ଯାଜପୁର ଅଫିସ,୨୮।୮: ଯାଜପୁର ଜିଲାରେ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା (ପିଏମ୍ଜିଏସ୍ୱାଇ)ରେ ବିନା ପିସିରେ ଫାଇଲ୍ ଘୁଞ୍ଚେ ନାହିଁ ବୋଲି ଠିକାଦାରମାନେ ଅଭିଯୋଗ କରିଆସୁଛନ୍ତି। ଏଭଳି ଏକ ଉଦାହରଣ ଦେଖିବାକୁ ମିଳିଛି ସୁକିନ୍ଦା ବ୍ଲକ ଆରଡି ରାସ୍ତାଠାରୁ ଡୁବିଖାଲ ପିଏମ୍ଜିଏସ୍ୱାଇ ରାସ୍ତାରେ। ଏନ୍କ୍ୟୁଏମ୍(ନ୍ୟାଶନାଲ କ୍ବାଲିଟି ମନିଟର) ଏବଂ ଏସ୍କ୍ୟୁଏମ(ଷ୍ଟେସ କ୍ବାଲିଟି ମନିଟର) ଭଳି ସରକାରୀ ସଂସ୍ଥା କାର୍ଯ୍ୟ ମାନରେ ସବୁଜ ସଙ୍କେତ ଦେଇଥିବା ସତ୍ତ୍ବେ ଫାଇନାଲ ବିଲ ପାଇଁ ୫ ଲକ୍ଷ ଟଙ୍କା ଦାବି କରି ସମ୍ପୃକ୍ତ ଯନ୍ତ୍ରୀ ହଇରାଣ କରିଥିବା ଅଭିଯୋଗ ହୋଇଛି। ଏନେଇ ବିଭାଗୀୟ ସର୍ବୋଚ୍ଚ ଯନ୍ତ୍ରୀ ଏବଂ ଚିଫ୍ କନଷ୍ଟ୍ରକ୍ସନ ଇଞ୍ଜିନିୟରଙ୍କ ନିର୍ଦ୍ଦେଶକ୍ରମେ ଏକାଧିକ ଥର ତଦନ୍ତ ହୋଇଥିଲେ ହେଁ ସମ୍ପୃକ୍ତ ଯନ୍ତ୍ରୀଙ୍କୁ ପରୋକ୍ଷରେ ସହଯୋଗ କରାଯାଉଥିବା ଅଭିଯୋଗ ହେଉଛି।
୨୦୧୮-୧୯ ବର୍ଷରେ ୧.୩୩ କୋଟି ଟଙ୍କା ବ୍ୟୟରେ ଆର୍ଡି ରାସ୍ତାଠାରୁ ଡୁବିଖାଲ ପର୍ଯ୍ୟନ୍ତ ପିଏମ୍ଜିଏସ୍ୱାଇ ରାସ୍ତା ନିର୍ମାଣ ହୋଇଥିଲା, ଯାହାକି ୨୫ା୬ା୨୦୨୧ରେ ସମ୍ପୂର୍ଣ୍ଣ ହୋଇଥିଲା। କାର୍ଯ୍ୟର ଫାଇନାଲ ବିଲ୍ କରିଦେବାକୁ ସମ୍ପୃକ୍ତ ଯନ୍ତ୍ରୀ ୫ ଲକ୍ଷ ଟଙ୍କା ଦାବି କରିଥିଲେ ବୋଲି ଠିକାଦାର ପ୍ରଦୀପ୍ତ କୁମାର ବିଶ୍ୱାଳ ପିଏମ୍ଜିଏସୱାଇ ଚିଫ୍ ଇଞ୍ଜିନିୟରଙ୍କ ନିକଟରେ ୮ା୮ା୨୦୨୨ରେ ଅଭିଯୋଗ କରିଛନ୍ତି। ଯନ୍ତ୍ରୀଙ୍କ ଦାବିକୁ ସେ ନ ମାନିବାରୁ ଫାଇନାଲ ବିଲ୍ ପ୍ରସ୍ତୁତିରେ ଚଞ୍ଚକତା କରାଯାଇଛି। ପ୍ରାୟ ୩୨ ଲକ୍ଷ ଟଙ୍କା ବିଲ୍ କରିବାକୁ ଥିବାବେଳେ ବିନା କାରଣରେ ମାତ୍ର ୧୨ ଲକ୍ଷ ଟଙ୍କା ବିଲ୍ ହୋଇଥିଲା। ଯନ୍ତ୍ରୀଙ୍କ ଏଭଳି କାର୍ଯ୍ୟ ଉପରେ ସେ ୧୦ା୨ା୨୦୨୨ରେ ଗ୍ରାମ୍ୟ ଉନ୍ନୟନ ବିଭାଗର ଅତରିକ୍ତ ସଚିବଙ୍କ ନିକଟରେ ଗ୍ରୀଭାନ୍ସ ପିଟିସନ ଦାଖଲ କରିଥିଲେ। ତଥାପି କୌଣସି ପଦକ୍ଷେପ ନିଆଯାଇ ନ ଥିଲା। ଏହାପରେ ପିଏମ୍ଜିଏସ୍ୱାଇର ଚିଫ୍ ଇଞ୍ଜିନିୟର ୧୭ା୮ା୨୦୨୨ରେ କେନ୍ଦ୍ରାପଡା-ଯାଜପୁର ଗ୍ରାମ୍ୟ ନିର୍ମାଣ ସର୍କିଲର ଚିଫ୍ କନଷ୍ଟ୍ରକ୍ସନ ଇଞ୍ଜିନିୟରଙ୍କୁ ଅଭିଯୋଗ ଅନୁସାରେ ଉତ୍ତର ରଖିବାକୁ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶକୁ ଭିତ୍ତିକରି ୨୨ା୮ା୨୦୨୨ରେ କେନ୍ଦ୍ରାପଡ଼ା-ଯାଜପୁର ଗ୍ରାମ୍ୟ ନିର୍ମାଣ ସର୍କିଲର ଚିଫ୍ କନଷ୍ଟ୍ରକ୍ସନ ଇଞ୍ଜିନିୟର ଆବଶ୍ୟକ ତଦନ୍ତ କରିବାକୁ ଯାଜପୁର ଅଧୀକ୍ଷଣ ଯନ୍ତ୍ରୀଙ୍କୁ ନିର୍ଦ୍ଦେଶ ଜାରି କରିଛନ୍ତି।
ଅନ୍ୟପକ୍ଷରେ ଉକ୍ତ ପିଏମ୍ଜିଏସ୍ୱାଇ ରାସ୍ତାରେ ନିର୍ଦ୍ଧାରିତ ବ୍ୟୟ ଅଟକଳ ଅନୁସାରେ କାମ ହୋଇ ନ ଥିବାରୁ ଫାଇନାଲ ବିଲ୍ ତଦନୁସାରେ ପ୍ରସ୍ତୁତ ହୋଇଥିବା ଯନ୍ତ୍ରୀ ଦାବି କରିଛନ୍ତି। ଏ ସଂକ୍ରାନ୍ତରେ ଯାଜପୁର ଗ୍ରାମ୍ୟ ନିର୍ମାଣ ଡିଭିଜନ-୧ର ଅଧୀକ୍ଷଣ ଯନ୍ତ୍ରୀ ଜ୍ଞାନରଞ୍ଜନ ନାୟକଙ୍କୁ ପଚରାଯିବାରୁ ସେ କହିଛନ୍ତି , ଉକ୍ତ ପିଏମ୍ଜିଏସ୍ଓ୍ବାଇ ରାସ୍ତାର ଫାଇନାଲ ବିଲ୍ରେ ମାପିବା ପ୍ରକ୍ରିୟା ଭୁଲ୍ ରହିଛି ବୋଲି ଠିକାଦାର ଅଭିଯୋଗ କରିଛନ୍ତି। ଉକ୍ତ ଅଭିଯୋଗ ଆଧାରଣରେ ଚିଫ୍ କନଷ୍ଟ୍ରକ୍ସନ ଇଞ୍ଜିନିୟର ପୁନଃ ମାପିବାକୁ ଆସିବେ। ଏହାପରେ ବିହତ ପଦକ୍ଷେପ ନିଆଯିବ
ସୂଚନାଥାଉ କି, ବେଆଇନ ଅର୍ଥ କାରବାର ଯୋଗୁ ଜିଲାର ଏକାଧିକ ପିଏମ୍ଜିଏସ୍ୱାଇ କାର୍ଯ୍ୟ ଅତି ନିମ୍ନମାନର ହେଉଥିବା ଜଣାପଡିଛି। ୨୦୨୧ରେ ଜାରକା ଗ୍ରାମ୍ୟ ନିର୍ମାଣ ଡିଭିଜନ-୨ ଅଧୀନରେ ବାଲିଚନ୍ଦ୍ରପୁର-ଦେକୁରୀ ଏବଂ ଏନଏଚ-୫(କ) ଠାରୁ ଭରତପୁର ପିଏମ୍ଜିଏସ୍ୱାଇ ରାସ୍ତାରେ ବିପୁଳ ପରିମାଣର ସରକାରୀ ଅର୍ଥ ହରିଲୁଟ୍ ହୋଇଥିବା ଅଭିଯୋଗ ହୋଇଥିଲା।
