ନୂଆଦିଲ୍ଲୀ,୨୦।୬: ଲୋକ ସଭା ବାଚସ୍ପତି ପ୍ରସଙ୍ଗରେ ଏନଡିଏ ଧ୍ମଧ୍ୟରେ ଭାଜପା ପ୍ରାୟ ଏକ ସହମତି ହାସଲ କରିଛି। ଭାଜପା ପ୍ରାର୍ଥୀ ସହଯୋଗୀମାନଙ୍କଠାରୁ ସମ୍ପୂର୍ଣ୍ଣ ସମର୍ଥନ ପାଇଛନ୍ତି। ବର୍ତ୍ତମାନ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏହି ପ୍ରସଙ୍ଗରେ ବିରୋଧୀଙ୍କ ସହ ସହମତି ପ୍ରକାଶ କରିବାକୁ ଚେଷ୍ଟା କରୁଛନ୍ତି। ଉପବାଚସ୍ପତି ପ୍ରସଙ୍ଗରେ ଶାସକ ଦଳ ଏବଂ ବିରୋଧୀ ଦଳ ମଧ୍ୟରେ ବିବାଦ ହୋଇପାରେ।
ଜୁନ ୨୪ରୁ ସଂସଦ ଅଧିବେଶନ ପୂର୍ବରୁ ଏକମତ ହେବା ପାଇଁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ବିରୋଧୀ ଦଳର ନେତାଙ୍କ ସହ ଆଲୋଚନା କରିବେ। ସରକାରଙ୍କ ପ୍ରଥମ ପ୍ରୟାସ ହେଉଛି ସେହି ବିରୋଧୀ ଦଳଗୁଡ଼ିକ ସହିତ ସମନ୍ବୟ ସ୍ଥାପନ କରିବା, ଯେଉଁମାନଙ୍କ ସହିତ ଭାଜପାର ସମ୍ପର୍କ ଅଧିକ ଭଲ, କିନ୍ତୁ ଏହି ଦଳଗୁଡିକ ଇଣ୍ଡିଆ ଆଲାଏନ୍ସରେ ମଧ୍ୟ ସାମିଲ ନୁହଁନ୍ତି। ଏଥି ମଧ୍ୟରେ ବିଜେଡି, ବିଆର୍ଏସ୍ ଏବଂ YSRCP ସାମିଲ ଅଛି। ଏହା ପରେ ଦ୍ୱିତୀୟ ପର୍ଯ୍ୟାୟରେ କଂଗ୍ରେସ ସମେତ ଅନ୍ୟ ଦଳ ସହ ସହମତି ହାସଲ କରିବାକୁ ଉଦ୍ୟମ କରାଯିବ।
ଏହାପୂର୍ବରୁ ଏନଡିଏର ସହଯୋଗୀମାନଙ୍କ ସହ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଘରେ ଅନୁଷ୍ଠିତ ବୈଠକରେ ଭାଜପାର ବାଚସ୍ପତି ପ୍ରାର୍ଥୀଙ୍କୁ ସମର୍ଥନ କରିବା ପ୍ରସଙ୍ଗରେ ସମସ୍ତଙ୍କ ସମ୍ମତି ନିଆଯାଇଥିଲା। ବାଚସ୍ପତି ପଦବୀ ବଜାୟ ରଖିବା ପରେ ଭାଜପା ଉପବାଚସ୍ପତି ପଦବୀକୁ ନିଜ ଶିବିରର ସହଯୋଗୀଙ୍କୁ ଦେବାକୁ ଚିନ୍ତା କରୁଛି ବୋଲି ଆଲୋଚନା ହେଉଛି। ଯଦି ଏହା ଘଟେ, ତେବେ ଶାସକ ଦଳ ଏବଂ ବିରୋଧୀ ମଧ୍ୟରେ ସଂସଦରେ ପ୍ରଥମ ବିବାଦ ଏହି ପ୍ରସଙ୍ଗରେ ଦେଖାଯାଇପାରେ।
