ନୂଆଦିଲ୍ଲୀ,୧୯।୯: ପେମେଣ୍ଟ ଏବଂ ଫାଇନାନ୍ସ ସେବା ଯୋଗାଉଥିବା ଆପ୍ଲିକେଶନ ପେଟିଏମ୍କୁ ଗୁଗଲ ଏହାର ପ୍ଲେ ଷ୍ଟୋରରୁ ଶୁକ୍ରବାର ହଟାଇଦେଇଥିଲା। ଏହାର ଘଣ୍ଟାଏ ପରେ ଉକ୍ତ ଆପ୍ ପୁଣିଥରେ ପ୍ଲେ ଷ୍ଟୋରରେ ଉପଲବ୍ଧ ହେଉଥିବା ପେଟିଏମ୍ ସୂଚନା ଦେଇଛନ୍ତି। ଅପରପକ୍ଷରେ ପେଟିଏମ୍ର ଅନ୍ୟ ଆପ୍ଲିକେଶନ ଯଥା ପେଟିଏମ୍ ମଲ୍, ପେଟିଏମ୍ ମନି ଉପରେ କୌଣସି କଟକଣା ଲାଗି ନାହିଁ। ଏଗୁଡିକ ପୂର୍ବଭଳି କାର୍ଯ୍ୟ କରୁଥିବା ଜଣାପଡିଛି। ନୀତି ଉଲ୍ଲଂଘନ ଅଭିଯୋଗ ଆସିବାରୁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା ବୋଲି ଗୁଗଲ ପକ୍ଷରୁ ସୂଚନା ଦିଆଯାଇଛି। ଆଇପିଏଲ୍ ଆରମ୍ଭ ହେବାର ଗୋଟିଏ ଦିନ ଆଗରୁ ଏଭଳି କାର୍ଯ୍ୟାନୁଷ୍ଠାନ ହୋଇଥିବା ନଜରକୁ ଆସିଛି। ଗୁଗଲର ପ୍ରଡକ୍ଟ, ଆଣ୍ଡଏଡ ସିକ୍ୟୁରିଟି ଏବଂ ପ୍ରିଭେସି ଉପସଭାପତି ସୁଜେନ ଫ୍ରେ ଏକ ବ୍ଲଗ୍ ପୋଷ୍ଟରେ କହିଛନ୍ତି ଯେ, କ୍ରୀଡ଼ା କ୍ଷେତ୍ରରେ ଅନ୍ଲାଇନ ଜୁଆ ଏବଂ ଅନିୟନ୍ତ୍ରିତ ଜୁଆ ଆପ୍ଗୁଡିକୁ ଅନୁମତି ପ୍ରଦାନ କରାଯାଉନାହିଁ। କୌଣସି ଟୁର୍ନାମେଣ୍ଟ ଲାଗି ବାଜି ଲଗାଇ ପ୍ରକୃତ କ୍ୟାଶ ପ୍ରାଇଜ ଜିତିବା, ଆପ୍ ସହାୟତାରେ ଅନ୍ୟ ବାହ୍ୟ ଓ୍ବେବ୍ସାଇଟକୁ ସଂଯୋଗ କରିବା ଭଳି ପ୍ରସଙ୍ଗର ଗୁଗଲ ନିୟମକୁ ଉଲ୍ଲଂଘନ କରିଥିବା ଦେଖାଯାଇଛି। ୟୁଜରଙ୍କ ସୁରକ୍ଷାକୁ ନଜରରେ ରଖି ଗୁଗଲ ବିିଭିନ୍ନ ନିୟମ ଲାଗୁ କରିଛି। ଯଦି କୌଣସି ଆପ୍ ଏହାର ବିରୋଧ କରୁଥାନ୍ତି ତାଙ୍କୁ ଏ ନେଇ ତାଗିଦ କରାଯିବା ସହ ପ୍ଲେ ଷ୍ଟୋରରୁ ହଟାଯାଇଥାଏ। ଯଦି ଡେଭଲପର ଅନୁପାଳନକୁ ବାରମ୍ବାର ନ ମାନନ୍ତି ତେବେ ତାଙ୍କ ଗୁଗଲ ପ୍ଲେ ଡେଭଲପର ଆକାଉଣ୍ଟ ବାଦ୍ ଦିଆଯାଇଥାଏ। ଏହି ନୀତି ସବୁ ଡେଭଲପରଙ୍କ ଲାଗି ସମାନ ଭାବେ ଲାଗୁ ହୋଇଥାଏ ବୋଲି ଫ୍ରେ କହିଛନ୍ତି। ଏହି ପ୍ରସଙ୍ଗ ଉପରେ ପେଟିଏମ୍ ପକ୍ଷରୁ ଟୁଇଟ ଯୋଗେ ଗ୍ରାହକଙ୍କୁ ଅବଗତ କରାଯାଇଥିଲା। କମ୍ପାନୀ କହିଥିଲା ଯେ, ଗୁଗଲ ପ୍ଲେ ଷ୍ଟୋରରୁ ପେଟିଏମ୍ ଅସ୍ଥାୟୀ ଭାବେ ହଟିଛି। ନୂଆ ଡାଉନଲୋଡ ଏବଂ ଅପ୍ଡେଟ କରିବାକୁ ଉପଲବ୍ଧ ହେବ ନାହିଁ। ଏହା ଶୀଘ୍ର ପ୍ଲେ ଷ୍ଟୋରକୁ ଫେରିବ। ଗ୍ରାହକଙ୍କ ଟଙ୍କା ସମ୍ପୂର୍ଣ୍ଣ ଭାବେ ସୁରକ୍ଷିତ ରହିଛି।
