ସମ୍ବଲପୁର,୫।୪(ବ୍ୟୁରୋ): ସମ୍ବଲପୁର ଜିଲା କ୍ଷେତରାଜପୁର ଥାନା ଅଞ୍ଚଳରେ ସମଲେଇ ଯୋଜନାରେ ଉଚ୍ଛେଦ ସମୟରେ ସଦର ତହସିଲଦାର ଲକ୍ଷ୍ମଣ ଅମାତଙ୍କୁ ଦୁର୍ବ୍ୟବହାର ମାମଲାରେ ପୋଲିସ ଭାଜପା ନେତା ମୋହନ ଦାସଙ୍କୁ ମଙ୍ଗଳବାର ଗିରଫ କରି କୋର୍ଟ ଚାଲାଣ କରିଛି। ସକାଳୁ ରାମଜୀ ମନ୍ଦିର ନିକଟ ଭଡାଘରୁ ପୋଲିସ ମୋହନଙ୍କୁ ଉଠାଇ ନେଇଥିଲା। ଅତିରିକ୍ତ ଜିଲା ଜଜ୍ ଜାମିନ ଆବେଦନ ଖାରଜ କରିବା ପରେ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଛି। ପ୍ରାୟ ଏକବର୍ଷ ପରେ ପୋଲିସ ଗିରଫ କରିବା ଘଟଣା ସାଧାରଣରେ ଆଲୋଚନାର ବିଷୟ ହୋଇଛି। ଏହି ଘଟଣାରେ ବିଜେଡି ରାଜନୀତି କରୁଥିବା ଭାଜପା ଅଭିଯୋଗ କରିଛି।
ଭାଜପା ଜିଲା ସଭାପତି ଗିରିଶ ପଟେଲ କହିଛନ୍ତି, ବିରୋଧୀଦଳ ନେତା ଜୟନାରାୟଣ ମିଶ୍ର ବାରମ୍ବାର ବିଧାନସଭା ଓ ବାହାରେ ବିଭିନ୍ନ ପ୍ରସଙ୍ଗରେ ରାଜ୍ୟ ସରକାରଙ୍କୁ ଅଡୁଆରେ ପକାଉଛନ୍ତି। ତାଙ୍କ ପ୍ରଶ୍ନର ଉତ୍ତର ଦେଇ ନ ପାରି ଗିରଫ କରି ଭୟଭୀତ କରିବାକୁ ଷଡଯନ୍ତ୍ର କରାଯାଉଛି। ପୋଲିସ ଓ ଆଇନ ବ୍ୟବସ୍ଥାକୁ ସ୍ବାଗତ କରାଯାଉଛି। ହେଲେ କେବଳ ଭାଜପା କର୍ମକର୍ତ୍ତା ଓ ନେତାଙ୍କ ଉପରେ ନିୟମ ଲାଗୁ କରାଯାଉଛି। ଉଚ୍ଛେଦ ଦିନ ସ୍ଥାନୀୟ ବିଧାୟକ ଭାବେ ଜୟନାରାୟଣ ସେଠାକୁ ଯାଇଥିଲେ। ବଳପୂର୍ବକ ପୋଲିସ ଲଗାଇ ପୁରା ବସ୍ତିକୁ ଭାଙ୍ଗି ଦିଆଯାଉଥିଲା। ଏହାକୁ ବିଧାୟକ ବିରୋଧ କରିବା ସ୍ବାଭାବିକ। ମିଛରେ ମାମଲା ରୁଜୁ କରି ଦିଆଯାଇଥିଲା। ଏବେ ବିନା ସୂଚନାରେ ପୋଲିସ ଗିରଫ କରିଛି। ଏହା କେବଳ ରାଜନୈତିକ ଉଦ୍ଦେଶ୍ୟ ବୋଲି ସେ କହିଥିଲେ। ସୂଚନାଯୋଗ୍ୟ, ୨୦୨୨ ଫେବୃୟାରୀ ୧୫ରେ ସମଲେଇ ଯୋଜନା ପାଇଁ ଘୁନଘୁଟିପଡାରେ ଉଚ୍ଛେଦ ପ୍ରକ୍ରିୟା ଚାଲିଥିଲା। ସେ ସମୟରେ ସ୍ଥାନୀୟ ବିଧାୟକ ଭାବେ ମିଶ୍ର ଲୋକଙ୍କ ପାଖକୁ ଯାଇଥିଲେ। ସେଠାରେ ଦଳିତ ଆଦିବାସୀ ପରିବାରଙ୍କୁ ଉପଯୁକ୍ତ କ୍ଷତିପୂରଣ ଦିଆଯାଉ ନ ଥିବା ନେଇ ସେ ତହସିଲଦାର ଅମାତଙ୍କୁ ବିଭିନ୍ନ ପ୍ରଶ୍ନ କରିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏପରି କି ଗାଳିଗୁଲଜ କରିବା ସହ ଜୀବନରେ ମାରିଦେବାକୁ ଧମକ ଦେଇଥିବା ନେଇ ତହସିଲଦାର ଅମାତ ଅଭିଯୋଗ କରିଥିଲେ। ପରେ ଓଏଏସ୍ ସଂଘ ପ୍ରତିକ୍ରିୟାଶୀଳ ହୋଇ ଉତ୍ତରାଞ୍ଚଳ ଆର୍ଡିସି ଡ. ସୁରେଶ ଚନ୍ଦ୍ର ଦଳାଇଙ୍କୁ ଭେଟି କାର୍ଯ୍ୟାନୁଷ୍ଠାନ ପାଇଁ ଦାବି କରିଥିଲା। ତହସିଲଦାର ଅମାତଙ୍କ ଅଭିଯୋଗ କ୍ରମେ କ୍ଷେତରାଜପୁର ଥାନାରେ ମାମଲା ରୁଜୁ ହୋଇଥିଲା। ବିଧାୟକ ମିଶ୍ରଙ୍କ ସହିତ ସମର୍ଥକ ମୋହନ ଦାସ ଓ ଅନ୍ୟ ୧୦ ଜଣଙ୍କ ନାମରେ ମାମଲା ରୁଜୁ ହୋଇଥିଲା।
