ନୂଆଦିଲ୍ଲୀ,୨୦।୯: ନୂତନ ସଂସଦ ଗୃହରେ ମହିଳା ସଂରକ୍ଷଣ ବିଲ ସମ୍ପର୍କରେ ଆଲୋଚନା ଚାଲିଛି। ପ୍ରଥମ ଦିନରେ କେନ୍ଦ୍ର ସରକାର ସ୍ବତନ୍ତ୍ର ଅଧିବେଶନରେ ଲୋକସଭା ଗୃହରେ ମହିଳା ସଂରକ୍ଷଣ ବିଲ ଆଗତ କରିଥିଲେ। ମହିଳା ସଂରକ୍ଷଣ ବିଲ୍କୁ ନାରୀ ଶକ୍ତି ବନ୍ଦନ ଅଧିନିୟମ-୨୦୨୩ ବୋଲି ମୋଦି ସରକାର ନାମ ଦେଇଛନ୍ତି। ଏହି ବିଲ ଆଗତ ହେବା ପରଠାରୁ ବିଭିନ୍ନ ଦଳର ବାକ୍ଯୁଦ୍ଧ ମଧ୍ୟ ଆରମ୍ଭ ହୋଇଛି। ସେପଟେ ଆମ ଆଦମୀ ପାର୍ଟି ଏହି ବିଲ ଉପରେ ନିଜର ଆଭିମୁଖ୍ୟ ସ୍ପଷ୍ଟ କରିଛି।
ଆମ ଆଦମୀ ପାର୍ଟିର ଏକ ବିବୃତ୍ତିରେ କୁହାଯାଇଛି ଯେ, ସଂସଦରେ ସେମାନେ ଏହି ବିଲର କାର୍ଯ୍ୟକାରିତା ଉପରେ ମୋଦି ସରକାରଙ୍କୁ ପ୍ରଶ୍ନ କରିବେ। ଏହାସହ ଦଳ ମହିଳା ସଂରକ୍ଷଣ ବିଲ ଉପରେ ମିଳିତ ମେଣ୍ଟ ‘ଇଣ୍ଡିଆ’ର ନିଷ୍ପତ୍ତିରେ ଛିଡା ହେବ। ବିଲ୍କୁ ନେଇ ଭୋଟ ହେବା ସମୟରେ ଦଳ ଏହାକୁ ସମର୍ଥନ କରିବ।
ଏଏପିର ରାଜ୍ୟ ସଭା ଏମ୍ପି ସଞ୍ଜୟ ସିଂ ସୋସିଆଲ ମିଡିଆରେ ଲେଖିଛନ୍ତି, ମୋଦି ଜୀ, ଆପଣ କେତେ ଦିନ ପର୍ଯ୍ୟନ୍ତ ଦେଶର ମହିଳାମାନଙ୍କୁ ବୋକା ବନାଇବେ? ଆପଣଙ୍କର ଗୋଟିଏ ବି ପ୍ରତିଶ୍ରୁତି ପୂରଣ ହୋଇନାହିଁ। ଆସନ୍ତା ୨୦ ବର୍ଷ ମଧ୍ୟରେ ଏହି ମହିଳା ସଂରକ୍ଷଣ ବିଲ କାର୍ଯ୍ୟକାରୀ ହେବ ନାହିଁ। ଯଦି ଆପଣଙ୍କ ଉଦ୍ଦେଶ୍ୟ ସ୍ପଷ୍ଟ, ତେବେ ୨୦୨୪ରେ ମହିଳା ସଂରକ୍ଷଣ ବିଲ କାର୍ଯ୍ୟକାରୀ କର। ଅନ୍ୟଥା, ଏହି ‘ମହିଳାଙ୍କୁ ବୋକା ବନାଇବା ବିଲ’କୁ ଫେରାଇ ନିଅ।
