ଦିଗପହଣ୍ଡି,୧୧।୧(ଅଶେଷ ନାଥ ମିଶ୍ର): ଗଞ୍ଜାମ – ଗଜପତି ସୀମାନ୍ତ ପର୍ଯ୍ୟଟନ କ୍ଷେତ୍ର ତପ୍ତପାଣି ଘାଟି ପାଳୁଖଳା ଗ୍ରାମ ନିକଟ ମୁଖ୍ୟରାସ୍ତାରେ ରବିବାର ଭୋରରେ ଏକ ଲୁହାଛଡ଼ ବୋଝେଇ ଟ୍ରକକୁ ଯାତ୍ରୀବାହୀ ଟ୍ରାଭେଲର୍ସ ନଂ.(ଓଡ଼ି୦୫ ବିଏମ – ୧୫୧୯) ଧକ୍କା ଦେବାରୁ ଟ୍ରାଭେଲର୍ସ ଗାଡ଼ିଟି ଭାଙ୍ଗିରୁଜି ଯାଇଛି। ବ୍ରହ୍ମପୁରରୁ ଭାୟା ଦିଗପହଣ୍ଡି ଦେଇ ଯାଉଥିବା ଟ୍ରକ ଟି ଯାନ୍ତ୍ରିକ ତ୍ରୁଟି କାରଣରୁ ପାଳୁଖଳା ଗ୍ରାମ ନିକଟ ରାସ୍ତାକଡରେ ଗତ ପ୍ରାୟ ୪ ଦିନ ହେଲା ଅଟକି ରହିଥିଲା।
ରବିବାର ଭୁବନେଶ୍ବରରୁ ଭାୟା ଦିଗପହଣ୍ଡି ଦେଇ ପର୍ଯ୍ୟଟନକ୍ଷେତ୍ର ତପ୍ତପାଣି ଏବଂ ଗଜପତି ଜିଲା ଜିରାଙ୍ଗ ଗ୍ରାମ ସ୍ଥିତ ବୌଦ୍ଧବିହାରକୁ ବୁଲି ଯିବା ପାଇଁ ୨୫ ଜଣ ଯାତ୍ରୀ ଟ୍ରାଭେଲର୍ସ ଗାଡ଼ିରେ ବାହାରିଥିଲେ। ହେଲେ ପ୍ରବଳ କୁହୁଡି ଯୋଗୁ ରାସ୍ତା ଦେଖାଯାଇ ନ ଥିଲା। ଚାଳକଙ୍କ ଅସାବଧାନତା କାରଣରୁ ରାସ୍ତାକଡରେ ଠିଆ ହୋଇଥିବା ଟ୍ରକକୁ ଗାଡ଼ିଟି ପିଟି ଦେଇଥିଲା। ଫଳରେ ଟ୍ରାଭେଲର୍ସ ଗାଡ଼ିର ଚାଳକ ଏବଂ ଅନ୍ୟ ୨ ଜଣ ଯାତ୍ରୀ ଆହାତ ହୋଇଛନ୍ତି। ସେମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ସେମାନଙ୍କୁ ଛାଡି ଦିଆଯାଇଛି। ଖବରପାଇ ପାଟପୁର ଥାନା ପୋଡ଼ାମାରି ଫାଣ୍ଡି ପୋଲିସ ଟିମ ଘଟଣାସ୍ଥଳରେ ପହଞ୍ଚି ଟ୍ରକ ଏବଂ ଟ୍ରାଭେଲର୍ସ ଗାଡ଼ି କୁ ଜବତ କରି ତଦନ୍ତ ଚଳାଇଛନ୍ତି।