ଦିଗପହଣ୍ଡି,୧୧।୩(ଅଶେଷ ନାଥ ମିଶ୍ର): ବିବାହର ନିର୍ଭର ପ୍ରତିଶ୍ରୁତି ଦେଇ ପ୍ରତାରଣା କରାଯାଇଥିବା ନେଇ ଗଞ୍ଜାମ ଜିଲା ଦିଗପହଣ୍ଡି ଥାନା ଅଞ୍ଚଳର ଜଣେ ଯୁବତୀ ଏତଲା ଦେଇଛନ୍ତି। ଏତଲାକୁ ଭିତ୍ତିକରି ଆଇଆଇସି ପ୍ରଶାନ୍ତ କୁମାର ପାତ୍ର ଥାନା ମାମଲା ନଂ.୯୮/୨୫ ଅନୁଯାୟୀ ଦିଗପହଣ୍ଡି ବ୍ଲକ ବି.ତୁରୁବୁଡ଼ି ପଞ୍ଚାୟତ ମରେଇବାଡ଼ି ଗ୍ରାମର ସିମାଞ୍ଚଳ ମଲ୍ଲିକଙ୍କ ନାଁରେ ମକଦ୍ଦମା ରୁଜୁ କରିବା ସହ ଥାନା ଏସ.ଆଇ ସୋଫିଆ ମିଶ୍ରଙ୍କୁ ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଥିବା ଜଣାପଡିଛି।
ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଟି.ଗୋବିନ୍ଦପୁର ପଞ୍ଚାୟତରେ ଗ୍ରାମ ରୋଜଗାର ସେବକ ଭାବେ କାମ କରୁଥିବା ସିମାଞ୍ଚଳ ଉକ୍ତ ଯୁବତୀଙ୍କୁ ଗତ ପ୍ରାୟ ୧ ବର୍ଷ ହେଲା ଭଲ ପାଉଥିଲେ। ଗତ ଫେବୃଆରୀ ୨୪ ତାରିଖରେ ସିମାଞ୍ଚଳ ଯୁବତୀଙ୍କୁ ଚିକିଟି ପେଣ୍ଠ ଗ୍ରାମକୁ ଡକାଇଥିଲେ। ଯୁବତୀ ଜଣକ ସେଠାରେ ପହଞ୍ଚିବାପରେ ତାଙ୍କୁ ଏକ ଲଜିଂକୁ ନେଇ ସିମାଞ୍ଚଳ ତାଙ୍କ ସହ ସହବାସ କରିବା ପରେ ସେଠାରେ ଉଭୟେ ରାତି ବିତାଇଥିଲେ। ସକାଳେ ଖବରପାଇ ଯୁବତୀଙ୍କ ମାମୁ ସେଠାରେ ପହଞ୍ଚି ଉଭୟଙ୍କୁ ତାଙ୍କ ଘରକୁ ଡ଼ାକି ନେଇଥିଲେ। ପରେ ସିମାଞ୍ଚଳଙ୍କ ବାପା ଲବ ମଲ୍ଲିକ ଏବଂ କିଛି ଭଦ୍ରବ୍ୟକ୍ତିଙ୍କୁ ଡାକି ଉଭୟଙ୍କ ବିବାହ ପାଇଁ ଆଲୋଚନା କରିଥିଲେ। ସିମାଞ୍ଚଳ ଯୁବତୀଙ୍କୁ ବିବାହ ପାଇଁ ସହମତି ପ୍ରକାଶ କରିଥିଲେ ମଧ୍ୟ ବାପା ଲବ ଏବଂ ଉପସ୍ଥିତ ଭଦ୍ରଲୋକମାନେ ବିବାହ ପ୍ରସ୍ତାବକୁ ରୋକଠୋକ ମନା କରିଦେଇଥିଲେ। ପରେ କୁକୁଡ଼ା ଖଣ୍ଡି ବ୍ଲକ ଟାମଣା ଗ୍ରାମର ଜଣେ ଯୁବତୀଙ୍କ ସହ ସିମାଞ୍ଚଳଙ୍କ ବିବାହ ପାଇଁ ନିର୍ବନ୍ଧ ସରିଥିବା ଜାଣିବା ପରେ ଯୁବତୀ ଜଣକ ଥାନାରେ ଏତଲା ଦେଇଥିବା ଜଣାପଡିଛି।
