ନୂଆଦିଲ୍ଲୀ,୧୭।୭: ଚାଇନା ସେନାର ଆକ୍ରମଣରେ ୨୦ ଭାରତୀୟ ଯବାନ ଶହୀଦ ହେବା ପରେ କେନ୍ଦ୍ର ସରକାର ୫୯ ଚାଇନା ଆପ୍କୁ ବ୍ୟାନ୍ କରିଛନ୍ତି। ଏହାର ପ୍ରଭାବ ଘରୋଇ ବଜାର ଉପରେ ଦେଖାଯାଇଛି। ପ୍ରମୁଖ ଇ-କମର୍ସ କମ୍ପାନୀ ଆଲିବାବା ପକ୍ଷରୁ ଭାରତ ବଜାରରେ ପରିଚାଳିତ ୟୁସି ବ୍ରାଇଜର, ୟୁସି ନ୍ୟୁଜ୍ ଏବଂ ଭିମେଟର କାରବାର ବନ୍ଦ କରାଯାଇଛି। ଭାରତ ବଜାରରେ କମ୍ପାନୀ ଏହାର କାରବାର ବନ୍ଦ କରୁଥିବା ୟୁସି ବ୍ରାଉଜର କର୍ମଚାରୀଙ୍କୁ ଔପଚାରିକ ଭାବେ କୁହାଯାଇଛି। ଏହି ନିଷ୍ପତ୍ତି ଆଧାରରେ କମ୍ପାନୀ ଗୁରୁଗ୍ରାମ ଏବଂ ମୁମ୍ବାଇ ଅଫିସକୁ ବନ୍ଦ କରିଦେଇଛି। ରଏଟର୍ସର ଏକ ରିପୋର୍ଟ ମୁତାବକ ୧୫ ଜୁଲାଇରେ ଆଲିବାବା ପକ୍ଷରୁ ଭାରତ ବଜାରରେ କାର୍ଯ୍ୟରତ କର୍ମଚାରୀଙ୍କୁ ଏକ ଚିଠି ଲେଖାଯିବା ସହ ନିଷ୍ପତ୍ତି ସମ୍ପର୍କରେ ଅବଗତ କରାଯାଇଛି। ଭାରତ ସରକାରଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତି ଆଧାରରେ ଏଭଳି କାର୍ଯ୍ୟପନ୍ଥା ଗ୍ରହଣ କରାଯାଇଛି। ବ୍ୟାନ୍ ପରେ ସେବା ଜାରି ରଖିବା ଲାଗି କମ୍ପାନୀକୁ ବିଭିନ୍ନ ସମସ୍ୟା ସାମ୍ନା କରିବାକୁ ପଡୁଛି। ଭାରତ ସରକାରଙ୍କ ନିୟମକୁ ପାଳନ ପୂର୍ବକ ସେବାକୁ ବନ୍ଦ କରାଯାଇଥିବା ୟୁସି ଓ୍ବେବ୍ ପକ୍ଷରୁ ଏକ ବିବୃତିରେ କୁହାଯାଇଛି।
