ଭୁବନେଶ୍ୱର,୧୦ା୧୧(ସୂର୍ଯ୍ୟକାନ୍ତ ବେହେରା): ରାଜଧାନୀ ଭୁବନେଶ୍ୱରରେ ରବିବାର ରାତି ସାଢେ ୧୦ରେ ଏକ ସଡକ ଦୁର୍ଘଟଣା ଘଟିଛି । ଜଣେ ଯୁବକ ଦ୍ରୁତ ଗତିରେ ଗାଡି ଚଲୁଥିବା ବେଳେ ଭାରସାମ୍ୟ ହରାଇ ପ୍ରଥମେ ଡିଭାଇଡରକୁ ପିଟିବା ପରେ ଗଛକୁ ଜୋରରେ ଧକ୍କା ଦେଇଥିଲେ । ଫଳରେ ଚାଳକଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ଖଣ୍ଡଗିରି ଥାନା ଅନ୍ତର୍ଗତ ଶତାଦ୍ଦୀ ନଗରରେ ଏଭଳି ଅଭାବନୀୟ ଘଟଣା ଘଟିଛି । ମୃତ ଯୁବକ ହେଲେ ଭରତପୁର ଅଞ୍ଚଳର ୱା ଗଙ୍ଗା ରାଓ । ଅନ୍ୟପଟେ ତାଙ୍କ ପଛରେ ବସିଥିବା ଯୁବକଙ୍କ ପରିଚୟ ଜଣାପଡିନାହିଁ । ପୋଲିସ ମୃତଦେହ ଜବତ କରିବା ସହ ଆହତଙ୍କୁ ସ୍ଥାନୀୟ ଲୋକଙ୍କ ସହାୟତରେ ମେଡିକାଲ ପଠାଇଛି । ସେହିପରି ଦୁର୍ଘଟଣାରେ କ୍ଷତିଗ୍ରସ୍ତ ହୋଇଥିବା କେଟିଏମ ଗାଡିକୁ ପୋଲିସ ଥାନାକୁ ଆଣିଛି।
ସୂଚନାନୁସାରେ ଗଙ୍ଗା ଭରତପୁର ଅଞ୍ଚଳରେ ଭୋଜି କରିଥିଲେ । ଭୋଜି ସରିବା ପରେ ସମସ୍ତେ ନିଜ ନିଜ ଗାଡିରେ ଏକାବେଳେ ବୁଲାବୁଲି କରୁଥିଲେ । ଗଙ୍ଗା ବାଇକ ଚଲୁଥିବା ବେଳେ ତାଙ୍କ ସାଙ୍ଗ ପଛରେ ବସିଥିଲେ । ଶତାଦ୍ଦୀନଗର ରାସ୍ତାରେ ଡିଭାଇଡରକୁ ପିଟିବା ପରେ ଏକ ଗଛକୁ ଜୋରରେ ଧକ୍କା ଦେଇଥିଲେ । ଫଳରେ ବାଇକରୁ ଦୁଇ ଜଣ ଯାକ ତଳେ ପଡିଯାଇଥିଲେ ମଧ୍ୟ ବାଇକ ଟି ୫୦ ମିଟରରୁ ଅଧିକ ଦୂର ଯାଏ ଘୁଷୁରି ଯାଇଥିଲା । ବାଇକ ଏତେ ଜୋରରେ ଧକ୍କା ହୋଇଥିଲା ଯେ, ଗଛର ବକଳ ମଧ୍ୟ ବାହାରି ଯାଇଥିଲା ।
