ନୂଆଦିଲ୍ଲୀ, ୧୬।୫ : ବିମାନ ଯାତ୍ରା ବର୍ତ୍ତମାନ ଅଧିକ ମହଙ୍ଗା ହେବାର ଆଶଙ୍କା ରହିଛି। ସରକାରୀ ତୈଳ କମ୍ପାନୀଗୁଡିକ ବିମାନ ଇନ୍ଧନର ମୂଲ୍ୟ ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି। ଏଟିଏଫ ଦାମରେ ୫ ପ୍ରତିଶତ ବୃଦ୍ଧି କରାଯାଇଛି। ଏହି ବୃଦ୍ଧି ପରେ ବିମାନ ଇନ୍ଧନର ମୂଲ୍ୟ ରେକର୍ଡ ସ୍ତରରେ ପହଞ୍ଚିଛି।
୨୦୨୨ରେ, ବିମାନ ଇନ୍ଧନର ମୂଲ୍ୟ ଏହାକୁ ମିଶାଇ ଦଶମ ଥର ପାଇଁ ବୃଦ୍ଧି ପାଇଛି। ବିଶ୍ୱସ୍ତରରେ ଅଶୋଧିତ ତୈଳର ଦାମ ବୃଦ୍ଧି ବିମାନ ଇନ୍ଧନକୁ ମଧ୍ୟ ପ୍ରଭାବିତ କରିଛି। ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡିକ ଜାତୀୟ ରାଜଧାନୀ ଦିଲ୍ଲୀରେ ଏଟିଏଫ ମୂଲ୍ୟକୁ ୫ ପ୍ରତିଶତ ବୃଦ୍ଧି କରିଛନ୍ତି। ଦେଶର ରାଜଧାନୀରେ ଏଟିଏଫ ଦାମ କିଲୋଲିଟର ପିଛା ୧୨୩,୦୩୯.୭୧ ଟଙ୍କା ଅର୍ଥାତ୍ ଲିଟର ପିଛା ୧୨୩ ଟଙ୍କାରେ ପହଞ୍ଚିଛି।
ସରକାରୀ ତୈଳ କମ୍ପାନୀଗୁଡିକ ପ୍ରତ୍ୟେକ ମାସର ପ୍ରଥମ ଏବଂ ୧୬ ତାରିଖରେ ବିମାନ ଇନ୍ଧନର ମୂଲ୍ୟ ସମୀକ୍ଷା କରିଥାନ୍ତି। ଚଳିତ ବର୍ଷ ଜାନୁୟାରୀ ୧ ଠାରୁ ବାୟୁ ଇନ୍ଧନ ପ୍ରାୟ ୬୨ ପ୍ରତିଶତ ବ୍ୟୟବହୁଳ ହୋଇଛି। ମୁମ୍ବାଇରେ ଏଟିଏଫ୍ର ଦାମ ବର୍ତ୍ତମାନ କିଲୋଲିଟର ପିଛା ୧୨୧,୮୪୭.୧୧ ଟଙ୍କାକୁ ବୃଦ୍ଧି ପାଇଛ। କୋଲକାତାରେ ଏହା ୧୨୭,୮୫୪.୬୦ ଟଙ୍କା ଏବଂ ଚେନ୍ନାଇରେ କିଲୋଲିଟର ପିଛା ୧୨୭,୨୮୬ ଟଙ୍କା ହୋଇଛି। ମହଙ୍ଗା ଅଶୋଧିତ ତୈଳ ଯୋଗୁ ଗତ ଚାରିମାସ ମଧ୍ୟରେ ବିମାନ ଇନ୍ଧନର ମୂଲ୍ୟରେ ଏକ ବଡ଼ ଧରଣର ବୃଦ୍ଧି ଘଟିଛି।
ଦେଶର ବିମାନ ଚଳାଚଳ ଶିଳ୍ପକୁ ଏହା ଦ୍ୱାରା ପ୍ରଭାବିତ ହେବାର ଆଶଙ୍କା ରହିଛି। ମହଙ୍ଗା ଇନ୍ଧନ ଯୋଗୁ ବିମାନ ଚଳାଚଳ ଭଡା ବୃଦ୍ଧି ହେବ ବୋଲି କୁହାଯାଉଛି। ରେଟିଂ ଏଜେନ ଆଇସିଏଆର ଏହାର ରିପୋର୍ଟରେ କହିଛି ଯେ ଏଟିଏଫ ମୂଲ୍ୟ ବୃଦ୍ଧି ଦେଶର ବିମାନ ଚଳାଚଳ ଶିଳ୍ପ ଉପରେ ଅଧିକ ପ୍ରଭାବ ପକାଇପାରେ।
