ଯାଜପୁର,୭ା୧୦(ହର୍ଷବର୍ଦ୍ଧନ ବେହେରା): ଦାରିଦ୍ର୍ୟ ସୀମାରେଖା ତଳେ ବାସ କରୁଥିବା ସର୍ବହରାଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ଆବାସ, ମୋ କୁଡିଆ ଓ ବିଜୁ ପକ୍କାଘର ଯୋଜନା ପ୍ରଣୀତ ହୋଇଛି। ହେଲେ ୧୭ ବର୍ଷ ହେଲା କାର୍ଯ୍ୟାଦେଶ ପାଇ ଜଣେ ହିତାଧିକାରୀ ପକ୍କା ଘରକୁ ଚାହିଁ ରହିଛନ୍ତି। ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ ପୁରୁଣା ବଉଳମାଳ ପଞ୍ଚାୟତ ଶୁକୁଟୀଝର ଗ୍ରାମର ହିତାଧିକାରୀ ବେଣୁଧର ପଣ୍ଡାଙ୍କ କ୍ଷେତ୍ରରେ ଏଭଳି ଘଟିଛି। ଏହିକ୍ରମରେ ପଣ୍ଡାଙ୍କ ପରିବାରବର୍ଗଙ୍କ ଜୀବନ ଝାଟିମାଟି ଘରେ ବିତୁଛି।
ଯାଜପୁର ଜିଲା ଧର୍ମଶାଳା ବ୍ଲକରେ ପୂର୍ବରୁ ଆବାସ ଗୃହ କେଳେଙ୍କାରୀକୁ ନେଇ ଲୋକାୟୁକ୍ତ ପର୍ଯ୍ୟନ୍ତ ମାମଲା ରହିଛି। ତରଞ୍ଜିଆ ଗ୍ରାମରେ ଏକ ପରିବାରକୁ ଏକାଧିକ ପକ୍କା ଘର ମିଳିଥିବା ନଜିର ରହିଛି। କିନ୍ତୁ ଆବାସ କାର୍ଯ୍ୟାଦେଶ ଦେବା ପରେ ବି ଟଙ୍କା ନଦେଇ ହିତାଧିକାରୀଙ୍କୁ ଭଣ୍ଡାଇବା ଘଟଣା ଏବେ ଧର୍ମଶାଳା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଏପରିକି ମନ୍ତ୍ରୀଙ୍କ ନିର୍ଦ୍ଦେଶକୁ ବି ବ୍ଲକ ପ୍ରଶାସନ ଖାତିର କରିନାହାନ୍ତି। ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟ ଅନୁସାରେ ପଣ୍ଡା ଓ ତାଙ୍କ ସ୍ତ୍ରୀ ପ୍ରମିଳା ପ୍ରାୟ ୩୦ ବର୍ଷ ହେବ ସରକାରୀ ଆବାସ ପାଇଁ ନିବେଦନ କରି ଥକି ଯାଇଛନ୍ତି। ୨୦୦୭-୦୮ରେ ଧର୍ମଶାଳା ପଞ୍ଚାୟତ ସମିତି କାର୍ଯ୍ୟାଳୟରୁ ବେଣୁଧର ପଣ୍ଡାଙ୍କୁ ଇନ୍ଦିରା ଆବାସ ଗୃହ ନିର୍ମାଣ ପାଇଁ ୪୪୪୫/୨୨ା୧୨ା୨୦୦୭ ନମ୍ବରରେ କାର୍ଯ୍ୟଦେଶ ମିଳିଥିଲା। ସେତେବେଳେ ଏଥିପାଇଁ ୨୫ ହଜାର ଟଙ୍କା ସହାୟତା ପ୍ରଦାନ କରାଯାଉଥିଲା। ହେଲେ ବେଣୁଧରଙ୍କୁ ଘର ନିର୍ମାଣ ବାବଦକୁ କୌଣସି ସହାୟତା ଦିଆଗଲା ନାହିଁ। କିଛି ମାସ ଅପେକ୍ଷା କରି ସେ ବ୍ଲକ କାର୍ଯ୍ୟାଳୟକୁ ଦୌଡ଼ି ଦୌଡ଼ି ନିରାଶ ହୋଇ ଫେରିଲେ। ଶେଷରେ ୨୦୧୪ରେ ସେ ଓଡିଶା ପଞ୍ଚାୟତିରାଜ ଓ ସଂସଦୀୟ ବ୍ୟାପାର ମନ୍ତ୍ରୀଙ୍କ ଦ୍ୱାରସ୍ଥ ହୋଇଥିଲେ। ମନ୍ତ୍ରୀ ତାଙ୍କ ପତ୍ରସଂଖ୍ୟା ୪୧୫/୨୦ା୧ା୨୦୧୪ରେ ଧର୍ମଶାଳା ବିଡିଓଙ୍କୁ ତଦନ୍ତ କରି ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ। ହେଲେ ଅଦ୍ୟାବଧି ତାଙ୍କୁ ଘର ଖଣ୍ଡେ ଦିଆଗଲା ନାହିଁ। ଫଳରେ ଆଜି ପର୍ଯ୍ୟନ୍ତ ବେଣୁଧର ଭଙ୍ଗା ଚାଳଘରେ ଜୀବନ ବିତାଉଛନ୍ତି। ପୁନଃ ବେଣୁଧର ୧୯ା୧ା୨୦୨୩ରେ ଧର୍ମଶାଳା ବିଡିଓଙ୍କୁ ଘର ଖଣ୍ଡେ ଦେବା ପାଇଁ ଆବେଦନ କରିବା ସହ ବିଧାୟକଙ୍କୁ ମଧ୍ୟ ଦରଖାସ୍ତ ପ୍ରଦାନ କରିଛନ୍ତି। ହେଲେ ଅଦ୍ୟାବଧି କିଛି ସୁଫଳ ମିଳିପାରିନାହିଁ। ତେବେ ଏଠାରେ କାହିଁକି ବେଣୁଧରଙ୍କ ପ୍ରତି ବ୍ଲକ ପ୍ରଶାସନ ଆଦୌ ଦୃଷ୍ଟି ଦେଉନାହାନ୍ତି ତାହା ସାଧାରଣରେ ପ୍ରଶ୍ନ ଉଠିଛି। ଧର୍ମଶାଳା ବ୍ଲକରେ ଏଭଳି ଶତାଧିକ ଗରିବ ପରିବାର ଆବାସ ଯୋଜନାରେ ସାମିଲ ହେବାକୁ ଚାହିଁ ରହିଥିବାବେଳେ କେତେକ କ୍ଷେତ୍ରରେ ଥିଲାବାଲା ଲୋକେ ଘର ପାଇ ଆରାମରେ ଦିନ କାଟୁଥିବା ଚର୍ଚ୍ଚା ହେଉଛି।
