ନୂଆଦିଲ୍ଲୀ,୧୬ା୩: ବିଶିଷ୍ଟ ଶିଳ୍ପପତି ଗୌତମ ଆଦାନୀଙ୍କ ଆଦାନୀ ଗ୍ରୁପ୍ ଉପରେ ଆମେରିକୀୟ ଶର୍ଟସେଲର ହିଣ୍ଡେନ୍ବର୍ଗ ରିସର୍ଚ୍ଚ ପକ୍ଷରୁ ପ୍ରଘଟ ରିପୋର୍ଟକୁ ନେଇ ଭାରତୀୟ ରାଜନୀତି ଦିନକୁ ଦିନ ଚଳଚଞ୍ଚଳ ହେବାରେ ଲାଗିଛି। ଆଦାନୀଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କି ସମ୍ପର୍କ ରହିଛି, ତା’ର ତଦନ୍ତ ଦାବିରେ ବୁଧବାର ବିରୋଧୀ ଦଳ ନେତାମାନେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଅଫିସକୁ ବିକ୍ଷୋଭ ଶୋଭାଯାତ୍ରା କରି ଯାଉଥିବାବେଳେ ଦିଲ୍ଲୀ ପୋଲିସ ସେମାନଙ୍କୁ ବାଟରେ ଅଟକାଇଛି। ଏହାକୁ ନେଇ ଦିଲ୍ଲୀରେ ରାଜନୈତିକ ପାଣିପାଗରେ ଉଷ୍ମତା ବଢ଼ିଯାଇଛି।
ସମେତ ୧୮ ବିରୋଧୀ ଦଳର ନେତାମାନେ ଅପରାହ୍ନରେ ପାର୍ଲାମେଣ୍ଟରୁ ଇଡି ମୁଖ୍ୟାଳୟ ଅଭିମୁଖେ ବାହାରିଥିଲେ। ଆଦାନୀ-ହିଣ୍ଡେନ୍ବର୍ଗ ପ୍ରସଙ୍ଗରେ ତଦନ୍ତ ଏବଂ ଶାସକ ଭାଜପା ନିଜ ରାଜନୈତିକ ସ୍ବାର୍ଥ ପାଇଁ କେନ୍ଦ୍ରୀୟ ଏଜେନ୍ସିଗୁଡ଼ିକର ଦୁରୁପଯୋଗ ବନ୍ଦ କରିବା ସକାଶେ ଚାପ ସୃଷ୍ଟି କରିବାକୁ ସେମାନେ ଆଗେଇ ଚାଲିଥିଲେ। ଏହାକୁ ଦୃଷ୍ଟିରେ ରଖି ଦିଲ୍ଲୀ ପୋଲିସ ବ୍ୟାପକ ସୁରକ୍ଷା ବନ୍ଦୋବସ୍ତ କରିଥିଲା। ସେମାନଙ୍କୁ ରୋକିବା ପାଇଁ ବିଭିନ୍ନ ସ୍ଥାନରେ ବ୍ୟାରିକେଡିଂ କରି ବହୁ ସଂଖ୍ୟକ ପୋଲିସ କର୍ମଚାରୀଙ୍କୁ ମୁତୟନ କରାଯାଇଥିଲା। ଅବରୋଧ ଯୋଗୁ ବିରୋଧୀ ନେତାମାନେ ସେଠାରୁ ପାର୍ଲାମେଣ୍ଟକୁ ଫେରିଯାଇଥିଲେ। ଏନେଇ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଛନ୍ତି, ଇଡି ଅଧିକାରୀଙ୍କ ସହ ସାକ୍ଷାତ୍ କରିବାକୁ ୨୦୦ ଏମ୍ପି ଯାଉଥିବାବେଳେ ବାଟରେ ୨୦୦୦ ପୋଲିସ କର୍ମଚାରୀ ଅଟକାଇବା ଅତ୍ୟନ୍ତ ଦୁର୍ଭାଗ୍ୟଜନକ।
ସେମାନେ ଆମ ସ୍ବରକୁ ଚପାଇ ଗଣତନ୍ତ୍ର ଉପରେ ଭାଷଣ ଦେବାକୁ ଚାହୁଁଛନ୍ତି। କେହି ଏହି ବିଷୟରେ ବିତର୍କ କିମ୍ବା ଆଲୋଚନାଚକ୍ରରେ କହିଲେ ସେମାନେ ତାଙ୍କୁ ଦେଶବିରୋଧୀ ଆଖ୍ୟା ଦେଉଛନ୍ତି ବୋଲି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ଲଣ୍ଡନ ମନ୍ତବ୍ୟର ଅବତାରଣା କରି ଖାର୍ଗେ କହିଥିଲେ। ତେବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମ୍ସି) ଏବଂ ଶରଦ ପାଓ୍ବାରଙ୍କ ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ଏହି ବିକ୍ଷୋଭ ଶୋଭାଯାତ୍ରାରେ ସାମିଲ ହୋଇନାହିଁ।
