ଭୁବନେଶ୍ୱର,୧୭।୭ (ବ୍ୟୁରୋ):ସମାଜସେବୀ ତଥା ମାନବପ୍ରେମୀ ଅଦିତ୍ୟ ଦାସ ମୃତ୍ୟୁକୁ ନେଇ ଏବେବି ସସ୍ପେନ୍ସ ଲାଗି ରହିଛି। ଭୁବନେଶ୍ୱର ଜିଆର୍ପି ଥାନା ପୋଲିସ ଏହି ମାମଲାରେ ଆଦିତ୍ୟଙ୍କ ସାଙ୍ଗ ଓ ପରିବାର ଲୋକଙ୍କ ସମେତ ୩୦ରୁ ଊର୍ଦ୍ଧ୍ୱ ଲୋକଙ୍କ ବୟାନ ରେକର୍ଡ କରିଛି। ଗୁରୁବାର ପୁଣି ବିକାଶଙ୍କ ସାଙ୍ଗ ଦୀପୁ ଓ ସୌମ୍ୟଙ୍କୁ ପଚରାଉଚରା କରିଛି। ୪ ଘଣ୍ଟାର ପଚରାଉଚରାବେଳେ ପୋଲିସ ବିଭିନ୍ନ ପ୍ରସଙ୍ଗରେ ଜାଣିବାକୁ ଚାହିଁଥିଲା। ତେବେ ଆବଶ୍ୟକ ପଡିଲେ ସେମାନେ ପୁଣି ଥାନାରେ ହାଜର ହେବେ ବୋଲି ପୋଲିସ କହିଛି। ସେମାନେ ଆଦିତ୍ୟ ଓ ସାଙ୍ଗ ବିକାଶଙ୍କ ସମ୍ପର୍କରେ କିଛି ନୂଆ ତଥ୍ୟ ପୋଲିସକୁ ଦେଇଥିବା ଜଣାପଡିଛି।
ଅନ୍ୟପକ୍ଷରେ ପୋଲିସ ବଲାଙ୍ଗୀରରେ ଥିବା ଆଦିତ୍ୟଙ୍କ ସାଙ୍ଗକୁ ନୋଟିସ କରିଛି। ବଲାଙ୍ଗୀରରେ ଥିବା ସାଙ୍ଗ ଆଦିତ୍ୟଙ୍କ ସହ ନିୟମିତ ଭିଡ଼ିଓ କଲ୍ ମାଧ୍ୟମରେ କଥା ହୁଅନ୍ତି। ଏମିତ ିକି ସେହି ସାଙ୍ଗ ଆଦିତ୍ୟଙ୍କ ଘନିଷ୍ଠ ବନ୍ଧୁ ବୋଲି କୁହାଯାଉଛି। ତାଙ୍କୁ ଜେରା କରାଗଲେ ଆଦିତ୍ୟଙ୍କ ମୃତ୍ୟୁ ସମ୍ପର୍କରେ କିଛିଟା ସୁରାକ ମିଳିବ ବୋଲି ପୋଲିସ ଆଶା ରଖିଛି। ତେଣୁ ତାଙ୍କୁ ଭୁବନେଶ୍ୱର ଜିଆର୍ପି ଥାନାରେ ହାଜର ହେବାକୁ କୁହାଯାଇଛି। ସେହିଭଳି ଆଦିତ୍ୟ ରହୁଥିବା ଭଡ଼ାଘର ମାଲିକଙ୍କୁ ଜେରା କରାଯାଇଥିଲା। ଆଦିତ୍ୟ କେବେଠୁ ଭଡ଼ାରେ ଥିଲେ। କେବେ ମାଲିକଙ୍କ ସହ ଝଗଡା ହୋଇଥିଲା କି? ଏଭଳି ଅନେକ ପ୍ରଶ୍ନ ମାଲିକଙ୍କୁ ପୋଲିସ ପଚାରିଥିଲା। ଆଦିତ୍ୟଙ୍କର ବାଳକାଟୀରେ ଥିବା ଏସ୍ବିଆଇ ଆକାଉଣ୍ଟ ଓ କଳିଙ୍ଗ ବିହାରରେ ଥିବା ୟୁନିୟନ୍ ବ୍ୟାଙ୍କ ଆକାଉଣ୍ଟର ଖୋଳତାଡ଼ ମଧ୍ୟ କରିଛି ଜିଆର୍ପି। ମୃତ୍ୟୁ ପୂର୍ବରୁ ଏକ ଅଜଣା ନମ୍ବରରେ ଆଦିତ୍ୟ କଥା ହୋଇଥିଲେ। ଏହି ନମ୍ବର କାହାର ତାହାକୁ ନେଇ ମଧ୍ୟ ଜିଆର୍ପି ଖୋଲତାଡ଼ କରୁଛି।
ଏଥିସହ ସାମ୍ନାକୁ ଆସିଛି ଆଦିତ୍ୟଙ୍କ ସାଙ୍ଗ ବିକାଶ ଓ ସ୍ତ୍ରୀ ବିଦ୍ୟାଶ୍ରୀଙ୍କ ଫୋନ୍ ବାର୍ତ୍ତାଳାପ। ଆଦିତ୍ୟ ନିଖୋଜ ପରେ ଏହି କଥାବାର୍ତ୍ତା ହୋଇଥିବାବେଳେ ଫୋନ୍ ରେକର୍ଡରେ ବିକାଶକୁ ଅନେକ କିଛି କହିଛନ୍ତି ବିଦ୍ୟାଶ୍ରୀ। ଘରେ ଆଦିତ୍ୟଙ୍କ ବ୍ୟବହାର, ମାନସିକ ସ୍ଥିତି ଓ ସ୍ତ୍ରୀ ବିଦ୍ୟାଶ୍ରୀ ସହ ରହିଥିବା ପାରିବାରିକ ସମ୍ପର୍କ କିପରି ଥିଲା ତାହା ଉକ୍ତ ଅଡ଼ିଓରୁ ଜଣାପଡୁଛି। ଏହି ଅଡିଓ ଏବେ ପୋଲିସ ହାତରେ ଲାଗିଛି। ଏଥିରୁ ପୋଲିସ କିଛି ନୂଆ ସୁରାକ ଖୋଜୁଛି। ଡ଼ିଓରୁ କିଛି ନୂଆ ସୁରାକ ମିଳିପାରେ ବୋଲି ପୋଲିସ ଆଶା କରୁଛି। ଖୁବ୍ଶୀଘ୍ର ପୋଲିସ ମାମଲାର ତଦନ୍ତ ଶେଷ କରି ଘଟଣାର ପର୍ଦ୍ଦାଫାସ କରିବ ବୋଲି ଜିଆର୍ପିର ଜଣେ ଅଧିକାରୀ କହିଛନ୍ତି।
