ନୂଆଦିଲ୍ଲୀ,୨୮।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ସମସ୍ତ ମନ୍ତ୍ରଣାଳୟ ଏବଂ ବିଭାଗକୁ ତୁରନ୍ତ ଏୟାର ଇଣ୍ଡିଆର ବକେୟା ଦେୟ ପୈଠ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ ବର୍ତ୍ତମାନ ଟିକେଟ କେବଳ ନଗଦ ଆକାରରେ କିଣିବାକୁ କୁହାଯାଇଛି। ଟାଟା ଗ୍ରୁପର ଏକ ଅଂଶ ହେବା ପରଠାରୁ ଏୟାର ଇଣ୍ଡିଆ କ୍ରେଡିଟ ସୁବିଧା ଉପରେ ପ୍ରତିବନ୍ଧକ ଲଗାଇଛି।
ଅର୍ଥ ମନ୍ତ୍ରଣାଳୟର ବ୍ୟୟ ବିଭାଗ ପକ୍ଷରୁ ଏକ ମେମୋରେଣ୍ଡମ୍ରେ ଏସମ୍ପର୍କରେ ସୂଚନା ପ୍ରଦାନ କରାଯାଇଛି। ସରକାରଙ୍କ ଏହି ପଦକ୍ଷେପ ପରେ ଏୟାର ଇଣ୍ଡିଆରେ ମାଗଣାରେ ଯାତ୍ରା କରୁଥିବା ସରକାରୀ କର୍ମଚାରୀଙ୍କୁ ବର୍ତ୍ତମାନ ଏୟାର ଇଣ୍ଡିଆରେ ଯାତ୍ରା ପାଇଁ ଟଙ୍କା ଦେବାକୁ ପଡିବ। ସରକାରୀ ବାବୁ ଏବେ ଏୟାର ଇଣ୍ଡିଆରେ ବିମାନ ଯାତ୍ରା ଖର୍ଚ୍ଚ ନିଜେ ବହନ କରିବେ।
ପୂର୍ବରୁ ସରକାରୀ ଅଧିକାରୀଙ୍କ ଏୟାର ଇଣ୍ଡିଆ ଯାତ୍ରା ଖର୍ଚ୍ଚ ସରକାର ବହନ କରୁଥିଲେ। ୨୦୦୯ଠାରୁ ଏୟାର ଇଣ୍ଡିଆରେ ଏପରି ସୁବିଧା ଆରମ୍ଭ ହୋଇଥିଲା, ଯେଉଁଥିରେ ଘରୋଇ ତଥା ଆନ୍ତର୍ଜାତୀୟ ବିମାନ ଉଡ଼ାଣ କ୍ଷେତ୍ରରେ ଭାରତ ସରକାରଙ୍କ ବିଭିନ୍ନ ମନ୍ତ୍ରଣାଳୟ ଏବଂ ବିଭାଗୀୟ ଅଧିକାରୀମାନେ ସରକାରୀ ଖର୍ଚ୍ଚରେ ଯାତ୍ରା କରିପାରିବେ। ପରେ ତାଙ୍କ ଦ୍ୱାରା ହୋଇଥିବା ବିମାନ ଯାତ୍ରା ଟିକେଟ ମୂଲ୍ୟ ଏୟାର ଇଣ୍ଡିଆକୁ କେନ୍ଦ୍ର ସରକାରଙ୍କ ପକ୍ଷରୁ ପ୍ରଦାନ କରାଯାଉଥିଲା।
ସୂଚନାଯୋଗ୍ୟ ଯେ ଗତ କିଛି ବର୍ଷ ଧରି ଏୟାର ଇଣ୍ଡିଆର ଭାରତ ସରକାରଙ୍କ ଉପରେ ବହୁତ ବକେୟା ରହିଛି।
କେନ୍ଦ୍ର ସରକାର ଏୟାର ଇଣ୍ଡିଆରୁ ପୁଞ୍ଜି ପ୍ରତ୍ୟାହାର କରିଛନ୍ତି। ବର୍ତ୍ତମାନ ଏହା ଟାଟା ଗ୍ରୁପର। ଏଭଳି ପରିସ୍ଥିତିରେ ଏୟାର ଇଣ୍ଡିଆ ପକ୍ଷରୁ ବିମାନ ଟିକେଟ କିଣିବା ଉପରେ ବକେୟା ସୁବିଧା ବନ୍ଦ କରାଯାଇଛି। ଏହି ମେମୋରେଣ୍ଡମ୍ ଅନୁଯାୟୀ ମନ୍ତ୍ରଣାଳୟ କିମ୍ବା ବିଭାଗୀୟ ଅଧିକାରୀମାନେ ପରବର୍ତ୍ତୀ ନିର୍ଦ୍ଦେଶନାମା ପର୍ଯ୍ୟନ୍ତ କେବଳ ନଗଦ ମାଧ୍ୟମରେ ଏୟାର ଇଣ୍ଡିଆ ଟିକେଟ କିଣି ପାରିବେ।
