କାନପୁର: ଆଜିର ସମାଜରେ ନାରୀଟିଏ ଯେତେ ଆତ୍ମନିର୍ଭରଶୀଳ ହେଲେ ବି ଯୌତୁକ ପ୍ରଥାରୁ ନିଜକୁ ମୁକାଳି ପାରୁନାହିଁ। ଅନେକ କ୍ଷେତ୍ରରେ ଝିଅଟିଏ ମରିମରି ବଞ୍ଚିବା ଲାଗି ବାଧ୍ୟ ହୋଇଥାଏ। କେବେ ଝିଅଙ୍କୁ ନିର୍ଯାତନା ଦିଆଯାଉଥିବା ବେଳେ ଅନେକ ଯୌତୁକ ଜୁଇରେ ଜଳିଥାନ୍ତି। ହେଲେ ଆଜିର ସମାଜରେ ଏଭଳି କିଛି ଲୋକ ଆଜି ବି ଅଛନ୍ତି, ଯିଏ ନିଜ ଝିଅପାଇଁ ପାହାଡ଼ ଭଳି ଛିଡ଼ା ହୋଇ ସମର୍ଥନ ଦେଇଥାନ୍ତି। ସବୁ ପରିସ୍ଥିତିରେ ତା ସହ ରହିଥାନ୍ତି। ଏଭଳି ଏକ ମାମଲା କାନପୁରରୁ ଆସିଛି, ଯେଉଁଠାରେ ଜଣେ ବାପା ଝିଅର ଛାଡ଼ପତ୍ର ପରେ ତାକୁ ବାଣ ଫୁଟାଇ, ବାଜା ବଜାଇ ଘରକୁ ପାଛୋଟି ଆଣିଛନ୍ତି। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।
ନିରାଲା ନଗରରେ ରହୁଥିବା ଅନିଲ ସବିତା ବିଏସ୍ଏନ୍ଏଲ୍ର ଅବସରପ୍ରାପ୍ତ କର୍ମଚାରୀ। ୨୦୧୬ ଜାନୁଆରୀ ୩୧ରେ ସେ ନିଜର ଏକମାତ୍ର ଝିଅ ଉର୍ବିଙ୍କ ବିବାହ ଚେକରୀ ବିମାନନଗରରେ ରହୁଥିବା ଆଶିଷ ରଞ୍ଜନଙ୍କ ସହ କରିଥିଲେ। ଉର୍ବି ପେସାରେ ଜଣେ ଇଞ୍ଜିନିୟର ଥିଲେ। ସେ ଦିଲ୍ଲୀରେ ପାଲମ ବିମାନବନ୍ଦରରେ କାର୍ଯ୍ୟରତ ଥିଲେ। ସେହିଭଳି ଆଶିଷ ମଧ୍ୟ ଇଞ୍ଜିନିୟର ଥିଲେ। ଦିଲ୍ଲୀରେ କାମ କରୁଥିଲେ। ଉଭୟ ଦିଲ୍ଲୀରେ ରହୁଥିଲେ ହେଁ ଆଶିଷଙ୍କ ପରିବାରଲୋକେ କାର୍ ଏବଂ ଫ୍ଲାଟ୍ ଦାବି କରୁଥିଲେ। ଏହାଛଡ଼ା ଉର୍ବିଙ୍କ ରଙ୍ଗକୁ ନେଇ ମଧ୍ୟ କଟାକ୍ଷ କରୁଥିଲେ। ଲଗାତାର ଭାବେ ଝିଅଙ୍କୁ ନିର୍ଯାତନା ଦିଆଯାଉଥିବା ଦେଖି ସେ ବାପା ମଧ୍ୟ ତାଙ୍କୁ ଏକ ଫ୍ଲାଟ୍ କିଣି ଦେଇଥିଲେ। ହେଲେ ଉର୍ବିଙ୍କ ସ୍ବାମୀ ଆଶିଷ ଘରକୁ ନିଜ ନାମରେ କରିବାକୁ ଚାହୁଁଥିଲେ।
୨୦୧୯ରେ ଉର୍ବିଙ୍କ ଏକ ଝିଅ ହୋଇଥିଲା। ଏହାକୁ ନେଇ ସ୍ବାମୀ ଏବଂ ପରିବାରଲୋକେ କଟାକ୍ଷ କରୁଥିଲେ। କାରଣ ତାଙ୍କୁ ପୁଅ ଦରକାର ଥିଲା। ଏପରିକି ସେ ଉର୍ବି ଏବଂ ଝିଅଙ୍କଠାରୁ ଦୂରେଇ ଯାଇ ଅଲଗା ରହିଥିଲେ। ଫେବୃଆରୀ ୨ରେ ଉଭୟଙ୍କ ଛାଡ଼ପତ୍ର ହୋଇଥିଲା। ଏହାପରେ ଗତ ରବିବାର ଉର୍ବିଙ୍କ ବାପା ନିଜର ସମ୍ପର୍କୀୟଙ୍କ ସହ ସମୁଦି ଘରେ ପହଞ୍ଚିଥିଲେ। ସେଠାରେ ସେ ଢ଼ୋଲ ବଜାଇ ନିଜ ଝିଅକୁ ଘରକୁ ଆଣି ଆସିଥିଲେ। ଉର୍ବି ଶାଶୁଘର ଫାଟକରେ ଓଢ଼ଣୀ ବାନ୍ଧିଥିଲେ। ଏପରିକି ଉର୍ବିଙ୍କ ଭାଇମାନେ ଆଶିଷଙ୍କ ଘରକୁ କେବେ ହେଲେ ଖୁସି ନ ଫେରୁ ବୋଲି ତାଙ୍କ ଘରର କାନ୍ଥରେ ଲେଖିଥିଲେ। ଏବେ ଏହାର ଭିଡିଓ ଭାଇରାଲ ହେଉଥିବା ବେଳେ ଦୁନିଆର ପ୍ରତିଟି ବାପା ଯଦି ଝିଅକୁ ବୋଝ ନ ଭାବି ଏଭଳି କରନ୍ତି ତେବେ ଆଉ କେଉଁ ଝିଅର ଜୀବନ ଯିବ ନାହିଁ ବୋଲି ଅନେକେ କହୁଛନ୍ତି।
#Watch: Kanpur man celebrates his daughter’s divorce, brings her home with Band-Baja. pic.twitter.com/RdPaq1Kmg8
— TIMES NOW (@TimesNow) April 30, 2024
