ନୂଆଦିଲ୍ଲୀ, ୨୨/୭:୨୪ ସପ୍ତାହର ଗର୍ଭବତୀ ଥିବା ଜଣେ ଅବିବାହିତା ଯୁବତୀଙ୍କୁ ଗର୍ଭପାତ କରାଇବାକୁ ସୁପ୍ରିମକୋର୍ଟ ଗୁରୁବାର ଅନୁମତି ଦେଇଛନ୍ତି। ଫଳରେ ୨୦ ସପ୍ତାହରୁ ଅଧିକ ସମୟ ଗର୍ଭବତୀ ହେବା ପରେ କୌଣସି ଯୁବତୀ ଗର୍ଭପାତ କରାଇପାରିବେ ନାହିଁ ବୋଲି ପୂର୍ବରୁ ଦିଲ୍ଲୀ ହାଇକୋର୍ଟ ଦେଇଥିବା ରାୟ ସୁପ୍ରିମକୋର୍ଟରେ ଖାରଜ ହୋଇଛି। ଏମ୍ସର ଏକ ମେଡିକାଲ ବୋର୍ଡ ଯୁବତୀଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରି ତାଙ୍କ ଜୀବନ ପ୍ରତି କୌଣସି ବିପଦ ନ ଆସିବା ଭଳି ଡାକ୍ତରୀ ପଦ୍ଧତିରେ ଗର୍ଭପାତ କରାଇବାକୁ ସର୍ବୋଚ୍ଚ ଅଦାଲତ ଅନୁମତି ଦେଇଛନ୍ତି।
ଜଷ୍ଟିସ୍ ଡି. ଓ୍ବାଇ. ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଥିଲେ, ଜଣେ ଅବିବାହିତାଙ୍କୁ ଅବାଞ୍ଛିତ ଭାବେ ଗର୍ଭଧାରଣ କରିବାକୁ ଦେବା ମେଡିକାଲ ଟର୍ମିନେଶନ ଅଫ୍ ପ୍ରେଗ୍ନାନ୍ସି (ଏମ୍ଟିପି) ଆକ୍ଟର ଉଦ୍ଦେଶ୍ୟ ଓ ଚିନ୍ତାର ବିପରୀତ ହେବ। ଯୁବତୀ ଜଣକ ରୋଜଗାର କରୁ ନ ଥିବାରୁ ପିଲାର ଭରଣପୋଷଣ ତାଙ୍କ ପାଇଁ କଷ୍ଟକର ହେବ। ଏଥିସହ ସେ ମାନସିକ ସ୍ତରରେ ମଧ୍ୟ ପିଲାକୁ ପାଳିବାକୁ ପ୍ରସ୍ତୁତ ନାହାନ୍ତି। ତେଣୁ ଉକ୍ତ ଆଇନର ପ୍ରାବଧାନ ଅନୁସାରେ ଏକ ମେଡିକାଲ ବୋର୍ଡ ଗଠନ କରି ଯୁବତୀଙ୍କ ଗର୍ଭପାତ କରାଇବାକୁ ସର୍ବୋଚ୍ଚ ଅଦାଲତ ଏମ୍ସ ନିର୍ଦ୍ଦେଶକଙ୍କୁ ନିର୍ଦ୍ଦେଶ ଦେଇଛନ୍ତି।
