ତେନ୍ତୁଳିଖୁଣ୍ଟି, ୨୦।୯(ଡି.ଏନ୍.ଏ.):୫ ବର୍ଷ ହେବ ଅଙ୍ଗନଓ୍ବାଡି କୋଠାକୁ ବିପଦସଙ୍କୁଳ ଘୋଷଣା କଲା ପ୍ରଶାସନ। କିନ୍ତୁ ନୂତନ ଅଙ୍ଗନଓ୍ବାଡି କୋଠା ତିଆରି ଦିଗରେ କୌଣସି ପଦକ୍ଷେପ ନେଲେନାହିଁ। ଏହା ଭିତରେ ଗାଁର ଜଣେ ବ୍ୟକ୍ତିଙ୍କ ଗୁହାଳରେ ଏବେ ପିଲାଙ୍କ ଭବିଷ୍ୟତ ଗଢ଼ା ଚାଲିଛି। ଉକ୍ତ ଘରେ ସକାଳେ ଅଙ୍ଗନଓ୍ବାଡି ପିଲାମାନେ ପଢ଼ୁଥିବାବେଳେ ରାତିରେ ସେଠାରେ ଗାଈ ଗୋରୁବନ୍ଧା ହେଉଛନ୍ତି। ତୁରନ୍ତ ଅଙ୍ଗନଓ୍ବାଡି ଗୃହ ତିଆରି କରିବାକୁ ଦାବି କରିଛନ୍ତି ଅଞ୍ଚଳବାସୀ।
ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ବ୍ଲକ ଦିଗି ପଞ୍ଚାୟତ ଗାଦବାଗୁଡା ଗ୍ରାମରେ ଅଙ୍ଗନଓ୍ବାଡ଼ି କର୍ମୀ ନିଯୁକ୍ତି ପାଇଛନ୍ତି। ସହାୟିକା ମଧ୍ୟ ଅଛନ୍ତି। ୫ବର୍ଷ ତଳେ ଗାଁରେ ଥିବା ଅଙ୍ଗନଓ୍ବାଡ଼ି ଗୃହକୁ ବିପଦସଙ୍କୁଳ ଘୋଷଣା କରି ପ୍ରଶାସନ ତାହାକୁ ବନ୍ଦ କରିଦେଲେ। ଏହା ମଧ୍ୟରେ କିନ୍ତୁ ନୂତନ ଅଙ୍ଗନଓ୍ବାଡ଼ି ଗୃହ ନିର୍ମାଣ ପାଇଁ ପ୍ରଶାସନ ପ୍ରୟାସ କରିନି। ଅଙ୍ଗନଓ୍ବାଡ଼ି କର୍ମୀ ପିଲାଙ୍କୁ ପାଠପଢ଼ା ଓ ଗର୍ଭବତୀଙ୍କୁ ଖାଦ୍ୟ ଦେବାକୁ ଗ୍ରାମର ଜନୈକ ବ୍ୟକ୍ତିଙ୍କ ସହଯୋଗ ଘର ସମ୍ମୁଖ ଏକ କୁଡିଆରେ ଅଙ୍ଗନଓ୍ବାଡ଼ି କାର୍ଯ୍ୟ ଆରମ୍ଭ କଲେ। ଉକ୍ତ ଚାଳ ଘରକୁ ସେ ବିନା ଅର୍ଥରେ ଯୋଗାଇ ଦେଇଛନ୍ତି। କିନ୍ତୁ ଉକ୍ତ ଚାଳଘରେ ସେ ତାଙ୍କ ଗାଈକୁ ବାନ୍ଧିବା ସହ ଖାଦ୍ୟ ଆଦି ପ୍ରଦନ କରନ୍ତି। ରାତିରେ ଗୁହାଳଭାବେ ବ୍ୟବହୃତ ଘରେ ପ୍ରାକ୍ ବିଦ୍ୟାଳୟ ଶିକ୍ଷା ଓ କୋମଳମତି ଶିଶୁଙ୍କୁ ଖାଦ୍ୟ ଦେବା କେତେଦୂର ନିରାପଦ ବୋଲି ଅଞ୍ଚଳବାସୀ ପ୍ରଶ୍ନ କରିଛନ୍ତି। ତେନ୍ତୁଳିଖୁଣ୍ଟି ବ୍ଲକରେ କେଉଁଠି ଅଙ୍ଗନବାଡ଼ି କେନ୍ଦ୍ର ପାଇଁ କାର୍ଯ୍ୟ ଆରମ୍ଭ ହୋଇ ଅଧାରୁ ବନ୍ଦ ତ କେଉଁଠି ଏମ୍ଜିଏନ୍ଆର୍ଇଜିଏସ୍ର ମେଟେରିଆଲ ବିଲ ପାଇଁ ଅର୍ଥ ନ ଥିବାରୁ ଅଙ୍ଗନବାଡ଼ି ଗୃହ କାମ ଅଟକିଛି। କେନ୍ଦ୍ର ଭଙ୍ଗା ଦଦରା ଯୁବକ ସଂଘ ଗୃହରେ ଚାଲିଛି। ପରଜାବାରଙ୍ଗ ପଦର ଗ୍ରାମର ଅଙ୍ଗନବାଡ଼ି ଗୃହ ଭଙ୍ଗା ଦଦରା ଯୁବକ ସଂଘ ଘରେ ଚାଲିଛି ଅଥଚ ଅର୍ଥ ନ ଥିବାରୁ କାମ ଅଧାରେ ଅଟକିଛି। ୨୦୨୦ ନୂତନ ଶିକ୍ଷା ନୀତିରେ ପ୍ରାକ ବିଦ୍ୟାଳୟ ଶିକ୍ଷାକୁ ଗୁରୁତ୍ୱ ଦିଆ ଯାଇଥିବା ବେଳେ କ’ଣ ଏଭଳି ଗୁହାଳ ଘର ବା ଯୁବକ ସଂଘ ଘରେ ପ୍ରାକ ବିଦ୍ୟାଳୟ ଶିକ୍ଷା ଦିଆଯାଉଥିବ ବୋଲି ପ୍ରଶ୍ନ କରିଛନ୍ତି ବୁଦ୍ଧିଜୀବୀ। ଏ ନେଇ ଶିଶୁ ବିକାଶ ପ୍ରକଳ୍ପ ଅଧିକାରୀ ସୁରମା ମହାପାତ୍ରଙ୍କୁ ପଚାରିବାରୁ ଉକ୍ତ କେନ୍ଦ୍ରର ନୂତନ ଗୃହ ପାଇଁ ଅର୍ଥ ଆସିଯାଇଛି। ଖୁବଶୀଘ୍ର କାମ ଆରମ୍ଭ ହେବ ବୋଲି ସେ କହିଛନ୍ତି।
