ନୂଆଦିଲ୍ଲୀ,୩।୩: କରୋନା ମହାମାରୀ ପରେ ଏବେ ଦେଶରେ ସୃଷ୍ଟି ହୋଇଥିବା ମହଙ୍ଗା ମାଡ଼ ଯୋଗୁ ସଙ୍କଟ ଦେଖାଦେଇଛି। କରୋନା ଯୋଗୁ ବହୁ ଲୋକ ଚାକିରି ହରାଇ ବେରୋଜାଗାର ହୋଇଯାଇଛନ୍ତି। ଏହା କର୍ମଜୀବୀଙ୍କଠାରୁ ଆରମ୍ଭ କରି ଶ୍ରମିକ, ଛୋଟ ବ୍ୟବସାୟୀ ସଭିଙ୍କୁ ପ୍ରଭାବିତ କରିଛି। ଲୋକଙ୍କ ହାତରେ ଟଙ୍କା ନ ଥିବାବେଳେ ଦରଦାମ ବୃଦ୍ଧି ବେଡି ଉପରେ କୋରାଡ଼ା ମାଡ଼ ପରି ମନେ ହେଉଥିବା ଅର୍ଥଶାସ୍ତ୍ରୀ ମତପୋଷଣ କରୁଛନ୍ତି। ଏହାଦ୍ୱାରା ଦେଶର ମଧ୍ୟବିତ୍ତ ଅଧିକ ପ୍ରଭାବିତ ହୋଇଛନ୍ତି। ମଧ୍ୟବିତ୍ତ ପରିବାରର ଆର୍ଥିକ ମେରୁଦଣ୍ଡ ଦୋହଲି ଯାଇଛି। ପେଟ୍ରୋଲ-ଡିଜେଲ, ଗ୍ୟାସ୍, ସିଏନ୍ଜି, ପ୍ଲାଟଫର୍ମ ଟିକଟ, ଟ୍ରେନ୍, ବିମାନ ଭଡ଼ା ଆଦି ବଢ଼ିଛି। ଏହାଯୋଗୁ ଅତ୍ୟାବଶ୍ୟକ ସାମଗ୍ରୀର ଦାମ ଅପହଞ୍ଚ ହେବାରେ ଲାଗିଛି। ପେଟ୍ରୋଲ ଡିଜେଲ୍ ଉପରେ ୬୦ ପ୍ରତିଶତ ଟିକସ କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ଲାଗୁହୋଇଛି। ଫଳରେ ୩୬ ଟଙ୍କାର ପେଟ୍ରୋଲ ଦାମ ଉପରେ ୫୫ ଟଙ୍କା ଟିକସ ବୋଝ ଲଦି ହୋଇଯାଇଛି। ପେଟ୍ରୋଲ ଲିଟର ଦାମ ୯୧ ଟଙ୍କାରେ ପହଞ୍ଚିଛି। ୨୦୨୧ ଫେବୃୟାରୀ ୧୫ରେ ଦିଲ୍ଲୀରେ ପେଟ୍ରୋଲ ଦାମ ଲିଟର ପିଛା ୮୮.୯୯ ଟଙ୍କା ଥିଲା। ଏବେ ଏହା ୯୧.୧୭ ଟଙ୍କାରେ ପହଞ୍ଚିଛି। ସେହିପରି ୨୦୨୦ ଡିସେମ୍ବର ୧ରେ ଗ୍ୟାସ ସିଲିଣ୍ଡର ଦାମ ୫୯୪ ଟଙ୍କା ଥିଲା। ଏବେ ଏହା ୨୨୫ ଟଙ୍କା ବୃଦ୍ଧି ପାଇ ୮୧୯ ଟଙ୍କା ଛୁଇଁଛି। ଅପରପକ୍ଷରେ ପ୍ଲାଟଫର୍ମ ଟିକଟ, ଟ୍ରେନ୍, ବିମାନ ଭଡ଼ା ଓ ବସ ଭଡ଼ା ବୃଦ୍ଧିର ନକାରାତ୍ମକ ପ୍ରଭାବ ପରିବହନ ବ୍ୟବସ୍ଥା ଉପରେ ପଡ଼ିଛି। ଏହାଯୋଗୁ ଅତ୍ୟାବଶ୍ୟକ ସାମଗ୍ରୀ ପରିବହନ ଭଡ଼ାରେ ବୃଦ୍ଧି ଘଟିଛି। ଫଳରେ ଅତ୍ୟାବଶ୍ୟକ ସାମଗ୍ରୀ ଦାମ ବଢ଼ିବାରେ ଲାଗିଛି।
