କୋକସରା,୨୦ା୪(ଡି.ଏନ.ଏ.): ପ୍ରେମ ପ୍ରତାରଣାର ଶିକାର ହୋଇ ଜଣେ ନାବାଳିକା ଲୋକଲଜ୍ଜା ସହି ନ ପାରି ବିଷ ପିଇ ଗୁରୁତର ହୋଇପଡିଥିଲେ। ଏକ ମାସ ହେଲା ନାବାଳିକ ବୁର୍ଲା ହସ୍ପିଟାଲରେ ମୃତ୍ୟୁ ସହ ସଂଗ୍ରାମ କରି ଶେଷରେ ଆଖି ବୁଜିଥିଲେ। ଏମିତି ଏକ ସ୍ପର୍ଶକାତର ଘଟଣା ଘଟିଛି କଳାହାଣ୍ଡି ଜିଲା କୋକସରା ଥାନା ଅଧୀନ ବେହେରା ପଞ୍ଚାୟତର ନୁନପାଣି ଗାଁରେ । ଏହି ଘଟଣାରେ ଅଭିଯୁକ୍ତ ପ୍ରେମିକ ସମୀର ପୂଝାରୀ(୨୧)ଙ୍କୁ ପୋଲିସ ଗିରଫ କରି ଗୁରୁବାର କୋର୍ଟ ଚାଲାଣ କରିଛି ।
ପ୍ରକାଶ ଯେ, ଗତ ରବିବାର ବୁର୍ଲାରେ ନାବାଳିକାଙ୍କ ମୃତ୍ୟୁ ପରେ ମୃତଦେହ ଗାଁକୁ ଅଣାଯାଇଥିଲା। ହେଲେ ାବାଳିକାଙ୍କ ପରିବାର ଲୋକେ ସାମାଜିକ ବାସନ୍ଦ ଭୟରେ ଅନ୍ୟ ଜାତିକୁ ଝିଅ ଯାଇଥିବା କହି ମୃତଦେହ ନେଇ ନ ଥିଲେ। ଅନ୍ୟପକ୍ଷେ ନାବାଳିକାଙ୍କ ମୃତଦେହକୁ ପୋଲିସ, ଜନପ୍ରତିନିଧି ଓ ଖବରଦାତା କାନ୍ଧ ଦେଇ ଅନ୍ତିମ ସଂସ୍କାର କରି ମାନବିକତା ଦେଖାଇଥିଲେ। ଏହି ଘଟଣାରେ ପ୍ରତାରକ ପ୍ରେମିକଙ୍କୁ ଗିରଫ ପାଇଁ ଦାବି କରାଯାଇଥିଲା। ପୋଲିସ ଘଟଣାର ତଦନ୍ତ କରି ନୁନପାଣି ଗ୍ରାମର ଅଭିଯୁକ୍ତ ପ୍ରେମିକ ସମୀରଙ୍କୁ ଗିରଫ କରିଥିଲା। ଏନେଇ ପୋଲିସ ଏକ ମାମଲା(ନଂ.୧୨୧/୨୩) ରୁଜୁ କରିଛି। ଘଟଣାର ଅଧିକ ତଦନ୍ତ ଚାଲିଥିବା କୋକସରା ଥାନା ଅଧିକାରୀ ପ୍ରସନ୍ନ କୁମାର ବେହେରା ସୂଚନା ଦେଇଛନ୍ତି।
