ଭୁବନେଶ୍ୱର,୧୯ା୭(ସତ୍ୟଜିତ୍ ରାଉତ):ନିଖିଳ ଓଡ଼ିଶା ଠିକାଦାର ମହାସଂଘକୁ ବିଜେଡି ସରକାର ଧୋକା ଦେଇଥିବା ଅଭିଯୋଗ ହୋଇଛି। ଦୀର୍ଘ ୨୫ବର୍ଷ ହେବ ଓଡ଼ିଶାର କାମକୁ ଅନ୍ୟ ରାଜ୍ୟର ଠିକାଦାରମାନଙ୍କୁ ଦେଇ ଓଡ଼ିଶାର ଠିକାଦାରମାନଙ୍କ ସହ ଛଳନା କରାଯାଇଥିବା ଠିକାଦାର ସଂଘ ପକ୍ଷରୁ ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବି କରାଯାଇଛି। ଏନେଇ ସଂଘ ପକ୍ଷରୁ ଭୁବନେଶ୍ୱର ମଞ୍ଚେଶ୍ୱର ଥାନାରେ ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିରୋଧରେ ଏତଲା ଦିଆଯାଇଛି। ପୂର୍ବ ବିଜେଡି ସରକାର ଠିକାଦାରଙ୍କ ଦାବିଗୁଡିକୁ ପୂରଣ କରିବାକୁ କମିଟି ଗଢ଼ିଥିବାବେଳେ ଏହି ସଦସ୍ୟମାନେ ଚୁପ ବସିଯାଇଥିଲେ। ତେଣୁ କମିଟି ସଦସ୍ୟ ଥିବା ପୂର୍ବତନ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ, ପୂର୍ବତନ ଖଣି ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ, ପୂର୍ବତନ ପଞ୍ଚାୟତିରାଜ ମନ୍ତ୍ରୀ ପ୍ରତାପ ଜେନା, ପୂର୍ବତନ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି, ପୂର୍ବତନ ଶ୍ରମ ମନ୍ତ୍ରୀ ସୁଶାନ୍ତ ସିଂ, ପୂର୍ବତନ ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ ଓ ବର୍ତ୍ତମାନର ପୂର୍ତ୍ତ ବିଭାଗ ସଚିବ ବୀରବିକ୍ରମ ଯାଦବଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଦାବି କରି ଠିକାଦାର ସଂଘ ଏତଲା ଦେଇଛି। ସଂଘର ସଭାପତି ପ୍ରଭାତ ଦାଶ ଏହି ଲିଖିତ ଅଭିଯୋଗ କରିଛନ୍ତି। ଏତଲା ଅନୁଯାୟୀ, ୨୦୧୯ରେ ଠିକାଦାର ସଂଘ ପକ୍ଷରୁ ୧୦ ଦଫା ଦାବି ନେଇ ଧାରଣା ଦିଆଯାଇଥିଲା। ଉକ୍ତ ଆନ୍ଦୋଳନରେ ୧୫ ହଜାର ଠିକାଦାର ସାମିଲ ହୋଇଥିଲେ। ସଂଘର ଦାବି ରହିଛି ଯେ, ୫୦ କୋଟି ଟଙ୍କା ପର୍ଯ୍ୟନ୍ତ ଟେଣ୍ଡର ପାଇବାକୁ ଥିବା ମାନଦଣ୍ଡଗୁଡ଼ିକୁ ଉଠାଇ ଦିଆଯାଉ। ୫୦ କୋଟି ଟଙ୍କା ପର୍ଯ୍ୟନ୍ତ ଟେଣ୍ଡରଗୁଡିକୁ ଲାଇସେନ୍ସ ଭିତ୍ତିରେ ଓଡ଼ିଶାର ଠିକାଦାରମାନଙ୍କୁ ଦିଆଯାଉ। ଓଡ଼ିଶାର ବିଭିନ୍ନ କାମକୁ ଏକାଠି କରି ବଡ଼ ମୂଲ୍ୟର ଟେଣ୍ଡର କରା ନ ଯାଉ। ୫୦ କୋଟି ଯାଏ କୌଣସି ଟେଣ୍ଡରକୁ ଅନ୍ୟ ରାଜ୍ୟର ଠିକାଦାରଙ୍କୁ ଦିଆ ନ ଯାଉ। ପ୍ରତିବର୍ଷ ଟେଣ୍ଡର ମୂଲ୍ୟରେ ପରିବର୍ତ୍ତନ କରାଯାଉ ଆଦି ୧୦ ଦଫା ଦାବି ଉଲ୍ଲେଖ କରାଯାଇଛି। ଏହାପରେ ୨୦୧୯ ଡିସେମ୍ବର ୧୭ରେ ରାଜ୍ୟ ସରକାର ଏକ ୭ଜଣିଆ କମିଟି ଗଠନ କରିଥିଲେ। ଏହି କମିଟିରେ ନିରଞ୍ଜନ ପୂଜାରୀ ଅଧ୍ୟକ୍ଷ ଏବଂ ବୀର ବିକ୍ରମ ଯାଦବ ସଂଯୋଜକ ଦାୟିତ୍ୱରେ ଥିଲେ। ଗୋଟିଏ ମାସକ ମଧ୍ୟରେ ସେମାନଙ୍କ ଦାବି ପୂରଣ କରାଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। ହେଲେ ଦୀର୍ଘ ୫ ବର୍ଷ ଧରି ଠିକାଦାର ସଂଘ ସହ ବିଜେଡି ସରକାର ଛଳନା କରିଥିବା ସଭାପତି ଦାଶ ଅଭିଯୋଗ କରିଛନ୍ତି।
