ନୂଆଦିଲ୍ଲୀ,୧୭।୪: ଚଳିତ ବର୍ଷ ଆରମ୍ଭରୁ ବିମାନ ଇନ୍ଧନ ମୂଲ୍ୟ ବଢ଼ିଚାଲିଛି। ଏପରିକି ପ୍ରତି ମାସରେ ୨ ଥର ଏପରିକି ଗତ ୪ ମାସରେ ୮ ଥର ପାଇଁ ଏହାର ମୂଲ୍ୟ ବୃଦ୍ଧି ହୋଇସାରିଛି। ଗୋଟିଏ ପଟରେ କ୍ରମାଗତ ଭାବେ ଅନ୍ତର୍ଜାତୀୟ ବଜାରରେ ତୈଳ ଦର ବୃଦ୍ଧି ପାଉଛି। ଅପରପକ୍ଷରେ ତୈଳ ଦର ବୃଦ୍ଧି ଯୋଗୁ ବିମାନ ସେବା ଯୋଗାଇଥିବା କମ୍ପାନୀଗୁଡିକ ବ୍ୟାପକ ସମସ୍ୟାର ସମ୍ମୁଖୀନ ହେଉଛନ୍ତି। ଏଭଳି ପରିସ୍ଥିତିରେ କମ୍ପାନୀଗୁଡିକ ସେହି ଅନୁସାରେ ମୂଲ୍ୟ ବୃଦ୍ଧି କରିବାକୁ ଯୋଜନା କରୁଛନ୍ତି।
ଗତ କିଛିଦିନର ବିରତି ପରେ ପୁଣି ଥରେ ଅନ୍ତର୍ଜାତୀୟ ବଜାରରେ ତୈଳ ଦର ବୃଦ୍ଧି ପାଇବାରେ ଲାଗିଛି। ଏହାର ପ୍ରଭାବ ଭାରତ ବଜାର ଉପରେ ପଡୁଛି। ଏପରିକି ବିମାନରେ ଇନ୍ଧନ ରୂପେ ବ୍ୟବହାର କରାଯାଉଥିବା ଏଟିଏଫ୍ (ଆଭିଏଶେନ ଟର୍ବାଇନ ଫୁଏଲ) ର ମୂଲ୍ୟ ମଧ୍ୟ ୦.୨% ବୃଦ୍ଧି ପାଇଛି। ବିମାନ ଇନ୍ଧନ ଯୋଗାଇଥିବା ତୈଳ କମ୍ପାନୀଗୁଡିକର ସୂଚନା ଅନୁସାରେ ଶନିବାର ଏଟିଏଫ୍ ମୂଲ୍ୟ କିଲୋଲିଟର ପିଛା ୨୭୭.୫ ଟଙ୍କା ଅର୍ଥାତ୍ ୦.୨% ବୃଦ୍ଧି ଘଟିଛି। ଏହି ମୂଲ୍ୟ ବୃଦ୍ଧି ଫଳରେ ନୂଆଦିଲ୍ଲୀରେ ଏଟିଏଫ୍ ମୂଲ୍ୟ ୧,୧୩,୨୦୨.୩୩ ଟଙ୍କାରେ ପହଞ୍ଚତ୍ଛି।
ଏହା ପୂର୍ବରୁ ପ୍ରାୟ ୨ସପ୍ତାହ ମଧ୍ୟରେ ପେଟ୍ରୋଲ ଏବଂ ଡିଜେଲ ପ୍ରାୟ ୧୧ ଟଙ୍କା ପ୍ରତି ଲିଟର ପିଛା ବୃଦ୍ଧି ପାଇଥିଲା।
ସୂଚନାଯୋଗ୍ୟ, ପ୍ରତି ମାସର ୧ ଏବଂ ୧୬ ତାରିଖରେ ବିମାନ ଇନ୍ଧନ ମୂଲ୍ୟ ସଂଶୋଧନ କରାଯାଇଥାଏ। ଅପରପକ୍ଷରେ ପ୍ରତିଦିନ ଉଭୟ ପେଟ୍ରୋଲ ଏବଂ ଡିଜେଲର ମୂଲ୍ୟ ପରିବର୍ତ୍ତନ ତୈଳ ବିପଣନ କମ୍ପାନୀଗୁଡିକ କରିଥାନ୍ତି।
ଚଳିତ ବର୍ଷ ମାର୍ଚ୍ଚ ୧୬ ରେ ଏଟିଏଫ୍ ମୂଲ୍ୟରେ ୧୮.୩% ସହ ବଡ଼ ମୂଲ୍ୟ ବୃଦ୍ଧି ହୋଇଥିଲା। ଏହାପରେ ଏପ୍ରିଲ ୧ରେ ମଧ୍ୟ ଏହାର ମୂଲ୍ୟରେ ୨% ବୃଦ୍ଧି ଘଟିଥିଲା। ବର୍ତ୍ତମାନର ବୃଦ୍ଧି ପରେ ମୁମ୍ବାଇର ଏଟିଏଫ୍ ମୂଲ୍ୟ କିଲୋଲିଟର ପିଛା ୧,୧୧,୯୮୧.୯୯ ଟଙ୍କା ହୋଇଛି। ଏହା କୌଣସି ବିମାନ କମ୍ପାନୀର ପରିଚାଳନା ଖର୍ଚ୍ଚରେ ପ୍ରାୟ ୪୦%ର ଅଂଶ ରଖୁଥିବା କୁହାଯାଇଛି।
