ପଟ୍ଟାମୁଣ୍ଡାଇ/ଆଳି,୧୬ା୯ (କଳ୍ପତରୁ ନାୟକ/ବନମାଳୀ ସେନାପତି): ଏମିତି ବି ଆସେ ମୃତ୍ୟୁ। ଚାହୁଁ ଚାହୁଁ ଚାଲିଗଲା ଅକାଳରେ ୨ ପରିବାରର ୪ ଜୀବନ। ବେଙ୍ଗାଲୁରୁ ଭିକ୍ଟୋରିଆ ହସ୍ପିଟାଲରେ ଚିକିତ୍ସା କରାଇ ଆମ୍ବୁଲାନ୍ସରେ ଫେରିବା ବାଟରେ ଆନ୍ଧ୍ରପ୍ରଦେଶର ଚିତୋରଠାରେ ରାସ୍ତାରେ ଠିଆ ହୋଇଥିବା ତେଲ ଟ୍ୟାଙ୍କରକୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ଜ୍ୱାଇଁ, ଝିଅ, ଶ୍ୱଶୁର, ଦାଦା ଶ୍ୱଶୁରଙ୍କ ମୃତ୍ୟୁ ଘଟିଛି ଓ ଜଣେ ଆହତ ହୋଇଛନ୍ତି। ମୃତ ବ୍ୟକ୍ତିମାନେ ହେଲେ କେନ୍ଦ୍ରାପଡ଼ା ଜିଲା ଆଳି ଥାନା ଅଙ୍ଗାରଖ ଗ୍ରାମର ଜ୍ୱାଇଁ ଉମେଶ ସାହୁ (୪୩), ପତ୍ନୀ ରଶ୍ମିତା ସାହୁ (୩୭) ଓରଫ ଲିଲିମା ଓ ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ଗୋବିନ୍ଦପୁର ଗ୍ରାମର ଶ୍ୱଶୁର ତ୍ରିଲୋଚନ ନାୟକ (୫୫), ସାନଭାଇ ବିଜୟ ନାୟକ (୫୩) ବୋଲି ଜଣାପଡ଼ିଛି।
ଆଳି ଥାନା ସହିରା ପଞ୍ଚାୟତ ଅଙ୍ଗାରଖ ଗ୍ରାମର ଉମେଶ ଆସାମରେ ରହୁଥିବା ବେଳେ କିଛିଦିନ ପୂର୍ବେ ମାଲେସିଆ ଯିବା ନିମନ୍ତେ ତାଙ୍କର ଚିଠି ଆସିଥିଲା। ଅଗଷ୍ଟରେ ସେ ଘରେ ଥିବା ସମୟରେ ହଠାତ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ପ୍ରଥମେ ପଟ୍ଟାମୁଣ୍ଡାଇ ଉପଖଣ୍ଡ ଚିକିତ୍ସାଳୟର ଡାକ୍ତର ଦେଖିଥିଲେ। ପରେ ପରିବାର ଲୋକେ ତାଙ୍କୁ ଭୁବନେଶ୍ୱର କିମ୍ସ ଘରୋଇ ହସ୍ପିଟାଲକୁ ଚିକିତ୍ସା ନିମନ୍ତେ ନେଇଥିଲେ। ମାସେ ହେବ କିମ୍ସରେ ଚିକିତ୍ସା ହେବା ପରେ ଡାକ୍ତର ଉମେଶଙ୍କ ମସ୍ତିଷ୍କ ଇନ୍ଫେକ୍ସନ ହୋଇଯାଇଥିବା କହି ତାଙ୍କୁ ବେଙ୍ଗାଲୁରୁ ଭିକ୍ଟୋରିଆ ହସ୍ପିଟାଲକୁ ପଠାଇଥିଲେ। ବୁଧବାର ଉମେଶ, ପତ୍ନୀ ରଶ୍ମିତା ଓ ରଶ୍ମିତାଙ୍କ ବାପା ତ୍ରିଲୋଚନ, ଦାଦା ବିଜୟଙ୍କୁ ନେଇ କିମ୍ସର ଏକ ଆମ୍ବୁଲାନ୍ସ ବେଙ୍ଗାଲୁରୁ ଭିକ୍ଟୋରିଆ ହସ୍ପିଟାଲ ଯାଇଥିଲା। ସେଠାରେ ଡାକ୍ତର ଉମେଶଙ୍କ ମସ୍ତିଷ୍କ ଇନ୍ଫେକ୍ସନ ହୋଇନାହିଁ ବରଂ କିଡ୍ନୀ ନଷ୍ଟ ହୋଇଥିବା କହି ଗୁରୁବାର ଫେରାଇ ଦେଇଥିଲେ। ସେମାନେ ଉକ୍ତ ଆମ୍ବୁଲାନ୍ସରେ ଫେରୁଥିବା ବେଳେ ଶୁକ୍ରବାର ଭୋରୁ ବେଙ୍ଗାଲୁରୁ-ତିରୁପତି ଜାତୀୟ ରାଜପଥ ଆନ୍ଧ୍ରପ୍ରଦେଶର ଚିତୋର ଜିଲା ତାୱାନାମପାଲ୍ଲୀ ମଣ୍ଡଳ ଅନ୍ତର୍ଗତ ତେଲ୍ଲାଗୁଣ୍ଡଲାପାଲ୍ଲୀ ଅଞ୍ଚଳରେ ରାସ୍ତାରେ ଠିଆ ହୋଇଥିବା ଗୋଟିଏ ତେଲ ଟ୍ୟାଙ୍କରକୁ ଧକ୍କା ଦେଇଥିଲା। ଘଟଣାସ୍ଥଳରେ ଲିଲିମା, ଉମେଶ, ତ୍ରିଲୋଚନ ଓ ବିଜୟଙ୍କ ମୃତ୍ୟୁ ହୋଇଥିଲା ବୋଲି ବିଜୟଙ୍କ ପରିବାର ପକ୍ଷରୁ ଜଣାପଡ଼ିଛି। ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ମୃତ ଓ ଆହତଙ୍କୁ ଚିତୋର ସରକାରୀ ଡାକ୍ତରଖାନାରେ ଭର୍ତ୍ତି କରିଥିବା ଜଣାପଡ଼ିଛି। ଏହାକୁ ନେଇ ଆଳି ଓ ପଟ୍ଟାମୁଣ୍ଡାଇ ଅଞ୍ଚଳରେ ଶୋକରଛାୟା ଖେଳିଯାଇଛି।
