ପୋଲସରା,୧୦ା୫(ଡି.ଏନ୍.ଏ.): ଗଞ୍ଜାମ ଜିଲା ପୋଲସରା ଥାନା ପକ୍ଷରୁ ଲକ୍ଷାଧିକ ଟଙ୍କା ଠକେଇ ଅଭିଯୋଗରେ ପୋଲସରା ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ମୁଖ୍ୟ ଅଭିଯୁକ୍ତ ଥିବା ଜଣେ ମହିଳାଙ୍କ ସମେତ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ଭୁବନେଶ୍ୱରର ଶୈଳବାଳା ମିଶ୍ର, ପୋଲସରା ଥାନା ଚିରିକିପଡ଼ା ଶାସନ ଗ୍ରାମର ନାରାୟଣ ପ୍ରଧାନ, ଯଦୁମଣି ପ୍ରଧାନ ଓ ଭଞ୍ଜନଗରର (ଭୁବନେଶ୍ୱରରେ ରହୁଥିବା ଶିବରାମ ଗୌଡ଼)।
ସୂଚନାଯୋଗ୍ୟ, ଭୁବନେଶ୍ୱରରେ ରହୁଥିବା ଶୈଳବାଳା ଚିରିକିପଡ଼ା ଶାସନର ସହଯୋଗୀଙ୍କ ସହ କଥାବାର୍ତ୍ତା କରି ସେହି ଗ୍ରାମର ରଞ୍ଜନ କୁମାର ସାହୁଙ୍କ ସହ ଯୋଗାଯୋଗ କରି କହିଥିଲେ କି ତୁମ ପାଇଁ ଭୁବନେଶ୍ୱରସ୍ଥିତ ଏମ୍ସ (AIIMS) ହସ୍ପିଟାଲରେ କ୍ୟାଣ୍ଟିନ କରାଇଦେବାର ପ୍ରଲୋଭନ ଦେଖାଇ ରଞ୍ଜନ ସାହୁଙ୍କଠାରୁ ୫୬ ଲକ୍ଷ ୫୦ହଜାର ଟଙ୍କା ୨୦୨୧ରେ ଠକି ନେଇଥିଲେ। କାର୍ଯ୍ୟରେ ବିଳମ୍ବ ହେବାରୁ ରଞ୍ଜନ ଶୈଳବାଳା ନେଇଥିବା ଅର୍ଥ ରାଶି ଫେରାଇବା ଲାଗି କହିଥିଲେ। ଇତିମଧ୍ୟରେ ବହୁ ପାଟିତୁଣ୍ଡ ହେବା ପରେ ୫ଲକ୍ଷ ୫୦ହଜାର ଟଙ୍କା ଫେରାଇଥିଲେ। ଆଉ ବଳକା ୫୧ଲକ୍ଷ ଟଙ୍କା ଦେବାରେ ବିଳମ୍ବ ହୋଇଥିଲା। ଏହି ଘଟଣାରେ ରଞ୍ଜନ ସାହୁ ବିବ୍ରତ ହୋଇ ଗତ ୮ ତାରିଖରେ ପୋଲସରା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପରେ ପୋଲସରା ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ଏକ ସ୍ବତନ୍ତ୍ର ଟିମ୍ ଗଠନ କରି ତଦନ୍ତ ଚଳାଇ ମୁଖ୍ୟ ଅଭିଯୁକ୍ତ ଥିବା ମହିଳା ଶୈଳବାଳାଙ୍କୁ ଭୁବନେଶ୍ୱରରୁ ଧରି ଆଣି ଥାନାରେ ପଚରାଉଚରା ସମୟରେ ସବୁ ସତ ପ୍ରକାଶ କରିଥିଲେ। ପୋଲିସ ସହଯୋଗୀ ନାରାୟଣ ପ୍ରଧାନ, ଯଦୁମଣି ପ୍ରଧାନ ଓ ଶିବରାମ ଗୌଡ଼ ପ୍ରମୁଖଙ୍କୁ ତଦନ୍ତ କରିଥିଲା ଠିକ୍ ସେହିପରି ନୟାଗଡ଼ର ଅର୍ଚ୍ଚନା କୁମାରୀ ସାହୁଙ୍କୁ ଚାକିରି କରାଇଦେବାର ପ୍ରଲୋଭନ ଦେଖାଇ ୬ ଲକ୍ଷ ଟଙ୍କା ନେଇଥିଲେ। ଅର୍ଚ୍ଚନା ମଧ୍ୟ ବିବ୍ରତ ହୋଇ ସମ୍ପୃକ୍ତ ଶୈଳବାଳାଙ୍କ ବିରୋଧରେ ପୋଲସରା ଥାନାରେ ଲିଖିତ ଅଭିଯୋଗ କରିଥିଲେ। ଏହାକୁ ନେଇ ପୋଲିସ ୨୫୬/୨୩ରେ ମାମଲା ରୁଜୁ କରିଛି। ଠକେଇ କରୁଥିବା ଶୈଳବାଳା ପୋଲସରା ଥାନାଞ୍ଚଳର ଚିରିକିପଡ଼ା ଶାସନ ସମେତ ଆଖ ପାଖ ଅଞ୍ଚଳରୁ ପ୍ରାୟ ପାଖାପାଖି କୋଟିଏରୁ ଊର୍ଦ୍ଧ୍ୱ ଟଙ୍କା ଠକି ନେଇଥିବା ଅଞ୍ଚଳରେ ଚର୍ଚ୍ଚା ଜୋର ଧରିଛି। କିଛି ବ୍ୟକ୍ତି ଠକେଇ ଶୈଳବାଳାଙ୍କଠାରୁ ଧମକ ପାଇ ରହିଥିବା ଜଣେ ମହିଳା ନିଜର ନାମ ଗୋପନ ରଖି କହିଥିଲେ। ପୋଲସରା ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ଅଭିଯୋଗକାରୀଙ୍କ ଏତଲାନୁସାରେ ମୁଖ୍ୟ ମହିଳା ଅଭିଯୁକ୍ତ ଓ ସହଯୋଗୀ ଏହିପରି ୪ ଜଣଙ୍କୁ କୋର୍ଟ ଚାଲାଣ କରିଛି।
