ନୂଆଦିଲ୍ଲୀ,୩୧ା୧୨: ଆସନ୍ତା ମକର ସଂକ୍ରାନ୍ତି (ଜାନୁୟାରୀ ୧୪) ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ମନ୍ତ୍ରିମଣ୍ଡଳ ସମ୍ପ୍ରସାରଣ କରିପାରନ୍ତି ବୋଲି ରାଜନୈତିକ ମହଲରେ କଳ୍ପନା ଜଳ୍ପନା ପ୍ରକାଶ ପାଇଛି। ବଜେଟ ଅଧିବେଶନ ପୂର୍ବରୁ ମନ୍ତ୍ରୀସ୍ତରରେ ଅଦଳବଦଳ ହୋଇପାରେ। ଏଥିସହିତ ନିର୍ବାଚନ ଅନୁଷ୍ଠିତ ହେବାକୁ ଥିବା ରାଜ୍ୟଗୁଡ଼ିକରେ ଦଳର ରାଜନୈତିକ ଆବଶ୍ୟକତାକୁ ନେଇ ମଧ୍ୟ ସାଂଗଠନିକ ସ୍ତରରେ ଅଦଳବଦଳ କରାଯିବାର ସମ୍ଭାବନା ରହିଥିବା କୁହାଯାଉଛି। ମନ୍ତ୍ରୀମାନଙ୍କ ପ୍ରଦର୍ଶନ ଏବଂ ଯୋଗ୍ୟ ଏମ୍ପିମାନଙ୍କୁ ପାଳିକରି କ୍ୟାବିନେଟରେ ସାମିଲ କରିବା ନିମନ୍ତେ ଏହି ସମ୍ପ୍ରସାରଣ କରାଯିବ। ଯେଉଁମାନେ ମନ୍ତ୍ରିମଣ୍ଡଳରୁ ବାଦ୍ ପଡ଼ିବେ ସେମାନଙ୍କୁ ସାଂଗଠନିକ କାର୍ଯ୍ୟରେ ନିୟୋଜିତ କରାଯିବ ବୋଲି ଏକ ସୂତ୍ରରୁ ଜଣାପଡ଼ିଛି। ଗତବର୍ଷ ଜୁନ୍ ୮ରେ ମୋଦି ତାଙ୍କ ମନ୍ତ୍ରିମଣ୍ଡଳରେ ଅଦଳବଦଳ କରିଥିଲେ। ସେତେବେଳେ କେତେକ ପ୍ରମୁଖ ନେତାଙ୍କ ସମେତ ୧୨ ଜଣଙ୍କୁ କ୍ୟାବିନେଟରୁ ବାଦ୍ ଦିଆଯାଇ ସେମାନଙ୍କ ସ୍ଥାନରେ ଅନ୍ୟମାନଙ୍କୁ ନିଆଯାଇଥିଲା। ଏଥର ମଧ୍ୟ ସେହିଭଳି ଅଦଳବଦଳ କରାଯାଇପାରେ ବୋଲି ଆଶା କରାଯାଉଛି। ମନ୍ତ୍ରିମଣ୍ଡଳରେ ଲୋକ ସଭାରୁ ଅଧିକ ସଦସ୍ୟଙ୍କୁ ସାମିଲ କରିବା ସହ ଗୁଜରାଟରେ ଭାଜପାକୁ ସର୍ବାଧିକ ଆସନରେ ବିଜୟ କରାଇଥିବାରୁ ପୁରସ୍କାର ସ୍ବରୂପ ସେଠାର କେତେଜଣ ଏମ୍ପିଙ୍କୁ ମନ୍ତ୍ରୀପଦ ମିଳିପାରେ ବୋଲି କୁହାଯାଉଛି।
