ରାଜନଗର, ୨୧।୮(ଭାସ୍କର ରାଉତରାୟ): କେନ୍ଦ୍ରାପଡ଼ା ଜିଲା ରାଜନଗର ବ୍ଲକର ଭିତରଗଡ଼ ପଞ୍ଚାୟତ ଚାରିପୋଖରିଆ ଗାଁରେ ଶନିବାରଠାରୁ ଝାଡ଼ାବାନ୍ତି ବ୍ୟାପିବାରେ ଲାଗିଛି। ଗାଁରେ ୨ଶହ ପରିବାର ଥିବା ବେଳେ ସେମାନଙ୍କ ମଧ୍ୟରୁ ୧୦୦ରୁ ଊର୍ଦ୍ଧ୍ୱ ପରିବାର ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆସି ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି। ଗାଁର ଅନ୍ୟ ରୋଗୀମାନେ ନିକଟସ୍ଥ ମେଡିସିନ ଷ୍ଟୋର ଓ ସ୍ବାସ୍ଥ୍ୟ ବିଭାଗ କ୍ୟାମ୍ପ୍ରୁ ଔଷଧ ନେଇ ଘରେ ଚିକିତ୍ସିତ ହେଉଛନ୍ତି। ଏହି ଗାଁରେ ସ୍ବାସ୍ଥ୍ୟ ବିଭାଗ ପକ୍ଷରୁ ଏକ ଅସ୍ଥାୟୀ କ୍ୟାମ୍ପ୍ ଖୋଲାଯାଇଥିବାବେଳେ ଟିମ୍ ଘରକୁ ଘର ବୁଲି ପ୍ରତିଷେଧକ ମେଡିସିନ ଦେଉଛି। ଗାଁରେ ଗୁରୁତର ରୋଗୀଙ୍କୁ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଉଛି।
ସୋମବାର ରାତିରୁ ମଙ୍ଗଳବାର ଭିତରେ ଅବିନାଶ ପାତ୍ର, ନବୀନ ସେଠୀ, ମଙ୍ଗଳ ସିଂ, ଅରୁଣ ବାରିକ, ପୁଷ୍ପଲତା ପ୍ରଧାନ, ସସ୍ମିତା ବାରିକ, ସୌମ୍ୟରଞ୍ଜନ ବେହେରା, ସଂଯୁକ୍ତା ଦାସ, ସସ୍ମିତା ସେଠୀ, ସତ୍ୟଜିତ୍ ପ୍ରଧାନ, ସିନ୍ଧୁ ସ୍ବାଇଁ, ଆଦିତ୍ୟ ବାରିକ, ଲକ୍ଷ୍ମୀପ୍ରିୟା ବାରିକ, ଦିବାକର ବାରିକ ପ୍ରମୁଖ ୧୪ଜଣ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଗୁରୁତର ଅବସ୍ଥାରେ ଭର୍ତ୍ତି ହୋଇଛନ୍ତି। ସେମାନଙ୍କ ମଧ୍ୟରୁ ଗୁରୁତର ଲକ୍ଷ୍ମୀପ୍ରିୟା ଓ ଦିବାକରଙ୍କୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଏହି ଗାଁରେ ସ୍ଥିତି ବିଗୁଡୁଥିବାରୁ କେନ୍ଦ୍ରାପଡ଼ା ଜିଲା ସ୍ବାସ୍ଥ୍ୟ ବିଭାଗ ଟିମ୍ ଓ ରାଜନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସାଧିକାରୀ ଡା. ରଶ୍ମିରଞ୍ଜନ ମହାନ୍ତି ଗାଁରେ ରହି ଲୋକଙ୍କୁ ପ୍ରତିଷେଧକ ଔଷଧ ଦେଇଛନ୍ତି। ଗଁାରେ ଥିବା ନଳକୂପ ନିକଟରେ ଜମିଥିବା ପାଣି ଓ ଆବର୍ଜନାକୁ ସଫାକରି ବ୍ଲିଚିଂ ପକାଇଛନ୍ତି। ଗାଁ ମଝିରେ ଥିବା ପଞ୍ଚାୟତ ପୋଖରୀ ପାଣି ଏହି ଝାଡ଼ାବାନ୍ତିର ମୂଳ କାରଣ ବୋଲି କୁହାଯାଉଛି। ଗାଁର ସମସ୍ତ ନର୍ଦ୍ଦମା ଓ ବର୍ଷାପାଣି ଏହି ପୋଖରୀକୁ ଆସିଥାଏ। ପୋଖରୀ ଚତୁଃପାର୍ଶ୍ୱରେ ଘର ରହିଥିବାରୁ ଗାଁ ଲୋକେ ସେହି ପୋଖରୀ ପାଣିରେ ବାସନକୁସନ ଧୁଆଧୋଇ କରିଥାନ୍ତି। ସ୍ବାସ୍ଥ୍ୟ ବିଭାଗ ପକ୍ଷରୁ ପୋଖରୀ ପାଣି, ନଳକୂପ ପାଣି ଓ ଝାଡ଼ା ସାମ୍ପୁଲ ପରୀକ୍ଷା ପାଇଁ ନିଆ ଯାଇଛି। ପୋଖରୀ ପାଣିରେ ଇକ୍ସେନ ଥିବା ପରୀକ୍ଷାରୁ ଜଣାପଡ଼ିଥିବା ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଉଛି।
