୍ଷେତ୍ର ପରିଦର୍ଶନ ଓ ସମୀକ୍ଷା ସମୟରେ ଗଣମାଧ୍ୟମ ପ୍ରତିନିଧିମାନଙ୍କ ଉପସ୍ଥିତି ଲୋଡନ୍ତୁ ବୋଲି ଦାବି ହୋଇଛି । ଏହାଦ୍ୱାରା ଯୋଜନାଗୁଡିକର କାର୍ଯ୍ୟାନ୍ବୟନରେ ସ୍ବଚ୍ଛତା ସହ ସୁଧାର ଆସିବ।
