ନୂଆଦିଲ୍ଲୀ,୩୦।୭: ଟିମ ଇଣ୍ଡିଆର ଓପନର ଅଭିଷେକ ଶର୍ମା ବିଶ୍ୱର ନମ୍ବର ୧ ଟି-୨୦ ବ୍ୟାଟସମ୍ୟାନ ହୋଇଛନ୍ତି। ICC ରାଙ୍କିଙ୍ଗରେ, ଅଭିଷେକ ଶର୍ମା ଟ୍ରାଭିସ ହେଡଙ୍କୁ ପଛରେ ପକାଇ ଦେଇଛନ୍ତି। ଟ୍ରାଭିସ ହେଡ ବହୁତ ଦିନ ଧରି ନମ୍ବର ୧ ରାଙ୍କିଙ୍ଗରେ ଥିଲେ, କିନ୍ତୁ ୱେଷ୍ଟଇଣ୍ଡିଜ ବିପକ୍ଷ ଟି-୨୦ ସିରିଜରେ ତାଙ୍କର ପ୍ରଦର୍ଶନ ବହୁତ ଭଲ ନ ଥିଲା, ଯାହା ଫଳରେ ତାଙ୍କୁ କ୍ଷତି ସହିବାକୁ ପଡିଲା। ଫଳସ୍ବରୂପ ବର୍ତ୍ତମାନ ଅଭିଷେକ ନମ୍ବର ୧ ସ୍ଥାନ ଅଧିକାର କରିଛନ୍ତି। ଅଭିଷେକଙ୍କ ରେଟିଂ ପଏଣ୍ଟ ୮୨୯ ଏବଂ ଟ୍ରାଭିସ ହେଡ ୮୧୪ ରେଟିଂ ପଏଣ୍ଟ ସହିତ ଦ୍ୱିତୀୟ ସ୍ଥାନକୁ ଖସି ଆସିଛନ୍ତି।
ଭାରତର ତିଲକ ବର୍ମା ତୃତୀୟ ସ୍ଥାନରେ ଅଛନ୍ତି। ସୂର୍ଯ୍ୟକୁମାର ଯାଦବ ଷଷ୍ଠ ସ୍ଥାନରେ ଅଛନ୍ତି। ଅଷ୍ଟ୍ରେଲିଆର ଜୋଶ ଇଙ୍ଗଲିସ ୬ ବ୍ୟାଟସମ୍ୟାନଙ୍କୁ ପଛରେ ପକାଇ ଟପ ୧୦ରେ ପ୍ରବେଶ କରିଛନ୍ତି। ଭାରତୀୟ ଓପନର ଯଶସ୍ବୀ ଜୟସ୍ବାଲ ଟପ ୧୦ରୁ ବାହାର ହୋଇ ୧୧ ନମ୍ବରକୁ ଖସି ଆସିଛନ୍ତି।
ଅଭିଷେକ ଏପର୍ଯ୍ୟନ୍ତ ଟି-୨୦ ଅନ୍ତର୍ଜାତୀୟ କ୍ରିକେଟରେ ଚମତ୍କାର ପ୍ରଦର୍ଶନ କରିଛନ୍ତି। ସେ ୧୬ ଇନିଂସରେ ୩୩.୪୩ ହାରରେ ୫୩୫ ରନ କରିଛନ୍ତି। ବଡ଼ କଥା ହେଉଛି ତାଙ୍କର ଷ୍ଟ୍ରାଇକ ରେଟ ପ୍ରାୟ ୨୦୦। ଅଭିଷେକ ୧୯୩.୮୪ ଷ୍ଟ୍ରାଇକ ରେଟ ସହିତ ଟି-୨୦ ଅନ୍ତର୍ଜାତୀୟରେ ସର୍ବାଧିକ ରନ କରିଥିବା ବ୍ୟାଟ୍ସମ୍ୟାନ। ତାଙ୍କ ବ୍ୟାଟ ରୁ ୨ଟି ଶତକ ଏବଂ ୨ଟି ଅର୍ଦ୍ଧଶତକ ଆସିଛି। ସେ ୪୧ ଛକା ଏବଂ ୪୬ ଚୌକା ମାରିଛନ୍ତି।
ଅଭିଷେକ ଗତବର୍ଷ ୬ ଜୁଲାଇରେ ଜିମ୍ବାୱେ ବିପକ୍ଷରେ ଡେବ୍ୟୁ କରିଥିଲେ। ପ୍ରଥମ ମ୍ୟାଚରେ ସେ ନିଜର ଖାତା ମଧ୍ୟ ଖୋଲିପାରି ନ ଥିଲେ କିନ୍ତୁ ପରବର୍ତ୍ତୀ ମ୍ୟାଚରେ ଏହି ବ୍ୟାଟ୍ସମ୍ୟାନ ଶତକ ହାସଲ କରି ଚମତ୍କାର କରିଥିଲେ। ଅଭିଷେକ ସେହି ମ୍ୟାଚରେ ୮ ଛକା ମାରିଥିଲେ। ଏହି ଶତକ ପରେ, ସେ ଲଗାତାର ୭ ମ୍ୟାଚରେ ବିଫଳ ହୋଇଥିଲେ ଏବଂ ତା’ପରେ ସେ ଦକ୍ଷିଣ ଆଫ୍ରିକା ବିପକ୍ଷରେ ଅର୍ଦ୍ଧଶତକ କରିଥିଲେ। ଏହା ପରେ, ସେ ଚଳିତ ବର୍ଷ ଫେବୃଆରୀରେ ଇଂଲଣ୍ଡ ବିପକ୍ଷ ଟି-୨୦ ସିରିଜରେ ଏକ ଶତକ କରିଥିଲେ। ୱାଙ୍ଖଡେରେ ଖେଳାଯାଇଥିବା ସେହି ମ୍ୟାଚରେ ଅଭିଷେକ ୫୪ ବଲରେ ୧୩୫ ରନ କରିଥିଲେ। ଏଥିରେ ୧୩ ଛକା ଥିଲା। ଏହି ବିସ୍ଫୋରକ ବ୍ୟାଟିଂ ଆଧାରରେ, ଅଭିଷେକ ଆଜି ଟି-୨୦ ରାଙ୍କିଙ୍ଗର ଶୀର୍ଷରେ ପହଞ୍ଚିଛନ୍ତି।
