ନୂଆଦିଲ୍ଲୀ: ରାଷ୍ଟ୍ରାୟତ୍ତ ଏୟାର ଇଣ୍ଡିଆର ଘରୋଇକରଣ ଚଳିତ ବର୍ଷ ସମ୍ପୂର୍ଣ୍ଣ ହୋଇ ନ ପାରେ। ଏହା ଆସନ୍ତା ଆର୍ଥତ୍କ ବର୍ଷକୁ ଘୁଞ୍ଚିବା ନେଇ ଏକ ରିପୋର୍ଟ ସାମ୍ନାକୁ ଆସିଛି। ଚଳିତ ଆର୍ଥତ୍କ ବର୍ଷରେ ଆଉ ୩ ମାସ ସମୟ ରହିଛି। ଏହି ସ୍ବଳ୍ପ ସମୟ ମଧ୍ୟରେ ସବୁ କାମକୁ ଶେଷ କରିବା ହୁଏତ କଷ୍ଟକର ବୋଲି କୁହାଯାଉଛି। ଏୟାର ଇଣ୍ଡିଆ ଲାଗି ଟାଟା ଗ୍ରୁପ ଏବଂ ଆମେରିକା ଭିତ୍ତିକ ଫଣ୍ଡ ହାଉସ ଇଣ୍ଟରପ୍ଲସ ଇଙ୍କ ଭଳି ଅନ୍ୟ କିଛି କମ୍ପାନୀ ଆଗ୍ରହ ଦେଖାଇଛନ୍ତି। ଗତ ସପ୍ତାହରେ ପ୍ରାଥମିକ ବିଡ୍ ଦାଖଲ ପ୍ରକ୍ରିୟା ଶେଷ ହୋଇଛି। ସେହିଭଳି ଏୟାର ଇଣ୍ଡିଆର ଏକ କର୍ମଚାରୀଙ୍କ ଗୋଷ୍ଠୀ ମଧ୍ୟ ଏକ୍ସପ୍ରେସନ ଅଫ୍ ଇଣ୍ଟରେଷ୍ଟ(ଇଓଆଇ) ଦାଖଲ କରିଥିବା ଜଣାପଡିଛି। ଇଣ୍ଟରପ୍ଲସ ସହ ଚୁକ୍ତିରେ ଏମାନେ ବିଡ୍ ଦାଖଲ କରିଛନ୍ତି। ବିଡ୍ରେ କେଉଁମାନେ ସଫଳ ହେବେ ସେ ନେଇ ଟ୍ରାଞ୍ଜାକଶନ ଆଡଭାଇଜର ଜାନୁୟାରୀ ୬ରେ ଘୋଷଣା କରିବେ। ଏହା ପରେ ବିଡରଙ୍କୁ ଏୟାର ଇଣ୍ଡିଆର ଡାଟା ରୁମ୍ ଆକସେସ୍ କରିବା ଲାଗି ସୁବିଧା ପ୍ରଦାନ କରାଯିବ। ଏହା ପରେ ବିଡରଙ୍କୁ ଶେୟାର କ୍ରୟ ଚୁକ୍ତି ମଧ୍ୟ ପ୍ରଦାନ କରାଯିବ। ପରେ ପରେ ଫାଇନାନ୍ସ ବିଡ୍ ସଂକ୍ରାନ୍ତ କାର୍ଯ୍ୟପନ୍ଥା ହାତକୁ ନିଆଯିବ ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ ସୂଚନା ଦେଇଛନ୍ତି।
