ନୂଆଦିଲ୍ଲୀ,୨୪ା୯: ବିଶ୍ୱର ତୃତୀୟ ସର୍ବାଧିକ ଧନୀ ଶିଳ୍ପପତି ଗୌତମ ଆଦାନୀଙ୍କ ବଡ଼ଭାଇ ବିନୋଦ ଶାନ୍ତିଲାଲ୍ ଆଦାନୀ ସବୁଠୁ ଧନୀ ପ୍ରବାସୀ ଭାରତୀୟ (ଏନ୍ଆର୍ଆଇ) ପରିଚୟ ହାସଲ କରିଛନ୍ତି। ଦୁବାଇରେ ରହୁଥିବା ବିନୋଦଙ୍କର ସିଙ୍ଗାପୁର, ଦୁବାଇ ଓ ଜାକର୍ତ୍ତାରେ ବ୍ୟବସାୟ ରହିଛି। ଗତ ୫ ବର୍ଷ ମଧ୍ୟରେ ତାଙ୍କ ସମ୍ପତ୍ତି ୮୫୦ ପ୍ରତିଶତ ବଢ଼ିଥିବା ଆଇଆଇଏଫ୍ଏଲ୍ ଓ୍ବେଲ୍ଥ ହୁରୁନ୍ ଇଣ୍ଡିଆ ରିଚ୍ ଲିଷ୍ଟ ୨୦୨୨ରୁ ଜଣାପଡ଼ିଛି। ମୋଟ ୧.୬୯ ଲକ୍ଷ କୋଟି ଟଙ୍କାର ସମ୍ପତ୍ତି ସହ ବିନୋଦ ଭାରତର ଷଷ୍ଠ ଧନୀ ବ୍ୟକ୍ତି। ୧.୬୫ ଲକ୍ଷ କୋଟି ଟଙ୍କାର ସମ୍ପତ୍ତି ସହ ହିନ୍ଦୁଜା ଭ୍ରାତା ଦ୍ୱିତୀୟ ଧନୀ ଏନ୍ଆରଆଇ। ଚଳିତ ବର୍ଷ ଧନୀ ଭାରତୀୟଙ୍କ ତାଲିକାରେ ୯୪ ଏନ୍ଆର୍ଆଇ ସ୍ଥାନ ପାଇଛନ୍ତି। ସେମାନଙ୍କ ମଧ୍ୟରୁ ୪୮ ଜଣ ଆମେରିକାରେ ରହୁଛନ୍ତି। ବିନୋଦ ଆଦାନୀ ୧୯୭୬ରେ ମୁମ୍ବାଇରେ ଟେକ୍ସଟାଇଲ ବ୍ୟବସାୟ ଆରମ୍ଭ କରିଥିଲେ। ପରେ ସେ ସିଙ୍ଗାପୁରକୁ ବ୍ୟବସାୟ ସମ୍ପ୍ରସାରଣ କରିଥିଲେ ଏବଂ ୧୯୯୪ରେ ଦୁବାଇ ଯାଇ ମଧ୍ୟପ୍ରାଚ୍ୟରେ ବ୍ୟବସାୟ ପ୍ରତିଷ୍ଠାନ ଖୋଲିଥିଲେ। ଗତବର୍ଷ ସେ ତାଙ୍କ ସମ୍ପତ୍ତିରେ ୩୭,୪୦୦ କୋଟି ଟଙ୍କା ଯୋଡ଼ିଛନ୍ତି, ଅର୍ଥାତ୍ ଗତବର୍ଷ ତାଙ୍କର ଦୈନିକ ରୋଜଗାର ହାରାହାରି ୧୦୨ କୋଟି ଟଙ୍କା ରହିଛି।
