ଭୁବନେଶ୍ୱର,୮।୩(ଶର୍ମିଷ୍ଠା ପାଣିଗ୍ରାହୀ): ଅନ୍ତର୍ଜାତୀୟ ମହିଳା ଦିବସ ଅବ୍ୟବହିତ ପୂର୍ବରୁ ଆଉଟଲୁକ୍ ପତ୍ରିକା ପକ୍ଷରୁ କରାଯାଇଥିବା ଏକ ସର୍ଭେରେ ଭାରତର ୩୬ଜଣ ସଫଳତମ ମହିଳାଙ୍କ ମଧ୍ୟରେ ଓଡ଼ିଶାରୁ ଆଦ୍ୟାଶା ସତପଥୀଙ୍କୁ ସ୍ଥାନିତ କରାଯାଇଛି। ଧରିତ୍ରୀ ଏବଂ ଓଡ଼ିଶା ପୋଷ୍ଟର ମୁଖ୍ୟ କାର୍ଯ୍ୟନିର୍ବାହୀ ଭାବେ ଆଦ୍ୟାଶା ଉଭୟ ଖବରକାଗଜକୁ ନିଜର ଦୂରଦୃଷ୍ଟି ଦ୍ୱାରା ଦିଗ୍ଦର୍ଶନଦେଇ ଆସୁଛନ୍ତି। ବିଶେଷକରି ପରିବେଶ ଓ ପ୍ରକୃତି ସଂକ୍ରାନ୍ତୀୟ ବିପର୍ଯ୍ୟୟରେ ସୁଧାର ଆଣିବା ପାଇଁ ଧରିତ୍ରୀ ତରଫରୁ ଅନୁଷ୍ଠିତ ବିଭିନ୍ନ ଜାତୀୟ ଯୁବ ସମ୍ମିଳନୀ ହେଉଛି ତାଙ୍କ ଅଭିନବ ପ୍ରୟାସର ସଫଳ ଦୃଷ୍ଟାନ୍ତ। ଜଳବାୟୁୁ ପରିବର୍ତ୍ତନ ପାଇଁ ବ୍ୟକ୍ତିଗତ ଓ ଗୋଷ୍ଠୀଗତ ଭାବେ କାର୍ଯ୍ୟ କରୁଥିବା ଯୁବତୀଯୁବକଙ୍କୁ ଚିହ୍ନଟ କରି ପୁରସ୍କୃତ କରିବା ପାଇଁ ‘ଧରିତ୍ରୀ କ୍ଲାଇମେଟ୍ ଗ୍ରାଣ୍ଟ’ ପ୍ରତିଷ୍ଠା ହେଉଛି ତାଙ୍କର ଏକ ଯୁଗୋପଯୋଗୀ ପରିକଳ୍ପନା, ଯାହା ଯୁବବର୍ଗଙ୍କ ମଧ୍ୟରେ ଜଳବାୟୁ ପରିବର୍ତ୍ତନ ପାଇଁ ଅସୀମ ଉଦ୍ଦୀପନା ଭରି ଦେଇଛି।
ଉଲ୍ଲେଖଯୋଗ୍ୟ, ଆଉଟଲୁକ୍ର ଏହି ସଂଖ୍ୟାରେ ଭାରତର ଅର୍ଥମନ୍ତ୍ରୀ ନିର୍ମଳା ସୀତାରାମନ୍, ଫିଲ୍ମ ନିର୍ମାତା ଗୁନିତ ମୋଙ୍ଗା କପୁର୍, ଅଭିନେତ୍ରୀ ନୟନତାରା, ପାଇଲଟ୍ ପୁନ୍ୟା ନଞ୍ଜାପ୍ପା, ଆମେରିକା କଂଗ୍ରେସର ପୂର୍ବତନ ସଦସ୍ୟ ତୁଲ୍ସୀ ଗବାର୍ଡ, ଭାରତ-ଆମେରିକାର ଅର୍ଥନୀତିଜ୍ଞ ଗୀତା ଗୋପିନାଥ୍, କଣ୍ଠଶିଳ୍ପୀ ଅନନ୍ୟା ବିର୍ଲା ଭଳି ବ୍ୟକ୍ତିତ୍ୱ ସ୍ଥାନ ପାଇଛନ୍ତି।
