ବ୍ରହ୍ମପୁର ଅଫିସ,୧୨।୧୨: ଅବକାରୀ ଗୋଇନ୍ଦା ବିଭାଗ ପକ୍ଷରୁ ଲଗାତାର ଗଞ୍ଜେଇ ଚୋରା ଚାଲାଣକାରୀଙ୍କୁ ଧରାଯାଉଛି। ରବିବାର ରାତିରେ ଅବକାରୀ ଗୁଇନ୍ଦା ଇନ୍ସପେକ୍ଟର ହୃଦୟ ଚନ୍ଦ୍ର ସାମନ୍ତଙ୍କ ନେତୃତ୍ୱରେ ଏକ ଟିମ୍ ଗୋପାଳପୁର ଜଙ୍କଶନ ନିକଟରେ ବସକୁ ଅପେକ୍ଷା କରିଥିବା ୪ଜଣଙ୍କ ଠାରୁ ୩୫କେଜି ଗଞ୍ଜେଇ ଜବତ କରିଛି। ଏଥିସହ ୪ ଅଭିଯୁକ୍ତ ପଶ୍ଚିମବଙ୍ଗର ମଉସାଦ ରେହେମାନ ଗାଜି, ବିହାରର ରଞ୍ଜିତ ପାଶ୍ୱନ, ଗଜପତି ଜିଲା ଆର. ଉଦୟଗିରିର ହୁରିଆ ରାଇକା ଓ ପୁରୀର ମନୋଜ ନାୟକଙ୍କୁ ଗିରଫ କରାଯାଇଛି। ଅବକାରୀ ଟିମ୍ ମଉସାଦ, ରଞ୍ଜିତ ଓ ହୁରିଆଙ୍କ ନିକଟରୁ ୧୦ କେଜି ଲେଖାଏ ଏବଂ ମନୋଜଙ୍କ ନିକଟରୁ ୫ କେଜି ଗଞ୍ଜେଇ ଜବତ କରିଥିଲା। ଅଭିଯୁକ୍ତମାନେ ଗଜପତି ଅଞ୍ଚଳରୁ ଗଞ୍ଜେଇ ଆଣି ଭୁବନେଶ୍ୱର ଯାଉଥିବା ବସ୍ରେ ଚାଲାଣ କରିଥାନ୍ତେ ବୋଲି ଜେରା ବେଳେ କହିଛନ୍ତି। ଗିରଫ ୪ ଅଭିଯୁକ୍ତଙ୍କୁ ସୋମବାର କୋର୍ଟ ଚାଲାଣ କରାଯାଇଥିବା ଅବକାରୀ ଡେପୁଟି କମିଶନର ଅଶୋକ ଶତପଥୀ ସୂଚନା ଦେଇଛନ୍ତି। ଅନ୍ୟପକ୍ଷେ ଅବକାରୀ ଗୋଇନ୍ଦା ପୋଲିସ ପ୍ରେମନଗର ଅଞ୍ଚଳରୁ ଏକ ଅଟୋରେ ଚାଲାଣ ହେଉଥିବା ଗୁଟ୍ଖା ମଧ୍ୟ ଜବତ କରିଛି। ଅଟୋ ସହ ୩ ବସ୍ତା ଗୁଟଖା ଜବତ ହୋଇଥିବା ବେଳେ ୩ ଜଣଙ୍କୁ ଗିରଫ କରାଯାଇଛି।
