ଭବାନୀପାଟଣା,୯।୧୨(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଜୁନାଗଡ଼ ଥାନା ଅଞ୍ଚଳରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ବରଯାତ୍ରୀ ଯାଇ ଫେରିବା ବେଳେ ଏକ କାର ଦୁର୍ଘଟଣାଗ୍ରସ୍ତ ହୋଇଛି। ଦୁର୍ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ୩ଜଣ ଗୁରୁତର ହୋଇଛନ୍ତି। ମୃତକ ହେଲେ ହିମାଂଶୁ ମେହେର(୩୮)। ତାଙ୍କ ଘର ବଣ୍ଡାକୁଟ୍ରା ବୋଲି ଜଣାପଡିଛି।
ମିଳିଥିବା ସୂଚନା ଅନୁଯାୟୀ, ନୂଆପଡ଼ା ଜିଲା ସିନାପାଲିକୁ ବରଯାତ୍ରୀ ନେଇ ଯାଇଥିବା ଏକ କାର (ନଂ.ଓଡି୦୮କେ-୪୫୮୫) ଜୁନାଗଡ଼ ବ୍ଲକ ପଲାସ ଗ୍ରାମକୁ ଫେରୁଥିବା ବେଳେ ବାଟରେ ବଣ୍ଡାକୁଟ୍ରା ନିକଟ ରାସ୍ତା କଡରେ ଥିବା ଏକ ପୋଲବାଡ଼ରେ ପିଟି ହୋଇଯାଇଥିଲା। ଫଳରେ କାରରେ ଥିବା ବଣ୍ଡାକୁଟ୍ରା ଗ୍ରାମର ହିମାଂଶୁଙ୍କ ଘଟଣା ସ୍ଥଳରେ ମୃତ୍ୟୁ ଘଟିଥିଲା। ହେଲେ ବୁଡିପଦର ଗ୍ରାମର ଯୁଗେଶର ମେହେର(୩୯), ଶୁଭମ୍ ମେହେର(୯) ଓ ମାଲପଡାର କାର ଚାଳକ ରବି ପଧାନ ଗୁରୁତର ହୋଇଛନ୍ତି। ସ୍ଥାନୀୟ ଲୋକଙ୍କ ସହାୟତାରେ ଗୁରୁତରଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ଜୁନାଗଡ଼ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ନିଆଯାଇଥିଲା। ସେଠାରେ ଚକିତ୍ସା ପରେ ସେମାନଙ୍କୁ ଭବାନୀପାଟଣା ଜିଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
