କଣ୍ଟିପାଳ,୧୧ା୧୧(ସୁଶାନ୍ତ କୁମାର ସାହୁ): ଆନନ୍ଦପୁର ଉପଖଣ୍ଡ ସୋସୋ ଥାନା ଅଞ୍ଚଳରେ ଶନିବାର ଏକ ଅଭାବନୀୟ ଘଟଣା ଘଟିଛି। ସୋସୋ ଥାନା ଅଧୀନ ଅସିଆ ଗ୍ରାମର ରମେଶ ମୁଣ୍ଡାଙ୍କ ସ୍ତ୍ରୀ ରୀନା କାଠ ଗୋଟାଇବା ପାଇଁ ନିକଟସ୍ଥ ଏକ ଚୋରା ମୋରମ ଖଣି ଅଞ୍ଚଳକୁ ଆସିଥିଲେ। କାଠ ଗୋଟାଇବା ସମୟରେ ମୋରମ ଅତଡ଼ା ଖସିବାରୁ ଉପରେ ଥିବା ଏକ ବାଉଁଶ ବୁଦା ରୀନାଙ୍କ ଉପରେ ପଡ଼ିଥିଲା। ଗୁରୁତର ଅବସ୍ଥାରେ ତାଙ୍କୁ ପରିବାର ଲୋକେ ଆନନ୍ଦପୁର ମୁଖ୍ୟ ଚିକିତ୍ସାଳୟକୁ ଆଣିଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିବା ସ୍ବାମୀ ରମେଶ ମୁଣ୍ଡାଙ୍କ ନିକଟରୁ ସୂଚନା ମିଳିଛି।
ମୃତକଙ୍କ ପରିବାରବର୍ଗଙ୍କ କହିବା ଅନୁଯାୟୀ, ଶୁକ୍ରବାର ବିଳମ୍ବିତ ରାତି ପର୍ଯ୍ୟନ୍ତ ମୋରମ ମାଫିଆମାନେ ମେଶିନ ସହାୟତାରେ ମୋରମ ତାଡ଼ି ନେଇଥିଲେ। ଫଳରେ ସମ୍ପୃକ୍ତ ଅଞ୍ଚଳ ଖାଲୁଆ ହୋଇପଡ଼ିଥିଲା। ଏଭଳି କାରଣକୁ ନେଇ ଏହି ଅଘଟଣ ଘଟିଥିବା ସୂଚନା ମିଳିଛି।
