ନବରଙ୍ଗପୁର,୧୬।୧(ବି.ପ୍ର.): ନବରଙ୍ଗପୁର ଜିଲା ସାମାଜିକ ଓ ଆର୍ଥିକ ବିକାଶ କାର୍ଯ୍ୟକ୍ରମରେ ଅଧିକ ହିତାଧିକାରୀଙ୍କୁ ସାମିଲ କରିବା ଲକ୍ଷ୍ୟରେ ଖଣିଜ ଓ ବସ୍ତୁ ପ୍ରଯୁକ୍ତି ବିଜ୍ଞାନ ପ୍ରତିଷ୍ଠାନ ନିର୍ଦ୍ଦେଶକ ପ୍ରଫେସର ଶୁଦ୍ଧସ୍ବତ ବାସୁଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଜିଲାର ବିଭିନ୍ନ ବ୍ଲକ ପରିଦର୍ଶନ କରିଛି।
ଇନ୍ଦ୍ରାବତୀ ବୁଡ଼ି ଅଞ୍ଚଳରେ ବିକାଶର ନୂତନ ସମ୍ଭାବନାକୁ ଅନୁଧ୍ୟାନ କରିବା ସହ ଜିଲାର ଆଖୁ, ସୁଗନ୍ଧି ଫସଲ ଓ ମାଛ ଚାଷ, ଉଦ୍ୟୋଗୀ ବିକାଶ ଦିଗରେ ନୂତନ ଯୋଜନା କାର୍ଯ୍ୟକାରୀ କରିବା ନେଇ ଜିଲାପାଳ ଡ. କୋମଳ ଲୋଚନ ମିଶ୍ର ଓ ଜିଲା ଅଧିକାରୀଙ୍କ ସହିତ ବିସ୍ତୃତ ଆଲୋଚନା କରାଯାଇଥିଲା l
ମାର୍ଚ୍ଚ ଶେଷ ସୁଦ୍ଧା ନବରଙ୍ଗପୁରରେ ଜିଲାର ଫଳ ଓ ପନିପରିବାରୁ ମୂଲ୍ୟଯୁକ୍ତ ସାମଗ୍ରୀ ପ୍ରସ୍ତୁତ ପାଇଁ ଜିଲା ପ୍ରଶାସନ ସହିତ ଆଲୋଚନା କରାଯାଇଥିଲା। ଜିଲାରେ ଚାଷ ହେଉଥିବା ମକା ନଡ଼ାକୁ ବ୍ୟବହାର କରି ମୂଲ୍ୟଯୁକ୍ତ ସାମଗ୍ରୀ ପ୍ରସ୍ତୁତ ଦିଗରେ ଭାରତୀୟ ପେଟ୍ରୋଲିୟମ ସଂସ୍ଥାନ ପକ୍ଷରୁ ଉମରକୋଟରେ ଏକ ପାଇଲଟ୍ ପ୍ରକଳ୍ପ ମାର୍ଚ୍ଚ ଶେଷ ସୁଦ୍ଧା କରାଯିବ। ଏ ଦିଗରେ ପ୍ରଶାସନ ସହଯୋଗ କରନ୍ତୁ ବୋଲି ନିର୍ଦ୍ଦେଶକ ବାସୁ ଅନୁରୋଧ କରିଥିଲେ। ଜୈବସାର ବ୍ୟବହାର ଓ ନୂତନମାନର ଗୁଡଭାଟି ପ୍ରତିଷ୍ଠା ଦିଗରେ ପଦକ୍ଷେପ ଗ୍ରହଣ କରିବା ନେଇ ଓରମାସ ପକ୍ଷରୁ ସହଯୋଗ ଯୋଗାଇ ଦିଆଯିବ ଆଲୋଚନା ହୋଇଥିଲା । ଏହି ପରିଦର୍ଶନରେ ଖଣିଜ ଓ ବସ୍ତୁ ପ୍ରଯୁକ୍ତି ବିଜ୍ଞାନ ପ୍ରତିଷ୍ଠାନ ପ୍ରଧାନ ବୈଜ୍ଞାନିକ ଡ. ସତ୍ୟଜିତ ରଥ, ନବରଙ୍ଗପୁର ଜିଲାରେ କାର୍ଯ୍ୟକାରୀ ହେଉଥବା ପ୍ରକଳ୍ପ ପରାମର୍ଶ ଅଧିକାରୀ ସନ୍ତୋଷ କୁମାର ମିଶ୍ର, ପ୍ରଧାନ ବୈଷୟିକ ଅଧିକାରୀ ବିଭୁଦତ୍ତ ପ୍ରଧାନ, ବିଜ୍ଞାନ ଓ କାରିଗରି ବିଦ୍ୟା ପ୍ରକଳ୍ପ କ୍ରିୟାନ୍ବୟନ କମିଟି ସଦସ୍ୟ ଲକ୍ଷ୍ମୀନାରାୟଣ ବକ୍ସି ଉପସ୍ଥିତ ଥିଲେ।
