ଦାରିଙ୍ଗବାଡି, ୨୧।୧୨ (ଅରୁଣ ସାହୁ)-କନ୍ଧମାଳ ଜିଲା ଦାରିଙ୍ଗବାଡି ଥାନା ୫୯ ନଂ ଜାତୀୟ ରାଜପଥର ଡାବୁଲୁମାହାଠାରେ ଦୁଇ ବାଇକ ମୁହାଁମୁହିଁ ଧକ୍କା ହୋଇ ଜଣଙ୍କ ମୃତ୍ୟୁ ହୋଇଥିବା ବେଳେ ୩ ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ଦୁଇ ଗୁରୁତରଙ୍କୁ ଦାରିଙ୍ଗବାଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିବା ବେଳେ ଜଣେ ସୁସ୍ଥ ଅଛନ୍ତି।
ପ୍ରକାଶ ଯେ, ବାଇକ ନଂ (ଓଡି ୧୨ ଇ -୬୪୮୬ ସିମନବାଡି ଅଞ୍ଚଳରୁ ସୁଲୁମାହା ଗ୍ରାମକୁ ଫେରୁଥିବା ବେଳେ ଦାରିଙ୍ଗବାଡିରୁ ସିମନବାଡି ଅଭିମୁଖେ ବୁଲେଟ ନଂ (ଓଡି ୦୭ଏସି-୭୫୭୬)ଟି ଯାଉଥିଲା। ଉକ୍ତ ୨ ବାଇକ ମୁହାଁମୁହିଁ ଧକ୍କା ହେବା ଯୋଗୁ ସୁଲୁମାହା ଗ୍ରାମର ଜଣେ ନାବାଳକ ଛାତ୍ର ଯାକ୍ୟୁସ ପ୍ରଧାନଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି। ଖବର ପାଇ ଦାରିଙ୍ଗବାଡି ଆଇଆଇସି ଅଶୋକ କୁମାର ହାଁସଦା ପହଞ୍ଚି ମୃତଦେହ ଜବତ କରିବା ସହ ୨ ବାଇକ ଜବତ କରି ଅଧିକ ତଦନ୍ତ କରୁଥିବା ଜଣାପଡ଼ିଛି।
