ତେନ୍ତୁଳିଖୁଣ୍ଟି,୭।୭(ଚିଦାନନ୍ଦ ସାହୁ): କେନ୍ଦ୍ର ଓ ରାଜ୍ୟ ସରକାର ଗରିବ ବାସହୀନଙ୍କୁ ଗୃହ ଦେବା ପାଇଁ ପରସ୍ପର ନିଜ ଯୋଜନା ବୋଲି ଡିଣ୍ଡିମ ପିଟିବା ପାଇଁ ପ୍ରଧାନମନ୍ତ୍ରୀ ଆବାସଗୃହ କାର୍ଯ୍ୟାଦେଶ ବଣ୍ଟନ ପଦ୍ମ ଘୁଞ୍ଚି ଘୁଞ୍ଚି ଜୁନ୍ ମାସ ପହଞ୍ଚତ୍ଲା। ଇତିମଧ୍ୟରେ ଥରକୁ ଥର ବିଭିନ୍ନ କାଗଜପତ୍ର ପଞ୍ଚାୟତସ୍ତରରେ ୱାର୍ଡସଭ୍ୟଙ୍କଠାରୁ ଆରମ୍ଭକରି କର୍ମଚାରୀ ସଂଗ୍ରହ କରିଛନ୍ତି। ଗ୍ରାମ ରୋଜଗାର ସେବକ ଆସି ଜିଓ ଟେକ୍ ମଧ୍ୟ ନେଇଛନ୍ତି। ଯାହାର ଜିଓ ଟେକ ହୋଇଛି ସେ ନିଶ୍ଚିତ ଆବାସଗୃହ ପାଇବ ବୋଲି ଲୋକେ ଆଶା ବାନ୍ଧିଥିଲେ। କିନ୍ତୁ ଜୁନ୍ ମାସରେ ବଣ୍ଟନ ହୋଇଥିବା ଆବାସ ଗୃହ କାର୍ଯ୍ୟାଦେଶ ପରେ ଚିତ୍ର କିଛି ଅଲଗା ଦେଖିବାକୁ ମିଳିଛି।
ବିଧାୟକଙ୍କଠାରୁ ଆରମ୍ଭକରି ଜିଲାପାଳ, ବିଡିଓ କେତେଜଣ ହିତାଧିକାରୀଙ୍କୁ ପ୍ରାଥମିକତା ଭିତ୍ତିରେ ପ୍ରଥମ ପର୍ଯ୍ୟାୟରେ ଗୃହ ଦିଆଯିବ ବୋଲି କହିଥିଲେ। ଏହାପରେ ବ୍ଲକସ୍ତରୀୟ କର୍ମଚାରୀ ଆସି ସେହି ଘରର ସ୍ଥିତି ଦେଖି ପରିବାର ସଦସ୍ୟଙ୍କ କାଗଜ ପତ୍ର ନେଇ ପ୍ରାଥମିକତା ଭିତ୍ତିରେ ଘର ମିଳିବ ବୋଲି ଜଣାଇଥିଲେ। କିନ୍ତୁ ବିଡ଼ମ୍ବନା ପ୍ରତିଶ୍ରୁତି, ଆଶ୍ୱାସନା ମଧ୍ୟରେ ଆଶାରେ ସେ ସବୁ ରହିଗଲା। କିନ୍ତୁ ସେମାନଙ୍କୁ ଆବାସ କାର୍ଯ୍ୟାଦେଶ ଏଯାଏ ମିଳିଲା ନାହିଁ। ଏହାର ଉଦାହରଣ ଦେଖିବାକୁ ମିଳିଛି ତେନ୍ତୁଳିଖୁଣ୍ଟି ବ୍ଲକ ପରଜାବାରଙ୍ଗପଦର ପଞ୍ଚାୟତ ଖାତିଗୁଡ଼ା ଗ୍ରାମର ପଦ୍ମା ପ୍ରଧାନୀଙ୍କ ପାଖରେ।
ପଦ୍ମା ଝିଅ ଚଞ୍ଚଳାଙ୍କ ସହ ଗାଁରେ ରୁହନ୍ତି। ପୁଅ ଗୋପୀଙ୍କର ଦେହାନ୍ତ ହୋଇଯାଇଛି। ବାରଘରେ କାମ୍ରକରି ସେମାନେ ନିଜ ଗୁଜୁରାଣ ମେଣ୍ଟାନ୍ତି। ସେମାନେ ରହୁଥିବା ଘର ଛପର ଉଡ଼ିଯାଇଛି, କାନ୍ଥ ଭାଙ୍ଗିଯାଇଛି। କେହି ଜଣେ ବଦାନ୍ୟ ବ୍ୟକ୍ତି ଆଜବେଷ୍ଟସ୍ଟିଏ ଦେବାରୁ ଚଳିତବର୍ଷ ତାହାକୁ ପକାଇ ବର୍ଷା ଦାଉରୁ ରକ୍ଷା ପାଇଁ ସାହସ ଜୁଟାଇଛନ୍ତି ମା’ ଝିଅ। ପୂର୍ବରୁ ପଦ୍ମା ଓ ଚଞ୍ଚଳାଙ୍କ ଘର ସମ୍ପର୍କରେ ଖବର ପ୍ରକାଶ କରାଯାଇଥିଲା। ଏହାପରେ ବିଧାୟକ ଗ୍ରାମକୁ ଆସିଥିବାବେଳେ ସେମାନଙ୍କୁ ଆବାସ ଘର ମିଳିବ ବୋଲି ପ୍ରତିଶ୍ରୁତି ଦେଇଥିଲେ। ଜିଲାପାଳଙ୍କ ଅଭିଯୋଗ ଶୁଣାଣିରେ ପ୍ରାଥମିକତା ଭିତ୍ତିରେ ଘର ଦେବାକୁ ନିର୍ଦ୍ଦେଶ ରହିଛି। କିନ୍ତୁ ଫଳ ଶୂନ। ଜୀବନକାଳ ମଧ୍ୟରେ ସରକାରଙ୍କଠାରୁ ଘର ଖଣ୍ଡେ ମିଳିବନି କି ବୋଲି ଆଖି ଛଳଛଳ କରି ପ୍ରଶ୍ନ କରିଛନ୍ତି ପଦ୍ମା। ଚଳିତ ଥର ଯେଉଁମାନେ ଆବାସ ଗୃହ ପାଉଛନ୍ତି ସେମାନଙ୍କ ମଧ୍ୟରୁ ଅନେକେ ଇନ୍ଦିରା ଆବାସ ଗୃହ ଯୋଜନା ବେଳଠୁ ଆଜିଯାଏ ସବୁ ଯୋଜନାରେ ଘର ପରିବାରର ସମସ୍ତ ସଦସ୍ୟଙ୍କ ନାମରେ ପାଇଛନ୍ତି। ଏହାପରେ ମଧ୍ୟ ଏବେବି କେତେଜଣ ହିତାଧିକାରୀ ଘର ପାଉଥିବା ବୁଦ୍ଧିଜୀବୀ ଅଭିଯୋଗ କରିଛନ୍ତି। ପଦ୍ମାଙ୍କୁ ଘର ମିଳିବା ସମ୍ପର୍କରେ ବିଡିଓ ମନୋଜ କୁମାର ପାଣିଗ୍ରାହୀଙ୍କୁ ପଚାରିବାରୁ ଜଏନ୍ କରିବା ଆଗରୁ ଆବାସ ହିତାଧିକାରୀ ଚୟନ ହୋଇସାରିଥିଲା। ତଥାପି ପଦ୍ମାଙ୍କ ପାଇଁ କ’ଣ କରାଯାଇପାରିବ ସେ ନେଇ ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ପଦକ୍ଷେପ ନେବେ ବୋଲି କହିଛନ୍ତି।
