ମୁମ୍ବାଇ, ୨।୧:ଦୀର୍ଘ ୨୩ ବର୍ଷର ଲଢ଼େଇ ପରେ ଉତ୍ତରପ୍ରଦେଶର ଫିରୋଜାବାଦ ନିବାସୀ ହେମନ୍ତ ଜୈନ(୭୦)ଙ୍କୁ ମୁମ୍ବାଇର ନାଗପଡ଼ା ଥାନା ଜାୟରାଜଭାଇ ଷ୍ଟ୍ରିଟ୍ସ୍ଥିତ ୧୪୪ ବର୍ଗ ଫୁଟ ବିଶିଷ୍ଟ ଗ୍ୟାଙ୍ଗଷ୍ଟର ଦାଉଦ ଇବ୍ରାହିମଙ୍କ ଏକ ଦୋକାନର ମାଲିକାନା ଅଧିକାର ମିଳିଛି। ଜାୟରାଜଭାଇ ଷ୍ଟ୍ରିଟ୍ରେ ଥିବା ୧୯୯୩ ମୁମ୍ବାଇ ବୋମା ବିସ୍ଫୋରଣର ମାଷ୍ଟରମାଇଣ୍ଡ ଦାଉଦ ଇବ୍ରାହିମଙ୍କ ୨୩ଟି ସମ୍ପତ୍ତିକୁ ଆୟକର ବିଭାଗ ୨୦୦୧ରେ ଜବତ କରିଥିଲା। ଏଥିରେ ତାଙ୍କର ୧୪୪ ବର୍ଗଫୁଟ ବିଶିଷ୍ଟ ଏକ ଦୋକାନ ଗୃହ ରହିଥିଲା। ଉକ୍ତ ସମ୍ପତ୍ତିକୁ ନିଲାମ କରିବା ପାଇଁ ଆୟକର ବିଭାଗ ପକ୍ଷରୁ ଖବରକାଗଜରେ ବିଜ୍ଞାପନ ପ୍ରକାଶ ପାଇଥିଲା। ୨୦୦୧ ସେପ୍ଟେମ୍ବର ୨୦ରେ ହେମନ୍ତ ନିଲାମରେ ଯୋଗଦେଇ ୨ ଲକ୍ଷ ଟଙ୍କାରେ ଉକ୍ତ ଦୋକାନକୁ କିଣିଥିଲେ। ତେବେ ଏହାପରେ ମଧ୍ୟ ଦୋକାନର ମାଲିକାନା ଅଧିକାର ହେମନ୍ତଙ୍କୁ ମିଳି ନ ଥିଲା। ବିଭାଗୀୟ ପ୍ରକ୍ରିୟା ଏବଂ ସ୍ଥାନୀୟ ପ୍ରଶାସନର ବାଧା ଯୋଗୁ ଏହି ମାମଲା ବର୍ଷ ବର୍ଷ ଧରି ବିଚାରାଧୀନ ରହିଥିଲା। ହେମନ୍ତ ଏହି ସମ୍ପତ୍ତିକୁ ନିଜ ନାମରେ କରିବା ପାଇଁ ପ୍ରଧାନମନ୍ତ୍ରୀ କାର୍ଯ୍ୟାଳୟ ସମେତ ଅନେକ ଅଧିକାରୀଙ୍କୁ ଚିଠି ଲେଖିଥିଲେ। ସମୟ ସମୟରେ ଏହାର ଉତ୍ତର ଦିଆଯାଉଥିଲେ ମଧ୍ୟ ତାଙ୍କ ନାମରେ ଦାଉଦଙ୍କ ଦୋକାନର ପଞ୍ଜୀକରଣ ହୋଇପାରି ନ ଥିଲା। ହେମନ୍ତ କହିଛନ୍ତି, ୨୦୧୭ରେ ଏହି ମାମଲା ସମ୍ବନ୍ଧିତ ଫାଇଲ ରେଜିଷ୍ଟ୍ରାର ଅଫିସରୁ ହଜିଯାଇଥିବା ନେଇ ତାଙ୍କୁ କୁହାଗଲା। ତେଣୁ ସେ ବାଧ୍ୟହୋଇ କୋର୍ଟଙ୍କ ଆଶ୍ରୟ ନେଇଥିଲେ। ନ୍ୟାୟାଳୟଙ୍କ ନିର୍ଦ୍ଦେଶ ଅନୁଯାୟୀ ଗତ ଡିସେମ୍ବର ୧୯ରେ ଏହି ସମ୍ପତ୍ତି ତାଙ୍କ ନାମରେ ପଞ୍ଜୀକୃତ ହୋଇଥିଲା। ଦୀର୍ଘ ୨୩ ବର୍ଷର ଲଢ଼େଇ ପରେ ତାଙ୍କୁ ସଫଳତା ମିଳିଥିଲା। ହେମନ୍ତ କହିଛନ୍ତି, ସେ ସମୟ ଆଗରେ ହାର୍ ମାନି ନ ଥିଲେ। ଦୀର୍ଘ ବର୍ଷର ଉଦ୍ୟମ ପରେ ତାଙ୍କୁ ଏହି ବିଜୟ ମିଳିଛି। ତାଙ୍କର ମୁମ୍ବାଇରେ କୌଣସି ବ୍ୟବସାୟ ନ ଥିଲା। ଦାଉଦ ଇବ୍ରାହିମଙ୍କ ଆଧିପତ୍ୟକୁ କମ୍ କରିବା ପାଇଁ ସେ ଏହି ସମ୍ପତ୍ତି କିଣିଥିଲେ ଓ ଆୟକର ବିଭାଗ ସହ ସମ୍ପର୍କ କରିଥିଲେ। ତେବେ ଏବେ ମଧ୍ୟ ତାଙ୍କର ବିଜୟ ଅଧୁରା ରହିଛି ବୋଲି ହେମନ୍ତ କହିଛନ୍ତି। ଉକ୍ତ ଦୋକାନଟି ଦାଉଦଙ୍କ କେତେଜଣ ସହଯୋଗୀଙ୍କ ନିୟନ୍ତ୍ରଣରେ ଏବେ ମଧ୍ୟ ରହିଛି। ସେମାନେ ଉକ୍ତ ସ୍ଥାନକୁ ଏକ ଲେଥ୍ ମେଶିନ କର୍ମଶାଳାରେ ପରିଣତ କରିଛନ୍ତି। ତେଣୁ ଉକ୍ତ କର୍ମଶାଳାକୁ ବନ୍ଦ କରିବା ପାଇଁ ସେ ପୋଲିସ ଓ ପ୍ରଶାସନକୁ ଚିଠି ଲେଖିଛନ୍ତି।
