ଭୁବନେଶ୍ୱର,୩୦ା୫(ବ୍ୟୁରୋ): ରାଜଧାନୀ ଭୁବନେଶ୍ୱରରେ ଜଣେ ୨୪ ବର୍ଷୀୟା ସହକାରୀ ପ୍ରଫେସରଙ୍କୁ ବଳାତ୍କାର କରାଯାଇଥିବା ଅଭିଯୋଗ ହୋଇଛି। ଏପରିକି ଅଭିଯୁକ୍ତ ଜଣକ ତାଙ୍କୁ ବ୍ଲାକମେଲିଂ କରି ୨ ଲକ୍ଷ ଟଙ୍କା ନେଇସାରିଲେଣି। ଛତିଶଗଡ଼ର ରାୟପୁର ଡିଆଇଜିଙ୍କ ଚିଠି ପରେ ଖଣ୍ଡଗିରି ଥାନାରେ ମାମଲା ରୁଜୁ ହୋଇଥିବା ଜଣାପଡ଼ିଛି।
ଅଭିଯୋଗରୁ ପ୍ରକାଶ ଯେ, ଛତିଶଗଡ଼ ରାୟପୁର କବୀରନଗରର ୨୪ ବର୍ଷୀୟା ଜଣେ ଯୁବତୀ ଗତ ବର୍ଷ ମାର୍ଚ୍ଚରେ ଜାଗମରାରର ଏକ ଘରୋଇ ଶିକ୍ଷାନୁଷ୍ଠାନରେ ଆସିଷ୍ଟାଣ୍ଟ ପ୍ରଫେସର ଭାବେ ଯୋଗ ଦେଇଥିଲେ। ପୂର୍ବରୁ ସେଠାରେ ଆସିଷ୍ଟାଣ୍ଟ ପ୍ରଫେସର ଭାବେ କାର୍ଯ୍ୟ କରୁଥିବା ଜଣେ ବ୍ୟକ୍ତିଙ୍କ ସହିତ ତାଙ୍କର ପରିଚୟ ହୋଇଥିଲା। ଗତବର୍ଷ ସେପ୍ଟେମ୍ବରରେ ସଂପୃକ୍ତ ବ୍ୟକ୍ତି ଜଣକ ମହିଳା ପ୍ରଫେସରଙ୍କୁ ଜାଗମରାଠାରେ ଥିବା ହୋଟେଲକୁ ଡକାଇଥିଲେ। ସେ ହୋଟେଲରେ ପହଞ୍ଚିବା ପରେ ସେ ତାଙ୍କୁ ଥଣ୍ଡା ପାନୀୟରେ ନିଶା ମିଶାଇ ପିଇବାକୁ ଦେଇଥିଲେ। ସେ ଚେତା ହରାଇବା ପରେ ଅଭିଯୁକ୍ତ ତାଙ୍କ ସହିତ ବଳାତ୍କାର କରିବା ସହିତ ଅଶ୍ଲୀଳ ଭିଡିଓ ଶୁଟିଂ କରିଥିଲେ।
ଏହାପରେ ବାରମ୍ବାର ବ୍ଲାକମେଲିଂ କରି ବଳାତ୍କାର ସହ ଟଙ୍କା ଦାବି କରୁଥିଲେ ଅଭିଯୁକ୍ତ। ଲୋକ ଲଜ୍ଜା ଓ ଘରେ ଜାଣିଯିବା ଭୟରେ ୨ ଲକ୍ଷ ଟଙ୍କା ଦେଇଥିଲେ ସହକାରୀ ପ୍ରଫେସର ଜଣକ। ଶେଷରେ ସେ ଆଇନର ଦ୍ବାରସ୍ଥ ହେବାରୁ, ତାଙ୍କୁ ଜୀବନରୁ ମାରିଦେବାକୁ ଧମକ ବି ମିଳିଥିଲା। ପରିବାର ଲୋକଙ୍କ ପରାମର୍ଶ କ୍ରମେ ଗତ ମଙ୍ଗଳବାର ମହିଳା ଆସିଷ୍ଟାଣ୍ଟ ପ୍ରଫେସର କବୀର ନଗର ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ଜିରୋ ଏଫ୍ଆଇଆର ରୁଜୁ କରି ରାୟପୁର ଡିଆଇଜିଙ୍କୁ ଜଣାଇଥିଲେ। ରାୟପୁର ଡିଆଇଜି ମାମଲା ସମ୍ବନ୍ଧୀୟ ସମସ୍ତ କାଗଜପତ୍ର କମିଶନରେଟ ପୋଲିସକୁ ପଠାଇବା ସହିତ ମାମଲା ରୁଜୁ କରିବା ପାଇଁ ନିର୍ଦ୍ଦେଶ ଦେଇଥିଲେ। ରାୟପୁର ଡିଆଇଜିଙ୍କ ନିର୍ଦ୍ଦେଶ କ୍ରମେ ଖଣ୍ଡଗିରି ଥାନାରେ ଅଭିଯୁକ୍ତଙ୍କ ନାମରେ ମାମଲା ରୁଜୁ ହୋଇଛି।
